2 ۔ اسِہ منز کٔرِن پرتھ شخص پننِس ہمسایس تؠمسٕنٛزِ بہتری باپَتھ خوش تاکِہ تؠمسٕنٛز ترقی سپدِ۔ 3 ۔ تکیازِ مسیحن تِہ کٔرنٕہ پننؠ خوشی کینٛہہ بلکِہ چُھ یتٕھہ کٕنؠ لؠکِتھ زِ چانؠن لعن طعن کرن والؠن ہنٛز لعن طعن کھسِہ مے نکَھس۔
4 ۔ تکیازِ یِیژا کَتٕھہ گوڈٕہ لؠکھنٕہ آیِہ تِم آیِہ سانِہ تعلیمِ باپَتھ لؠکھنٕہ تاکِہ صبرٕہ سان تٕہ کتابِ پاکچِہ تسلّی سٲتؠ تھاوۄ اُمید۔ 5 ۔ تٕہ خدایہ دِیو توہِہ صبرٕہ تٕہ تسلّی سان یِہ توفیق زِ مسیح عیسیٰ ہس منز رُوزؠو پانٕہ وٲنؠ یَک دِل۔
6 ۔ تاکِہ توہؠ کرؠو اکھ دِل تٕہ اکھ زبان ٲسِتھ سٲنِس خداوند عیسیٰ مسیح سٕنٛدِس خدایَس تٕہ ببٕہ سٕنٛز ثناء خوٲنی۔
7 ۔ ادٕہ یِتٕھہ پٲٹھؠ مسیحن خدایہ سٕنٛدِ جلالٕہ خٲطرٕہ توہؠ پانَس سٲتؠ شٲمل کرؠو، تِتھے پٲٹھؠ کرِوۄن توہؠ تِہ اکھ بیاکھ شٲمِل۔ 8 ۔ بُو چُھس دپان زِ مسیح بنؠو خدایہ سُند پوز ثٲبت کرنٕہ باپَتھ مختُونَن ہُند خٲدِم تاکِہ تِم وعدٕہ کرِ پُورٕہ یِم آباء و اجدادن سٲتؠ ٲسٕؠ آمتؠ کرنٕہ۔
9 ۔ تٕہ غٲر قوم تِہ کٔرِن رحمتکِہ سببٕہ خدایہ سُند حمُد۔ چنانچِہ لؠکِھتھ چُھ زِ امِہ باپَتھ کرٕ بُو غٲر قومن منز چُون اقرار تٕہ گؠوٕہ چانِہ ناوکؠ بٲتھ۔ 10 ۔ تٕہ پتٕہ چُھ سُہ فرماوان زِ ہے غٲر قومو! تؠمسٕنٛزِ اُمژ سٲتؠ کرؠو خوشی۔
11 ۔ پتٕہ یِہ زِ ہے تمام غٲر قومو!۔ خداوند سُند حمُد کرؠو، تٕہ تمام اُمژٕہ کٔرِن تؠمسٕنٛز ستائیِش(تعریف)۔ 12 ۔ یسعیاہ تِہ چُھ ونان زِ یسّی سُند مُول سپدِ ظٲہر۔ یعنی سُہ شخص یُوس غٲر قومن پؠٹھ حکومت کرنِہ وتِھہ۔ تؠمسٕؠ نِش تھاوَن غٲر قوم اُمید۔ 13 ۔ ادٕہ خدا یُوس اُمیدُک آگُر چُھ سُہ کَرؠو توہِہ ایمان تھاونٕہ سٲتؠ تمام خوشی تٕہ اطمنانٕہ سٲتؠ بھرپُور تاکِہ روحُ القُدسکِہ قدرتٕہ سٲتؠ سپدِ تُہنٛز اُمید زیادٕہ۔ 14 ۔ ہے میانؠو بائیو! بُو چُھس پانٕہ تِہ توہِہ نسبَت یقین تھاوان زِ توہؠ آسؠُو پانٕہ نیک تٕہ مکمل معررفتٕہ سٲتؠ بھرپُور تٕ اکھ اکِس ہؠکؠو نصیحت تِہ کرِتھ۔ 15 ۔ توبٕہ لؠوکح مے کینژَھن جایَن زیادٕہ دلیری سان یاداوٲری ہنٛدِ طورٕہ توہِہ امِہ موجوب زِ مے مؠول خدایہ سٕندِ طرفٕہ توفیق غٲر قومن باپَتھ مسیح عیسیٰ سُند خٲدم آسنُک۔
16 ۔ زِ بُو دِمٕہ خدایہ سٕنٛز خدمت امام سٕنٛدؠ پٲٹھؠ انجام تاکِہ غٲر قوم سپدن نیازکِہ طورٕہ روحُ القُدسٕہ سٲتؠ مُقّدس بنِتھ مقبول۔ 17 ۔ ادٕہ بُو ہیکٕہ تِمن کتَھن منز یمٕہ خدایس مطلق چھے مسیح عیسیٰ سٕنٛدِ ذریعہ فخر کرِتھ۔
