¹ Yesu abokire hekaluni na egere lyehe bamanyerigwe behe bakamgerela emubarisha malengo ja hekalu. ² Alele akabajokerya akababiela, “Ale, mtijobone makalaga jaja jhonse? Nimbabelate, Hati ebwe litakalobaki egolo lya lenge bali ogholwa.”

³ Na bobulya amitirye katika ngita ya muzeituni, bamanyuererigwa behe bakamugerelia kwa faragha na ebuga, “Tubele, makalaga jaja jakehuma lele kitoke kikoba dalili yeja kwayo na kwa suha bwa bulimwengu?”

⁴ Yesu akabajokerya na akababiela, “Obai makini ebuga ahabeja monto akabasasaba. ⁵ Kwoba baneni bakeja kwe ebina liawa. Bakebuga ‘Niye nwo Kristo’ na bakeebapotosha baneni. ⁶ Mukojiya bita na taarifa jya bita. Raberyai muhabeoba na wasiwasi, kuoba makalaga jaja ndazima ehumela. Ale ule suha okoba hati. ⁷ Kwa bulya itongo likoboka dhidi ya matongo jange na mwakorani dhiodi ya mwokorani kukekohoo na jalo na kibodani kya nse ulya hantu jinjeni. ⁸ Ale makalaga jaja jonse nde mrunelelu jwa jwebyala.

⁹ Ndyo bakebahumya kwa bulya mateso na ebabulaga mkesolwa matongo jonse kwa bulya bwebina lyawa. ¹⁰ Ndyo baneni mbakerija na belelana nan mbakesolana boka kwaboka. ¹¹ Bekorani baneni berei bake jhubuka ne ebaremga baneni. ¹² Kwa bulya baryalate mbukerasa, okondana bwa baneni ehola. ¹³ Alele olya akevumilia mpaka mwisho, nerashigwa. ¹⁴ Lele ekalaga lya Mugwe (Injili) ya Mwegeri nekahubiriwa katika nseeno jonse ekola bushuhuda kwa Matongo jonse. Ndyo mwisho jukehika.

¹⁵ Kwa bobyo, esola liliharibire, libugire na Berago Daniel lijemire hantyu hajaregu (asomate na amanyate), ¹⁶ Ndyo baleho Yuda arohe kwa ngitegolo. ¹⁷ No alya aleho kwegolo lya nyumba ahikya ehoroka nsee etola kinto kilya kyonse eboka ndane ya Nyumba yehe. ¹⁸ Nene ulya aleho moi habe ejoka etola ngobi jihe. ¹⁹ Ale ole wehe ulya ale mwoma na bale bonkotye katika nkya Jijyo. ²⁰ Ehelai ebuga eheha lyenyu kuhabeoba ngata ya muyaga anga nkya ya sabato. ²¹ Kweoba kukekolwa na dhiki ekolo bwebulya itiandi kolwa eboka ebwa kwa nsee hadi lilyo. Na hati itimune kolwa lenge. ²² Kola nkya jijyo jihabedikohigwa, ati rari alehonokigwa. Ale ale kwa bulya ja Bahonokigwa kya jijyo zikedikohigwa.

²³ Kisha ikekolwa monto ulya wonse ababielate ‘Raberyai, Kristo ale oho!’ anga ‘Kristo aleho kokyo’ ahabe edekere makalaga jaja. ²⁴ Kwekolwa Bakristo bwa Bwerehi na Banabii bwa Bwerehi bakeja na ebanisha eng'asa jikulu na maajabun kwa bulya jya kupotosha, kola ebaleya yakerania ati na bahonokigwa. ²⁵ Raberyai, nibabagharerya kabla ja makalaga jaja yabokire. ²⁶ Kwa rilyo, yoba babielei, ‘Kristo ale kwa bwelo’ muhabe gera kokyo kwa bwelo. Anga, Raberyai kokyo ndane ja nyumba emai makalaga jajo. ²⁷ Kola bulya radi ibashagia ebokela rioba eshala na ebasha hadi rioba eshala, ndyo ikeoba ejan kwa Mwana wa Adamu. ²⁸ Halya honse ule mzoga, kokyo ndyo Tai bakekusanyika.

