^1-3 Rari bulya basungurere Yerusalemu nehika Bethfage, gategate kangita ka mizeituni, ndyo Yesu akatoma batubageri behe babele akababiela, “Gerai mungore hika mujye jojyio mudogharate, na mukeba ndikela mumitingole na Mwanihe; batingolei mudetele. Na monto ababorya kinto, bugai Mwegeri najikondate, na nakebajokya, na monto oyo mara imwe akebaruhusu mumulete hamwe nue.”

⁴ Jaja naboo jabahika ebuga ekala lilyalyabugirwe munabii, abugire, ⁵ “Belai Mwanabaka sayuni, ‘Doghora mwekorani wayyo ajate kulya ole musisu nene ebarwe ni ndekele, nindekele Mwana wa ndikele.’”

⁶ Batubageri babyio bakagera kokyo, bakaghaya bulya Yesu ababerire. ⁷ Bakeleta ndikele yene na mwenihe bakajitela nanga egolo lyehe nene akamutya egolo lyiehe. ⁸ Bantu baneni bakemuhyo bakala ngobi jyobo nkondo; bange bakeba bitemi bya mite, bakajala nkondo. ⁹ Na kimuhyo kilya kya hetere, na balya ba barohatye, bakarenela eghuja nebuga, “Hosana Mwana wa Daudi! Nwuo amisirwe woonyo ajire kwa ebina lya Mugwe. Hosana egolo lya Kwegolo.”

¹⁰ Na Yesu lilya asharire Yerusalemu, mujyie jwonse jukasina, bantu bakabuga, “Ni no oyyo?”

¹¹ Kimuhyo kikabuga, “Oyyo nolya Munabii, Yesu wa Nazarethi ya Galilaya” ¹² Mbyo Yesu akashala ndane ndane ya Hekalu lya Mugwe, akabuguza bonse balya bagolaga negorania hekalu ndane, akagharyola meza ja bajurusi na horiga jyobo jilya bamuterie bagoranie nagunku. ¹³ Akababiela, “Yaandekire bobyio, ‘Nyumba yawa niehela gioka,’ aleenyie mubanighaya kaghojeka bebi.”

¹⁴ Na balya batibanaga bakamutuba na balya baghobyekire bakagera kwa Hekaluni bakahoorigwa.

¹⁵ Naboo bakolage ba Makuhani na Baandishi bulya babande bibugu bilya bikolage ahayatye na bana bakamughujela kwa Hekaluni, bakabuga ‘Hosana Mwana wa Daudi,’ bakaregya: ¹⁶ Bakamubiela, “Nwojure baba bulya babugate?” Yesu akababiela, “Ale mutyati esoma na kwa mania ja bana bariragi na bokate ghorana jibemela.”

¹⁷ Akabahaba akahuma mubale jwa mujye ayya kwa Bethania akalala kyio.

¹⁸ Na gutune lilya ageraga kwa mujye akojya jalo. ¹⁹ Akabana mute jumwe bubale jwa nkondo akagera halya jule atyati ebana kinto ale manyeka jamute jwuoka, akabuga, “Juhabeghayya tuna rari kieno na kala.” Na mute jukarunela eoma.

²⁰ Bantubageri bulya babande, bakadeka bakabuga, “Haimutego juboma tii kala jyolo bobyio?”

²¹ Yesu akabajokerya akababiela, “Edekelai nibabielate, mwakolwa needekela, muhabekolwa muralate, mukeghaya tilele lya mute gyioka na rari mukabiela ngita eno ekera oho ukatebwe gokyio kwa mai egolo lighaerekire. ²² Na jalya mukekolwa mwehelate ne kolwa mwedekere mukejahebwe.”

²³ Na bulya asharire Hekaluni, bakolagi bamakuhani na balakolo babantu, bakamutuba lilya amanyereragia bakamubiela, “Ni kwa amri yau oghayate bobyio, na ninoo akuhere amri enno?”

