¹ Gero Yesu bulya ahorokyire taregola, kimuhyio kinemni kika murohya. ² Na doghora, Akaja monto ale bukoma akamurugumela, akabuga, “Mwegeri, wakonda, na wahikya nsabya.”

³ Yesu akasegera kuboko, akamudaba, akabuga, “Nikonde, sera.” Hariri bukoma bwehe akasera. ⁴ Yesu akamubiela, “Doghora, na habe biela monto wowonse. Ale gera, ukebanishe kwa kuhani na ukahumyie sadaka bobulya Musa abugire, ebe biejibe kwabo.”

⁵ Gero Yesu bulya asharire Kapernaumu, akida omwe akamutuba kwehe akamusasama, ⁶ akabuga, “Mwegeri, mutomwa wawa arare kwa kayya, narware naghobyekire, arware muno.”

⁷ Yesu akamubiela, “Nikeja na muhoprye.”

⁸ Oyyo Akida akabuga, akamubiela, “Mwegeri, nie rari tihikere ushale wee yawa, ale wee buga kinto jyoka mutomwa wawa nakehola. ⁹ Kwa mamuna nanie ndee mtomwa ndagharwe kwe egerwa, ndee na sigari jitomaga, nabiela oyyo gera, agera, na oyyo enjoo, ojya, na mutomwa wawa, aghayya bobyo aghayya.”

¹⁰ Yesu bulya ojirye jyene, akadeka na akababiela balya bam, “Urohatyie edekela nimbabielate, tyati ebanaga edekela lingana lele, kwa bantu bonse ba Israeli. ¹¹ Nanie nibabielate, bobulya baneni bakeja babukate kwa ryioba ekela na kwa ryioba eshala, nabo bakemutya na Ibrahimu na Isaka Yakobo kwa Bwegeri wa kwegolo. ¹² Ale bana ba Bwegeri ba muhoma baketebwa moki ndane, na ndsyoo kukekolwa ejura ne bubura magego.” ¹³ Nene Yesu akababiela Jemedari oyuyo, “Gera na ndibe bo edekela lyayyo”, mutomwa wehe akahola gere yene.

¹⁴ Gero Yesu bulya ahikire kwa Petro, akabana na mori ya Petro, ng'ina ya mkehe, arare busele atihikatyie ale jatwe ni ndaghami. ¹⁵ Yesu akamudaba na kuboko, ndaghami jikladyeka, nene akagera, akabagharya milemo.

¹⁶ Na bulya kwabere kubera, bakamuletel bantu baneni, bale muhoji, akabahumya nkolo jibejagu kwekola lyiehe akahorya bonse balya batiriigatyie. ¹⁷ Ebuga lele lihike lilya akala lilya lyabugire Nabii Isaya akabuga “Wo mwene ebare ebolanguru jyieto na ehira birwaru byieto.”

¹⁸ Na yesu bulya abanire kimuhyo kineni, bamughobirye, akababiela tugerei hareyyo lenge lya mai egolo ja Galilaya. ¹⁹ Mwandishi omwe akamugelera na akamubiela, “Mumanyerya nikekurohya kwonse kulya okeyya.”

²⁰ Yesu akamubiela “Murayyombutolaga mabego ndane, na nyonyi jile nyumba jyobo, ale Mwana wa Adamu ati hejitela lubaru lyehe.”

²¹ Unge wa Batubegeri behe akamubiela, “Mwegeri, nie segera gere akarike babaeto.”

²² Ale Yyesu akamubiela, “Ntubagera, haba biryoka biryeke biryoka bibyo.”

²³ Yesu akalenjela mashua batubageri behe bakamurohya. ²⁴ Raberyai, Kukakolwa netirireka likolo mai egolo, na mashua ekabekwa bighari bwa Mai, Yesu nene na rare. ²⁵ Batubageri byehe bakamutuba, bakamubokya bakamubiela, “Mwegeri, tuhonokye eshie, twasira!”

²⁶ Yesu akababiela, “Tii mubaba bobagi, enyie badela tiriri?” Ayyo akagera akabuga lububu lya maiegolo sisai, kukakolwa na lusisu lujaregu.

²⁷ Ale wabalome bakadeka bakabuga, “Oyyo monto wa boo kola mbubu la maiegolo dumwojagia?”

²⁸ Gero Yesu bulya asabagire hareyyo unge nsee ya Bagerasi, wabalome babele bale na nkolo jibeju, bakajaghana nene. Balya babokate beregolo na balya baghairye bubeju muno, rari monto ahabe mungia nkondo eyyo. ²⁹ Na dogghora bakajura rujuru, bakebuga, “Tulenagi wee Mwana wa Mugwe? Ale ujire etutirira gero yyeto etyatihika?” ³⁰ Riolo hale halehu muno ehyo lya ngolobe jineni jisemate.

³¹ Nkolo jijyo jibejagu jigendela jikamusasama na jikamubela “Ikaba watuhumwanya, tuhabe tugere tukashale ehyio lilyo lya ngolobe.”

³² Yesu akababiela, “Gerai!” Bakahuma bakaeshala ngolobe na kono, ehyio lyionse likaro na muno bwelo egolo bamai jikasira. ³³ Balome balya basemire bakaghwa bakagera kwa mujyie nane, bakaekaragerya nebuga byionse na ebuga ekalelya kwa balome balya na bakolo jibejagu naboo. ³⁴ Doghora, Mujyie jyonse jukahuma egera etebela Yesu. Bulya bamubanire, bakamusasama agere ahume mjyie juobo.