2 ۔ اکؠ سُند اعتِقاد چُھ پرتھ چیز کھؠون چِھ جٲئیز تٕہ کمزور ایمانٕہ وۄل چُھ ہاکٔھی واکٔھی کھؠوان۔ 3 ۔ کھؠنٕہ وۄل مٕہ زٲنِن نُو کھؠنٕہ وٲلِس حقیر تٕہ نُو کھؠنٕہ وۄل مَہ لگٲیِن الزام کھؠنٕہ وٲلِس پؠٹھ تکیازِ خداین چُھ سُہ قبول کوٚرمُت۔
4 ۔ ژٕہ کُس چُھکھ بیکؠ سٕنٛدِس نوکرس پؠٹھ الزام لگاوَن وۄل؟ تؠمسُند قٲئم روزُن یا گِرُن چُھ تؠمسٕنٛدِس مٲلکَس ذمہ دٲری۔ بلکہ یِیہ سُہ قٲئم تھاونٕہ تکیازِ خداوند چُھ تَس قٲئم کرنَس پؠٹھ قدرت تھاوان۔ 5 ۔ کانٛہہ چُھ اکِس دوہس دویمِہ نِشٕہ افضل مانان، مگر کانٛہہ چُھ سٲری دوہ برابر سمجھان۔ پرتھ کانٛہہ تھٲیِن پننِس دِلس منز پُورٕہ اعتقاد۔
6 ۔ یُوس کونِہ دوہس چُھ مانان سُہ چُھ خداوند سٕنٛدِ خٲطرٕہ مانان۔ تٕہ یُوس کھؠوان چُھ سُہ چُھ خداوند سٕنٛدِ خٲطرٕہ کھؠوان تکیازِ سُہ چُھ خداۓ سُند شکر کران تٕہ یُوس نٕہ کھؠوان چُھ سُتِہ چُھنٕہ خداوند سٕنٛدِ خٲطرٕہ کھؠوان،بؠیِہ چُھ کران خداوند سُند شکر۔ 7 ۔ تکیازِ اسِہ منزٕہ نٕہ چُھ کانٛہہ پننِہ خٲطرٕہ زندٕہ روزان نَہ چُھ کانٛہہ پننِہ خٲطرٕہ مران۔
8 ۔ اگر اسٕؠ زندٕہ چِھ روزان تٕہ خدایہ سٕندِ خٲطرٕہ چِھ روزان تٕہ اگر مران چِھ تٕہ خدایہ سٕنٛدِ باپَتھ چھ مران۔ ادٕہ اسٕؠ زندٕہ روزو یا مرو خداوند سٕندِی چِھ۔
9 ۔ تکیازِ مسیح مُود توۓ تٕہ زندٕہ سپُد زی سُہ آسِہ موردن تٕہ زندن ہُند خداوند۔ 10 ۔ مگر ژٕہ کؠمِہ باپَتھ چُھکھ پننِس بٲئیِس پؠٹھ الزام لگاوان؟ تٕہ ژٕہ کؠمِہ باپَتھ چُھہن پنُن بُوۓ حقیر زانان؟ اسٕؠ سٲری گژھونا خدایہ سٕنٛدِس تختِ عدالتَس برونٛہہ کنِہ کھڑا۔
11 ۔ چنانچِہ یِہ چُھ لؠکِتھ زِ خداوند چُھ فرماوان "مے چُھ پننِہ حیاتُک قسم، پرتھ کانٛہہ کُوٹھ جُکِہ مۓ برونٛہہ کنِہ تٕہ پرتھ کانٛہہ زبان کرِ خدایہ سُند اقرار"۔ 12 ۔ اتِی دِیِہ اسِہ منزٕہ ہر کانٛہہ خدایس پنُن حساب۔
13 ۔ لہٰزا گاوۄنٕہ اسٕؠ آئندٕہ اکِس بؠیِس پؠٹھ الزام کینٛہہ۔ بلکہ کرؠو توہؠ یُوہے فٲصلٕہ زِ کانٛہہ مَہ تھٲیِن پننِس بٲیِس برونٛہہ کنِہ سُہ چیز یُوس تَس ٹھوکرٕہ لگنُک یا وسٕؠ پینُک ذریعہ آسِہ۔ 14 ۔ مے چُھ پے، بلکِہ چُھم عیسیٰ مسیحس منز یقین زِ کانٛہہ چُھنٕہ ذٲتِی حرام کینٛہہ مگر یُوس تَتھ حرام سمجِھہ تَس خٲطرٕہ چُھ حرام۔
15 ۔ اگر چٲنِس بٲئیِس چانِہ کھؠنٕہ سٲتؠ تکلیف چُھ واتانن تیلِہ چُھکھنٕہ ژٕہ محبتکِس قٲعِدس پؠٹھ کینٛہہ پکان۔ یمِس شخصہ سٕنٛدِ باپَتھ مسیح مُود سُہ مٕہ کرُن ژٕہ پننِہ کھؠنٕہ سٲتؠ ہلاک کینٛہہ۔ 16 ۔ ادٕہ چانِہ نیکی ہنٛز بدنٲمی مَہ گژِھن۔
17 ۔ تکیازِ خدایہ سٕنٛز پادشٲہی چھؠنٕہ کھؠنس چؠنس پؠٹھ کینٛہہ، بلکِہ چھے راست بٲزی تٕہ صلح سلامتِی تٕہ تَتھ خوشی پؠٹھ موقوف یوسٕہ روحُ القُدسٕہ سٕنٛدِ طرفٕہ چھے آسان۔ 18 ۔ تٕہ یُوس کانٛہہ امِہ طورٕہ مسیح سٕنٛز خدمت چُھ کران، سُہ چُھ خدایہ سُند پسندیدٕہ تٕہ انسانن ہُند مقبول۔
19 ۔ ادٕہ اسٕؠ روزو تِمن کتَھن ہنٛدؠ طٲلب یِمو سٲتؠ صلح سلامتی تٕہ باہمی ترقی آسِہ۔ 20 ۔ کھؠنٕہ باپَتھ مَہ کر خدایہ سٕنٛز کٲم خراب۔ پرتھ چیز چُھ پاک، مگر تَس انسانس خٲطرٕہ چُھ خراب یس تؠمکِہ کھؠنٕہ سٲتؠ ٹھوکر چُھ لگان۔
21 ۔ یوہے چُھ ٹھیک زِ ژٕہ نَہ کھے ماز، نَہ چؠہہ شراب۔ نَہ مٕہ تیوتھ کینٛٛہ یمِہ سٲتؠ چٲنِس بٲیِس ٹھوکرٕہ لگِہ۔ 22 ۔ یُوس چون اعتقاد چُھ، سُہ رُوزِن خدایہ سٕنٛزِ نظرِ منز چٲنسٔی دِلس منز۔ مُبارک چُھ سُہ یُوس تؠمِہ چیزکہ ذریعہ یَتھ سُہ جٲئیز چُھ قرار دِوان، چُھنٕہ پنُن پان مُلزِم ثٲبت کران۔
23 ۔ مگر یُوس اکھا کُنِہ چیزس منز شک چُھ کران، اگر تَتھ سُہ کھؠیِہ تٕہ چُھ مُجرم ثٲبِت سپدان۔ امِہ مکٕھہ زِ سُہ چُھنٕہ اعتقادٕہ سان کھؠوان تٕہ یِہ کینژھا اعتقاد سٲتؠ چُھنٕہ، سُہ چُھ گناہ۔