¹ ۔ پرتھ کانٛہہ شخص رُوزِن اعلیٰ حکمرانن تابعدار تکیازِ کانٛہہ حکومت چھؠنٕہ تِژھ یُوسنٕہ خدایہ سٕنٛدِ طرفٕہ چھے۔

² ۔ ادٕہ یُوس حکومتس مُقابلہٕ چُھ کران سُہ چُھ خدایہ سٕندِس انتظامس مُخالفت تٕہ یُوس مُخالِف چُھ سُہ لبِہ سزا۔ ³ ۔ نیکو کارن چُھنٕہ حٲکمن نِشِہ کھوژُن کینٛہہ بلکِہ چُھ بدکارن۔ ادٕہ اگر ژٕہ حٲکمس نِش بے خوف چُھکھ روزُن یژھان تیلِہ کر نیکی تاکِہ چٲنؠ تعریف سپدن تؠمسٕنٛدِ طرفٕہ۔

⁴ ۔ تکیازِ سُہ چُھ چانِہ بہتری باپَتھ خدایہ سُند خٲدم مگر اگر ژٕہ بدی کرَکھ تیلِہ کھوٚژ، تکیازِ سُہ چُھنٕہ بےفٲئیدٕہ تلوار ہؠتھ کینٛہہ۔ سُہ چُھ خدایہ سُند خٲدم زِ تؠمسٕنٛدِ غضنٕہ مطٲبق چُھ بدکارس سزا دِوان۔

⁵ ۔ ادٕہ تعبدار روزُن چُھنٕہ صرف غضبکِہ خوف سٲتؠ ضروری بلکہ چُھ دِل تِہ یہۓ گواہی دِوان۔ ⁶ ۔ امے موجوب چھوٗ توہِہ باج تِہ دِوان زِ سُہ چھ خدایہ سُند خٲدم تٕہ اَتھ کامِہ منز چُھ ہمیشٕہ مشغول روزان۔

⁷ ۔ سارنٔی ہُند حقّ کرؠو ادا، یَس باج شوبِہ دیوُس باج، یَس محصُول گژِھ تَس دِیُو محصُول۔ یَس کھوژُن پزِ تَس کھوژؠو، یَس عزّت پزِ کرُن تَس کرؠو عزّت۔ ⁸ ۔ پانٕہ وٲنؠ مَہ رُوزؠو محبتٕہ ورٲۓ کونِہ چیزس منز کٲنسِہ ہندؠ قرضدار تکیازِ یُوس بؠکِس سٲتؠ چُھ محبت تھاوان تؠمؠ کٔر شریعتس پؠٹھ پُورٕہ عمل۔

⁹ ۔ تکیازِ یِمٕہ کَتٕھہ زِ "زنا مٕہ کر، قتل مٕہ کر، ژُور مٕہ کر، لالٕچ مٕہ کر تٕہ امِہ ورٲۓ بؠیِہ یُوس حکم آسِہ تِمن سارنٔی ہُنٛد خلاصٕہ چُھ یَتھ کَتِھہ منز لبنٕہ یِوان زِ پننِس ہمسایس سٲتؠ تھاو تِتُھوۓ محبت یُوتھ ژٕہ پانس سٲتؠ تھاوان چُھکھ۔

¹⁰ ۔ محبت چُھنٕہ پننِس ہمسایس سٲتؠ بدی کران۔ امِہ موجوب چُھ محبت شریعتٕچ تعمیل۔ ¹¹ ۔ تٕہ وقت زٲنِتھ کرؠو یِتَھے کٕنؠ۔ امِہ موجوب زِ ونؠ وۄت سُہ وَکھ زِ گژھؠو نیندرِہ منز بیدار، تکیازِ یمِہ وقتٕہ اسِہ ایمان اُوس اُونمُت تؠمِہ وقتٕکِہ نسبَت چُھ ونؠ سُون نجات نزدیک۔

¹² ۔ رات گٔیِہ واریاہ ژِیر تٕہ دوہ چُھ پھولنس تیار۔ ادٕہ اسٕؠ تراوۄ انِہ گٹِہ ہنٛزِ کامِہ تٕہ گاشکؠ ہتھیار گنڑو۔ ¹³ ۔ یِتٕھہ کنؠ زن دوہُک دستور چُھ زِ طریقٕہ سان پکو، نَہ کِہ آوارن ہنٛدؠ پٲٹھؠ، نَہ نَشٕہ بٲزی سان۔ بؠیِہ نَہ زِنا کٲرِی تٕہ شہوت پرستی سان بؠیِہ نَہ لڑایِہ نَہ حسدٕہ سان۔

¹⁴ ۔ بلکہ ترٲؠوۄُن خداوندِ عیسیٰ مسیح نٲلؠ تٕہ جسمٕچؠو خواہشو باپَتھ مَہ کرؠو تدبیر۔