²⁴ Yesu akabajokerya na akababiela, “Nanie nikebaborya ekalaga limwe; nenyie mwanjookerya, nanie nikebabiela kwa amuri yau ghayate makalaga bobyio. ²⁵ Bubatizo bwa Yohana bubokire koo? Bubokire kwegolo anga kwa bantu?” Bakaborania bo kwa bene, babuga, twabuga bubnokire kwegolo lee, ‘akitubiela tii ryolo mutyandi emwendekela?’ ²⁶ Na twabuga ‘bubokire kwa bantu,’ turalate kimuhyo, mamuna bantu boonse baje Yohana Munabii.” ²⁷ Bakajokerya Yesu bakabuga, “Tutije” Akababiela byo, “Nanie tumune babiela kwa amuri kee ghayyatyie jaja.

²⁸ Ale, enyie mubanate boo? Monto omwe ale na bana babele; akatuba oyyo warigisasi, akamubiela, ‘Mwaniwa, nkyeno gera kaghayye milemo kwa mugondegolo jwa mizabibu.’

²⁹ Akajookya akabuga, ‘Nigerate,’ baba, akahabagera.

³⁰ Akatuba na wakabele, akabuga boobulya warigisasi. Nene akantikonde, ‘Hange Hariri,’ akarigoka akagera. ³¹ Nimboratye? Kwa bobyo babele noo aghairye kilya esee akonde?” Bakabuga, “Nolya wakwanza.” Ndyo Yesu akababiela “Edekelai edekelai ni babielate, Badosa ushuru na balya bageraga kuhenjwa bakeba hetela bushone eshala kwegolo. ³² Kwa bulya Yohana ajire kwenyu kwa nkondo ya Nsaba, enyie mutyandi emwedekela, ale badosa ushuru na balya bahe njagwa bakamwedekela, neenyie bulya mwabande mutyandi erigoka mumwedekele.

³³ Tegeryai mwanganganu jiunge, Hale monto ale na Nyumba, nene ale na mugonda juhurere mizabibu, akalighobyalubagu, akasima kisimiri ndane yehe, akabooka idari, bamilemo balihelage, ale akayya sabari. ³⁴ Mugero jweebuna jwahika, akatoba batomwa bwehe kwa bamilemo bakahebwe kyala bababuna. ³⁵ Naboo bamilemo babyio bakadaba batomwa bayyo, oyyo bakamutura, na oyyo bakamubulaga akakya, oyyo bakamutura kwa mabwee. ³⁶ Akatoma lenge batomwa bange baneni bating'ana balya ba bushone bakabagharya bobyiosei. ³⁷ Mugero jwahika mwegeri oyyo akatoma Mwenihe kwoobo, abugire, ‘Bakesoka Mwaniwa.’

³⁸ Ale bamilemo bene, bulya babande Mwana wene, bakakalaga bo kwobo, ‘Oyyo nwuo mugabi, ryolo ngo tumubolagie, tuhire bugabi bwehe.’ ³⁹ Bakamudaba, kamwekerya mugondegolo jwa mizabibu bakamutaa kwa kaane baka mubolaga akakya. ⁴⁰ Riryolo aje Mwegeri wa mugonda jwa Mizabibu, akebagitabo bamilemo bene?”

⁴¹ Bakamubiela, “Akebabolaga bubeju balya babeju behe, na mugonda jwa muzabibu akelehwa milemo bange, balya bakemuleha tunda kwa Mugero jwehe.”

⁴² Yesu akababiela, “Mutyandi esoma makalaga jalya jandekirwe, ‘Ebwe lilya lilegirwe maghundi, lilyo libaba ebwe lilya lya mubale, ekalaga lele libokire kwa Mugwe, nalyo ndyendekya meso egolo jeto?’

⁴³ Kwa bobyo nibabielate, Bwegeri bwa Mugwe bukekerigwa kwenyu, na likehebwa mujye julya jukebyala tunda jyiehe. ⁴⁴ Nene olya akegegwela ebwee lelyo akesebesebwa nebunieka bunieka, na olya woonse likemugwela-likemusha aseka.”

⁴⁵ Bakolageba makuhani na Mabarisayo, bulya bojire mwangonio jwehe, bakamanya boo babugatwe. ⁴⁶ Na boo bulya asorore, bwemudaba, bakarira kimuhyo, mamuna baje ebuga Yesu ni Nabii.