¹ Mpaho shendi vona ewiru eya ne fasi eya, kakuli ewiru lye ntanzi ne fasi lye ntanzi nilya mana, mi ne wate kalishi kalina ko. ² Ninda vona o mureneñi ucenete, Jerusarema enja, neu kezya hanshi kuzwa ku wiru kwa Nyambe, kauli tukiseze shina musheshiwa na zwatili nenja mukwame wakwe. ³ Ninda shuwa ezywi liwongoza lizwa muruvona nelitaye, ''' Vone! Hanu mu makaro a Nyambe she mwina a vantu, mi mbwahare navo. Mbuvave a vantu vakwe, mi Nyambe ye mwini mi mbwave Nyambe wavo. ⁴ Nara singura e zinsozi zavo zonshe ku mensho avo, kali nakuve no rufu kapa o kulira a vafu, kapa o kulira kapa oku kuvaza. Kakuli o mufwanino we zintu za kare niwa mana. ⁵ Ozyu kakere ha ruvona naataye, ''Vone! Zonshe ezintu shendi zitenda ovuya.'' A kutaye, ''O ñore ezi kakuli anu mazywi a sepahara ne niti.'' ⁶ A kunditaye, Ezi zintu sheza tendahali! Ndime alpha ne omega, a matatikizo nama maninikizo. Kozyu ashuwire e nyota nendira muha o kunywa vulyo ni kwaazya kuliha ku mapopayizi a menji o vuharo. ⁷ Ozyu na wore nara jovora zizi zonshe, mi Nendirava Nyambe wakwe mi neye nave mwanangu we chikwame. ⁸ Kono vashilyowa, ava kavazumini, nivashi zitendo ezibbi, a vayazi, va kashaigwe, ava vatenda e zimperemesi za mavivo, ava varapera e ziswaniso zo kuvumba nizo kuvezya, nava sawana vonshe, ecivaka cavo muziva litiiza eli litumbuka o muliro ne sirufura iya. Oru ndo rufu rwavili.'' ⁹ Limwi lya mangiroyi e anja-ni-ovire aa kaa kwesi a mankwana e anja-ni- ovire-zovire zama maninikizo nilya kezya kundi taye, ''Kezye hanu. Mbondi kusunde o musheshiwa, mukentu wa Nguana.'' ¹⁰ Mi nilya ndi hinda ko muzya kundi twara ha rundu enene linanukite nokundi sunda o mureneñi ucenete wa Jerusarema nausuka hanshi kuzwa kwiwiru kwa Nyambe. ¹¹ Jerusarema kawina e tuvo lya Nyambe, mi o mukeverero wawo u fwana shina ngwabwe lyo vutokwa hawa, shina ndi jasipa licena shina ndi kiresitare. ¹² Kawina e moota enene ere, lye zizyi ze kumi-nizo-vire, na mangiroyi e kumi-ni-ovire ha zizyi. Ha zizyi kaha ñoretwa a mazina a mashika ekumi-ni-ovire a vana va Isiraere. ¹³ Kuvu zwe zyuva kakwina e zizyi zo tatwe, kwa mboera zo tatwe e zizyi, kwa muturo zo tatwe, kubwimino zo tatwe. ^{14 15} Emoota lyo mureneñi kalina e zanda ze kumi-ni-zovire, mi a mazina a vaapositora ve kumi - ni- vovire va Nguana kaa ñoretwa hayo. Ozyo ka amba kwangu ka kwesi a kasata ke gauda koku tepesa o mureneñi ezizyi zawo nama moota awo. ¹⁶ O mureneñi niwa tendwa ka makokona wone a lingana; muvure kulingana nomu vunfue. Naa tepa o mureneñi ka kasta noku uwana ye ucita 12000 masitadia (2,200 km) muvure, nomu vunfue, nokuya mwiwiru kakufwana. ¹⁷ Naa tepa e moota lyawo, mi niyava 144 kubbiki o mudika koku tepa ko muntu. ¹⁸ E moota kali zyakitwa ke jasipa mi o mureneñi ke gauda yi cena, kucena we votera. ¹⁹ E zanda ze moota lyo mureneñi kazi kavisitwa ka macwe o vutokwa e mishovo yonshe. E canda ce ntanzi kaili jasipa, wavili ndi safire, watatu ndi agate, wovune ndi emerarudi, ²⁰ we anja ndi onikisi, we anja-ni-wonke ndi kaneliani, we anja-ni-yovire ndi kilisolite, we anja-ni- yotatwe ndi beriro, we anja-ni-yone ndi topazi, we kumi ndi kilisopurasi, we kumi ni-wonke ndi jakinisi, mi we kumi ni-yovire ndi ametisito. ²¹ E zigwaro zo rukwakwa nze kumi-nizo vire kaali maperera e kumi ni-ovire, echi gwaro ne cigwaro co rukwakwa kaili perera yonke. E gwagwa enene lyo mureneñi kaili ye gauda yicena, shina votera lika vonahaza kushilya. ²² Kali ninda vona e tempere mu mureneñi, kakuli Nfumu Nyambe Amanta wonshe ne Nguana mbuva tempere yawo. ²³ Owu mureneñi kau zundi e zyuva kapa o mwezi oku munikira kakuli etuvo lya Nyambe ndelyo li sunda ho, ne Nguana ndi rambi yawo. ²⁴ Vashi machava nivara yenda mwituvo lyawo. A vaNfumu ve fasi nivara reta mo ekute lyavo. ²⁵ Ezigwaro kwaazya kuara enako ye zyuva, mi kali nakuve na masiku oko. ²⁶ Navara reta etuvo ne kute livashi macava mo, ²⁷ mi kwaazya eci kacicenete neci kavire mo, kapa yenshe ozyu a tenda eci ci nyanzahara kapa eci ci swavisa, kono mbavena va ñoretwa vulyo mwiVuka ya Nguana yo vuharo.