¹ “Muhabe elya njooko, nenyie mutumune eleba njooko. ² Mamuna njooko jilyua mulejate jyio mukelebwa, na kilya mgerote, kyio mukegererwa. ³ Kwa njii nobadoghoraga kihuti kilya kila riso lya mulugu wayyuo ale na tereni riso lyayyo. ⁴ Anga ukebiela bo mwondogo wayyo, ng'aba kihumwe kihuti riso ndane lyayyop na kono ole na tereni riso ndane lyayyo wee mwene. ⁵ Munga kubiele wee; runela ehumya eyyo tereni ya riso lyayyo, ndyoo ubane bujaregu ehumya kihuti kya mte ndane kya riso lya mwondogo wayyo.

⁶ Muhabe hanguya sese kilya kiseri, anga angana lulujyienyu bushone bwa ng'olobe bahabe jighanja ghanja nsee ya magolo jobo nehodola ne baboroshola.

⁷ Ehelai, nemnyie mkehebwa. Sorai nenyie mukebana. Ngambai nenyie mkehingolwa. ⁸ Mamuna olya ehelate, nahejagwa. Nene olya asorate, nakebana. Na monto olya akeghamba, nakekihongolwa.

⁹ Anga ng; ale monto oho kwenyu, olya mwenihe ehela mkate akemuha ebwe? ¹⁰ Anga ehela singiri ahebwa ntyanyi? ¹¹ Kwa bobyo, balya mule babeju mujeeha bana benyu bilya bijaregagu, Tii muno ghonio Baba wa kwegolo abahee jajaregagu balya bamwehelate? Rari byionse bilya mukondate mugharigwe bantu, nenyie bagharyei bobyio.

¹² Mamuna byio Torati na Manabii ebugate ¹³ Shala kwenungia mulyangu juriragi, mamuna mulyangu juneni na nkondo nenenagi egerate kwoba na bantu bane ni bashale mulyangu jojyio. ¹⁴ Ale mulyangu juriragi, na nkondo ne ndirangi egerate seryie egolo, na balya bamibanire bariri.

¹⁵ Emaheleni Manabii ja bwerehi, bantu balya bajate bebohire ngobi jya ng'ondi, ale kwa ndane ni mbobwa jibegaju. ¹⁶ Mukemanya kwa ngendelu jyiobo, ale bantu bahaga sabibu kwa mibwa egolo? Anga mtini kwa mibaruti? ¹⁷ Kwa bulya byio na mute jujaregu, jubyalaga tunda jijaregu, na mute jubeju jubyalaga tunda jibeju. ¹⁸ Mute jujaregu jutumune ebyala tunda jibeju, nanga mute jubeju jutibyala tunda jijaregu. ¹⁹ Na mute julya jutibyarire tunda jijaregu jukegebwa netebwa moki ndane. ²⁰ Ndyoo kwa ngendelu jya monto mukejimanya.

²¹ Ti monto oyo na abugate, ‘Mwegeri, Mwegeri,’ akeshiala Bwegeri bwa Kwegolo, ale nolya aghayyatyie bukondwa kilya Mugwe wa kwegolo akondate. ²² Bantu baneni bakembiela nkye eyo, ‘Mwegeri, Mwegeri, tutyaghairye bunabii kwebina lyayyo, nan kwebina lyayyo tukahumya nkolo jibejagu, na kwebina lyayyo tukaghayya bibugu byedekya?’ ²³ Na olya ojagya makalaga jawa, nejaghayagu ²⁴ Kwa bobyo, na olyaomwe ojagya makalaga jawa, nejaghajya akanganigwa na nmonto ale mughara, abokire nyumba yehe egolo lya ebego. ²⁵ Mbura ekarobana, lojin lukaja, lububu lukabubera, lukasega nyumba eyyo ekahabeegwa, mamuna yyobokire egolo lya ebogo. ²⁶ Ale olya monto ojagya ekala lyawa ahabeghayya, akanganigwa na monto egare, obokire nyumba yehe egolo lya musanga. ²⁷ Mbura ekarobana, loji lukaja lububu lukabubera, lukasega nyumba eyyo ekagwa, negwa lyehe likaba lineni muno.”

²⁸ Bulya Yesu asubire makalaga jajyo, kimuhyio kikadeka kwekaragerya lyehe, ²⁹ Mamuna akolagwa amarerate bantu ba singirya jyionse, na tiibo baandishi.