²⁹ Ale mara anamuina ya dhiki nkulu ya nkya jilya. Ghari ikegitelwa kirimamu mweri juti mune humya mwanga, njoto jikegwa eboka kwegolo, na nguru jwa kwegolo jikebuolana. ³⁰ Ndyo eng'asa ya Mwana wa Adamu ikebanekana kate na makabila jonse jya nsee bakejurera akemubana Mwana wa Adamu eja katika mawingu jya kwegolo na nguru na ndiagha ikolo. ³¹ Akebatoma Malaika behe kwa ero ekolo na Tarumbeta, nabo bakebamogonia hamwe bahonokigwa behe eboka hantu enya jya nsee eboka mwisho umwe wa egolo hadi ungwe.

³² Emanyeryei somo ebokana na mte mtini. Mara kikya eto bulya bikemela na eboka mainane muje, ebuga na ghari nibahikela. ³³ Bobyo byo, mukebana makalaga jaja jonse ukondatwe mumanye ebuga ebahikela hadinko na mulyangu. ³⁴ Yasaba nimbabielate lubialo lolo lutimune eheta, hadi makalaga jonse jaja jakekolwa jabahumela. ³⁵ Egolo na nsee jikeheta, ale makalajawa jatimune eheta rari kala.

³⁶ Ale egerania nikyelya nagarailya hati monto akemanya, ejagahaMalaika ba Kwegolo anga Mwana, ulya Baba nene mwene. ³⁷ Kola bulya mwale katika nkya jya Nuhu, mbyo ikeoba ejan lya Mwana wa Adamu. ³⁸ Kwekolwa nkya jijyo kitiandi eja gharika bantu bale balagetate na enywa akwejate, ekwebwa hadi nkya ilya Nuhu ashare Katika Safina, ³⁹ Na batiandi kinto kilya kyonse hadi gharika bulya ibajire esomba boonse-mbyo ikeoba ewja Mwana wa Adamu. ⁴⁰ Mbyo bantu babele bakekolwa kwa moi, umwe aketolwa na omwe akehabwa suha. ⁴¹ Wabakaka babele akekolwa ashejate hamwe-umwe aketolwa unge nakehabwa suha. ⁴² Kwa bobyo ebai meso kwa bulya mutije ninkya kee olya akeja Mwegeri wenyu. ⁴³ Ale mumanye ebuga, yopba jaghamba ulya ale nyumba aleamanya ni ngara eho Mworyi jubalejija ubarye wamitya atibale edekela nyumba yehe na evamiwa. ⁴⁴ Kwa bobyo, obyo mukondatwew oba tayari kweoba Mwana wa Adamu akeja katika ngara muhabehikeranya.

⁴⁵ Bobyo ninde alige Mgwanu, mtomwa ale na bughara, ulya Mwegeri wehe amuhere bwegeri egolo ya bale katika nyumba yehe ebuga abane belya kwa ngara ugwasirye. ⁴⁶ Abarikiwate mtubegeri oyo jaghamba wehe akemukola aghayatye bobyo ngara eja. ⁴⁷ Nsaba Nimbabielate ebuga jaghamba akemugitela egolo ya kila kinto kihye. ⁴⁸ Ale kolai mtubegeri mubejuabuga nkolo nane jaghamba wawa abagitela; ⁴⁹ Na ake anza ebabulaga batubegeri behe na akalya na ebogita bibnogiti. ⁵⁰ Jaghamba wa Mtubegeri oyo akamanya katika nkya utiimwanyate na katika gare ulya utiimnanate. ⁵¹ Jaghamba wehe akemukeba biala bibele na emugitela katika nafasi emwe sawa na Banafiki, ulya kulya hale na ijurate na kussha magego.