¹ Mi Agrippa a kuamba kwa Paulusi, " olitabilile." Cware Paulusi aku zyimika e yanja muwilu, Nokutanga okulitabilila. ² ''Ndilishuwire okutaba hawa, Nfumu Agrippa, okuti ye ndili tabilire habuso bwako shunu ke milandu yonshe ya Bajuda; ³ Kakuli ndiwe ozyi hawa ze chizo ne mpuzo ya Bajuda.Mi ndikumbira okute ondi teeze hawa noliketete. ⁴ Ka hawa, a Majuda bonshe bazyi buti ndahali kuzwa ku bwance bwangu mwi naha yangu ni kwa Jerusarema. ⁵ Ni ba ndizyiba kuzwa kuma tangilo mi ba swanela ku zumina ye ninda hara mbwe Mufarisi, aba ba ba tokomera hawa mwi ntumero yetu. ⁶ Hanu ndizyimana hanu nendi aturwa kakuli ndishaka e nsepiso eyi naha Nyambe kube shwetu. ⁷ Kakuli eyii nje nsepiso ye mishobo ye kumi nitobire niya hewa aha kabarapera Nyambe a kamwi na masiku . Cware nkeyiyi nsepo, Nfumu Agrippa ndi nyanswa ku Bajuda. ⁸ Chinji aha muazyara yee mburotu hawa okute ye Nyambe abuse a bafu? ⁹ Ke nako imwi ninda liazyalira ye nditende zingi kazi yendereli ke zina lya Jesu wa Nazareta. ¹⁰ Ni ndatenda ezi mwa Jerusarema. Ninda shumina abangi balumeli muntorongo ke ntumo ya maprisita Bakuru, mi aha ka ba yayiwa, Kandi ba zyimikira amaanja kokuba nyansa. ¹¹ Ni ndaba shandisa hawa muma Synagoge mi kandi ba hambiliza okutee yee ba tuke Nyambe . Kandina kanyeezi kanene hawa mi ndokuba shandisa hawa noku mileneñi yokungi. ¹² Aha kandi ntenda zizi, Ndokuya kwa Damaseka na manta ne ntaero zi zwa kuma prisita a bakuru; ¹³ mi munjira kuko, ha kamwi, Nfumu, ndokubona e muni lizwa kwi wuru eli kali munika kuhita ezyuba mi lyo kubohara kwangu na bakwame abo kandiyenda nabo. ¹⁴ Aho shetu wira hanshi twenshe, ndokushuwa e zywi liamba kwangu mu mushobo we Chiheberu, 'Saure, Saure chinji aho ondi shandisa? Nkukutu kwako o kuraha kumuwayo. ¹⁵ Ndo kuta yee, 'Ndiweni, Nfumu?' O Nfumu a kutaba, 'Ndime Jesu ozyu noho shandisa. ¹⁶ Buke zyimane kamatende; kakuli kowu musebezi shira ndabonahali kwako, okuti yee ndikusundike kuti yee obe o mwika ne mpaki ozyo a paka kezi ozyi kangu hanu nezi kandi kusumwine noku ku sunda nenja ; ¹⁷ Mi mbondi kuhaze ku bantu mi noku bashi fasi aba ndikutuma kwa bo, ¹⁸ ba arure a mensho abo noku zoka kuzwa mukansikwe no kuya mwi muni nokuzwa mu manta a Satani nokuya kwa Nyambe, okuti yee ba wane oku kwatirwa kwe zibbi zabo kwa Nyambe, mi no ku jobora oko ndibaha aba ndibikila he mbali yangu ke ntumero kwangu, ' ¹⁹ Kabulyaho, Nfumu Agrippa kali ni ndakana oku chilila e mpono ze wiru ; ²⁰ Kono kwabena bena kwa Damaseka pili, mi ni kwa Jerusalema, mi no mukati ke naha yonse ya Judea, mi nibe fasi, Ndakutazi ye ba bake noku boora kwa Nyambe, ba tende ezi tendantu zisunda o kubaka. ²¹ Mi nzezi niza reta yee a Bajuda bandikwate mwi tempere mi nokushaka o ku ndiyaya. ²² Nyambe nanditusi mani hanu, mi ndizyimana no kupaka kubantu bulyo naba nene ni kwaazya chimwi kono za ba porofita ne Mushe ezi niba amba yee mbozi tendahare; ²³ Okuti yee Keresite mbwa seheke , hape mbwabe we ntanzi kwi nzuho ya bafu ne kukubuka no ku amba e zywi ku Bajuda ni ve Fasi.'' ²⁴ Paulusi aha mana okuli tabilila, Festus akuta yee koku wongoza, ''Paulusi ,opukite; okuzyiba hawa kwako kukupurumuna.'' ²⁵ Kono Paulusi akuta yee, ''kandipulumuki, ewe o okutekeha Festus; kono ko ku goresa ndiamba mazywi e niti nokuli shonda . ²⁶ Kakuli o nfumu azyi kezi zintu; cware , mi cware ndiliambila nendi lukuluhite kwakwe, kakuli ndizyi yee ezi zintu zaazya kuli zikite; kali kazi tenderwa kwi mbali. ²⁷ Mani muzumina muva porofita Nfumu Agrippa? eme ndizyi yee Muzumina,. ²⁸ 'Agrippa akuta Paulusi, ''Mwinako nfwihi mani owora okundi susueza okutee yee ndibe omu Keresite?'' ²⁹ Paulusi akuta ye ndilapera kwa Nyambe, mwinako nfwihi kapa mwi nako endee, kali ndiwe bulyo, kono naba bandi teeze shunu bonshe, kute babe mbwe ndime, nibaazya oku shuminintwa mwi ntorongo ka mahaka.'' ³⁰ Onfumu aku zyimana, no mubusisi, ne Bernice bulyaho, naba kaba kere nabo; ³¹ Aha ba siya eyii njuwo, Bokutanga oku ambaura muchabo niba lita ye, Ozyu mukwame kwazya ezo atendete ezi zilukera okuta yee afwee kapa akushuminiwa.'' ³² Agrippa akuta Festus,"Ozyu mukwame nana lukuluhi nali kali nali lilira kwa Caesar.''