18 ۔ تکیازِ مے چھؠنٕہ ہمت بؠیِہ کُنِہ کتِھہ ہنٛز ذکِر کرنٕچ بغیر تِمو کتُھو یمٕہ مسیحن غٲر قوم تابع کرنٕہ باپَتھ کلامٕہ تٕہ کامؠو سٲتؠ۔ نشانو تٕہ معجزاتَن ہنٛدِ طاقتٕہ سٲتؠ تٕہ روحُ القُدسکِہ قُدرتٕہ سٲتؠ میانِہ ذریعہ کرِ۔
19 ۔ یوتام زن مے کٔر یروشلمٕہ پؠٹھ نِتھ ژُورو طرفو اِلُرِّکُم تام مسیح سٕنزِ خوشخبری ہنٛز پُورٕہ پُورٕہ مُنٲدی۔ 20 ۔ تٕہ مے تھوۄ یوہے حوصلٕہ زِ یتِہ نٕہ مسیح سُند ناو بؠنٕہ آمُت اُوس تتِہ بوزناوٕہ بُو خوشخبری تاکِہ بیکؠ سٕنٛدِس بُنیادس پؠٹھ کھالنٕہ بُو پنُن تعمیر۔
21 ۔ بلکِہ یِتھ کنؠ لؠکِھتھ چُھ تِی سپدِ۔ یِمن نٕہ تؠمسٕنٛز خبر وٲژ تِم وُچَھن تٕہ یِمونٕہ بُوز تِم سمجَھن۔ 22 ۔ امے مُوجوب ٹھہرؠوُس بُو بار بار توہِہ نِش پننِس۔
23 ۔ مگر مے روزنٕہ ونؠ یِمن مُلکن منز جاۓ باقی کینٛہہ تٕہ واریاہو ورؠو پؠٹھٕہ چُھم شوق تِہ توہِہ نِش یِنُک۔ 24 ۔ اوٕہ موکٕھہ ییلِہ بُو اسفانیہ مُلکس منز گژٕھ تٕہ ژے نِش یِمٕہ تپٲرؠ تکیازِ مے چھے اُمید زِ یَتھ سفرس منز سمکٔھے بُو ژے تٕہ ییلِۃ مے چانِہ سٲتؠ یوہے مزٕہ ہؠُو یِیِہ تٕہ ژٕہ سوزکھ مے پتٕہ ہُتھ طرفس۔
25 ۔ مگر فِی الحال گژٕھ بُو مُقّدسن ہنٛز خدمت کرنٕہ باپَتھ یروشلم۔ 26 ۔ تکیازِ مَکِدُنٕکؠ تٕہ آسیاہٕکؠ لوکھ سپٕدؠ رٲضی یروشلمکؠن غریب مُقّدسن باپَتھ چندٕہ دِنَس۔
27 ۔ یِہ چُھ رضامندی سٲتؠ، تاہم چُھوٗ توہؠ تِہنٛد قرضدار تِہ تکیازِ ییلِہ غٲر قوم روحانی کتَھن منز تہنٛدؠ شریک سپٕدمتؠ چِھ تیلِہ چُھ لازِم زِ جسمٲنی کتَھن منٛز کرن تِہنٛز خدمت۔ 28 ۔ ادٕہ یِہ خدمت پُورٕہ کرِتھ، بؠیِہ یِہ کینٛہہ حٲصل سپُد تِمن حاوالٕہ کرِتھ گژٕھ بُو ژے نِش یِتھ اَسفانیہ۔
29 ۔ تٕہ بُو چُھس زانان زِ ییلِہ بُو ژے نِش یمٕہ تٕہ بُو یمٕہ مسیح سٕنٛز کٲمِل برکت ہؠتھ۔ 30 ۔ ہے بائیو! بُو چُھسو توہِہ عیسیٰ مسیح سُند یُوس سُون خداوند چُھ واسطٕہ دِتھ بؠیِہ روحُک محبت یاد دِتھ توہِہ گُزٲرِش کران زِ میانِہ باپَتھ کرؠو خدایس دُعا کرنس منز مے سٲتؠ رلِتھ ممحنت۔
31 ۔ زِ بُو یہودیہ ہنٛدؠن نافرمانَن نِشٕہ بچِتھ روزٕہ تٕہ میٲنؠ سُوٚ خدمت یوسٕہ یروشلمٕہ خٲطرٕہ چھے ییِن مُقّدسن پسند۔
32 ۔ تٕہ خدایہ سٕنزِ مرضی سٲتؠ لبٕہ بو توہِہ نِش یِتھ خوشی سان توہِہ سٲتؠ سکون۔ 33 ۔ خدا یُوس سلامتی ہُند آگُر چُھ روزِن توہِہ سٲلمن سٲتؠ۔ آمین۔