¹ Yesu akalenjela masua egolo, akasabaga, akahika mujyie jwoobo. ² Doghora bakamuletela aghobyiekire, arare msele egolo, nene Yesu bulya abande edekela lyiobo, Yesu akababiela monto oyyo aghobyie kire, “Nkolo yayyo nehabe ryara mwaniwa, njibaghuigwa ng'adaba jyayyo” ³ Doghora, baandishi bariri bakabuga nkolo ndane yyobo, “Oyyo monto narumanade.” ⁴ Nene Yesu kono namanyate kidemi kyoobo, “Ale mubademeragia bibejagu nkolo ndane jyienyu? ⁵ Kinto kee kibosoboso, ‘Nebugaga,’ jibaghuigwa ng'adaba jyiayyo, ‘Anga nebuga bokoboka ugere?’ ⁶ Ale mumanye ebuga Mwana wa Adam nale nguru nseeno jyieghuyya ng'adaba” akambiela jaja olya oyyo aghobyiekire, “Ema, tola, ebala busele bwayyo, ugere kwa mwayyo.” ⁷ Ndyoo monto oyyo akabokoboka akagera kwa mwehe. ⁸ Kimuhyo bulya kyamubanire, bakadabwa kidemi neryala, bakeshora Mugwe, olya ahere bantu nguru jijyo jingana bobyio.

⁹ Nene Yesu lilya ahetaga eboka gokyio akabana monto amutirirye taryie egolo, abugelagwa Matayo, akamubiela ndohiyya, akagera akamurohya. ¹⁰ Akakolwa bulya amutire kwa mwehe alagere, badosa usuru baneni na balya bale ng'adaba bakaja bakamutyia na Yesu na bantubegeri bwehe.

¹¹ Ndyoo Mabarisayo bulya bakonde, bakababiela Batubegeri behe, “Ale mumanyererya wenyu na balagelaga na badosa ushuru na bantu ba ng'adaba?”

¹² Yesu bulya ojirye, nene akababiela “Monto atiryare atumuneyya sibidari, ale balya barware. ¹³ Nenyie gerai, mukemanyereryie ninjii makala jaja, nkondate marero ti sadaka, mamuna tyatija ebugela bantu bajaregu, ale bantu bale ng'adaba.”

¹⁴ Mugero jojyio batubagereri ba Yohana, bakamutuba, bakabuga, “Ale ninjii eshie na Bafarisayo tuhingaga, ale batubager bayyo boo batihingaga?”

¹⁵ Yesu akababiela, “Balya babugerwe njoboki bakejura boo, mugere julya mwegeri aleho naboo, ale kyaya jijate jye kerigwa Mwegeri wa njooboki ndyoo bakerunela ehinga.

¹⁶ Hati monto aletelaga kiramale kya ngobi ya mbya kwa ngobi ya kala, mamuna gekyo kijiterye kyee haloha ya ngobi, ayyo aborosikire, haburoshoka muno. ¹⁷ Hati bantu batilitelaga dibai ya mbya kwa biriba ya kala nakola babajitela, biriba bibyo bya barijioka na dibai yedeka, na birba bibyo bya gharaghara, ale wajitela biriba byambi kwa biriba byaambya, byatola byionse.”

¹⁸ Gero Yesu bulya akore ababielate bobyio, doghora akeja monto omwe, akamurugumela, akabuga, “Karibiari riolo bobi nabakya, ale enjoo, ujitele kuboko kwayyo egololyie, nene naketola lenge.” ¹⁹ Ndyoo Yesu emire na akagera na bale batubegeri behe. ²⁰ Doghora, mugharisha alenelwalalyielwa lyiehumwa ni ndaghami bilemula ekomi ne ebele, akamujoka kwa suha, akadaba kisabukya ngobi yiehe.

²¹ Mamuna abugire nkolo ndane yyehe nadaba gyoka kisabu kya ngobi yyehe nie nibahola.

²² Yesu akahondoka, akamudoghora, akamubiela, “Haberira karibiari, edekela lyayyo ndibakuhorya,” na ngero eyo eyo wabaka oyyo akahola mugero jojyio.

²³ Na Yesu bulya ahikire kwa monto oyyo, akabana babuna silimbi, na kimuhyio kejurate. ²⁴ Nene akababiela, “Gerai oho, mamuna nan mutana atikire, nerarere gyoka.” Ale wobo bakaseka na bakemenane. ²⁵ Na balya kimuhyo kweyekerigwa, akashiala, akamuyigha kuboko na karibiari wee ne akema. ²⁶ Na kusikelo kwene kukamanyeka hara yonse na nsee yonse.

²⁷ Ndyoo Yesu bulya ahetire eboka gokyio, ngakuri wabalome babele bakamurohya. Bendeleate babugelanate ero lineni, babugate, “Twehelai turere, Mwana wa Daudi.” ²⁸ Ngero Yesu bulya ahikire kwakayya, bantu babyio batibanaga bakeja kwehe. Yesu akababiela, “Mwenedere nikehikya eghaya bobyio?” Bakamubiela, “Byio, Mwegeri” ²⁹ Ndyoo Yesu akabadaba meso jyiobo na akabuga, “Kwa bulya mwedekere banai,” ³⁰ na meso jyiobo jikabana. Ndyoo Yesu akababiela klwa nguru na akabuga “Raberyai rari monto omwe na habe manya bibugu jiiji.” ³¹ Ale bantu baba bakahuma, bakagera kubuga nesegera gusikelo gokyio nsee eyyo.

³² Ndyoo rari Balome babele balya bakore bahumate, doghora, bakaleta monto omwe aribire kania na ale na muhoji kwa Yesu. ³³ Na nkolo mbeju bulya jahumirigwe, monto oyyo nakaghamba, kimuhi kwa bantu kikadeka, bakabuga lityuatiebanekaga bobyio kwa Israeli.

³⁴ Ale Mabarisayo balya bakabuga, “Kwa bakolo ba biryoka abahumya nkolo jibejagu.”

³⁵ Yesu lilya ageraga kughobya mijyie na bimijye, nemanyererya kwa masinagogi jyobo, ne karagerya ekalagala kuholo lya Bwegeri, nehorya birwa na ebola nguru lyonse. ³⁶ Gero abande kumuhyo kwa bantu, akabarera, kwa bulya bakorwe babaghatala, nejaregana, boo ng'ondi jiti na gijori kwe nsema. ³⁷ Nene akababiela batubegeri behe, “Ebuna ndineni, ale bebuna bale bariri. ³⁸ Bobyo ngo ehelai Mwegeri we ebuna, bo bulya atomire bebuna lyehe.”