¹ Engiroyi mpaho shelindi sunda orwizyi rwa menji o vuharo, okucena mbwe kiresitare. Karuvuva ne ruzwa mu ruvona rwa Nyambe nirwa Nguana ² neru vuvira vuya hakati ke njira yo mureneñi. Mushilya ne shilya limwi lyoro rwizyi kamu zyimene e cishamu co vuharo, neci jakatira ezi zyambiro ze kumi ni zovire zi cincana cincana, mi cikwata ezi zyambiro zaco o mwezi no mwezi. A mavuna e cishamu co vuharo nga kuhoza a vantu. ³ E cikuto kali nica kena mo. O ruvona rwa Nyambe nirwa Nguana neru rava mu mureneñi, mi a vakana vakwe navara muverekera. ⁴ Nivara vona eci fateho chakwe, mi ezina nelira ñorwa ha zifateho zavo. ⁵ A masiku kali niya kushina ko; Kali niva shake o mumuni we rambi kapa we zyuva kakuli eye Nfumu Nyambe narava munikira. Ni vara vusa kuya oku kakumani. ⁶ Engiroyi lyo kundita ye, ''Anu mazywi a sepahara mi nga niti. O Nfumu, Nyambe we myuzya ya vaporofita, na katumi engiroyi lwakwe o kezya kusunda a vakana vakwe ezintu ezi shezina hafwihi noku tendahara.'' ⁷ ''Vone, Nanga ninda kezya! E nfuyauzi nzozyu a mamera a mazywi e ciporofita cina mwa yimu e vuka. ⁸ Eme, Johani, ndime ninda shuwa no kuvona ezi zintu. Mi aho shendi zishuwa nokuzi vona ezi zintu, ninda wira hanshi noku tongama kurapera ha matende engiroyi eli kali kwesi lindi sunda. ⁹ Naa ndita ye, ''Washa tendi vulyaho! Ndili mukana afwana mbwee ndiwe na vamwinya a vayenzo a vaporofita ni vonshe ava vamamera a mazywi a muvuka yinu. Tongame rapere Nyambe!'' ¹⁰ Mpaho shandita ye, ''Washa alili kezi ramatera a mazywi o vuporofita bwayinu evuka, kakuli enako yi shunine. ¹¹ Ozyu a tenda e zibbi azwire havuso muku tenda o vubbi. Shizi azyara e zibbirara a zwire havuso muvu birara bwakwe. Ozyu a tenda nenja, a zwire havuso muku tenda nenja. Ozyu a cenete a zwire havuso mukuli cenesa.'' ¹² ''Vone! Ndikezya hahanu nabwangu. Ndi hindite o mupuzo wangu, mi nendiraha hangani muntu kokuya kezi naa tenda. ¹³ Ndime alpha ne omega, wa havuso noku mashara, wa matatikiro niwa ma maninikizo. ¹⁴ Vena e nfuyauzi ava vasanza ezi zyavaro zavo ye niva wore kuwana e ntukero yo kulya ku cishamu co vuharo mi niva wore ku kavira muzizyi okuya mu mureneñi. ¹⁵ Kunje nekura siyara avambwa, ava vatenda ezi mperemesi za mavivo, ava vashayintika, a vayazi, ava varapera ezi swaniso zoku vezya nizo kuvumba vumba ni vonshe ava vashaka zo vusawana nava vazitenda. ¹⁶ Eme, Jesu, ninda tuma engiroyi lyangu kwako kezya kukuha kezi zintu zo vupaki muma kereke. Ndime o mwisi na matumpira a Dafita, rutungwezi rukevera rwa masikusiku(e rungwe).'' ¹⁷ O Muzya no musheshiwa vokutaye, ''Kezya!'' Mureke ozyu a shuwire ateye, ''Kezye!''Yenshe ozyu ashuwire enyota, mureke akezye, mi nozyu ashaka yenshe, mu mureke aki hindire a menji a vulyo o vuharo. ¹⁸ Ndi amba ku muntu yenshe ozyo ashuwanga a mazywi e ciporofita ca mwaino evuka: Ati nkwena ozyu na weze cimwinya hawo, Nyambe nara muwezera enkozi zi ñoretwa mwayinu evuka. ¹⁹ Mi ati zyumwi na zwisa ku mazywi a mwayinu evuka ye ciporofita, Nyambe nara mutapa ecibbema cakwe caku cishamu co vuharo nica mu mureneñi owu wucenete ezi ziñoretwa mwayinu evuka. ^{20 21} Ozyu a sumuna zinu ezintu ataye, "Eni! Nanga nda kezya nabwangu.'' Amen! Kezye, Nfumu Jesu! E chishemo co Nfumu Jesu cive ku muntu yenshe. Amen.