¹ Mumanye murhakag'iyerekana ebijiro binyu binja embere z'abantu mpu mubwone, bulya mukajira ntyo, murhakabona luhembo emwa Sho w'empingu, ² Lero nka okola waha omukenyi akantu, orhabuhaga mushekera, nk'oku endyalya zijira omu sinagogin'omu bishagala, mpu lyo abantu bazikuza. Okuli mmubwire, bahabirwe mira oluhembo lwabo. ³ Wehe, nka waha omukenyi, okuboko kwawe kumosho kurhamnyaga eci okulyo kwajira. ⁴ Ntyo ehi waha omukenyi hirhamanyibagwa; na Sho obona ebifulisirwe, akugalulirahyo.

⁵ Nka mwashenga, murhabaga nka ndyalyazisima okushenga bwimanga omu sinagogi n'omu mashanganizo g'enjira, mpu lyo zibonwa n'abantu. OKuli, mmubwizire, bahabirwe mira oluhembo lwabo. ⁶ Wehe, nk'okola washenga, oje omu mwawe, na hano wamayigala olumvi, oshenge Sho omu kahwenyenye, na Sho obwine omu kahwenyenye, akugalulira. ⁷ Kuziga nka mwashenga, murhaderhaga binji binji nka bapagani, abamanya mpu okuderha binja kwarhuma bayumvibwa. ⁸ Mashi, murhabashushaga; Sho ayishi ebi mulagirirekwo embere mumuhune. ⁹ Alagi oku mwakashenga: Larha, oli omu mpingu, Izino lyawe likuzibwe, ¹⁰ Obwami bwawe buyishe, Obulonza bwawe bube en'igulu nk'empingu. ¹⁴ Kuziga mukababalira abantu amabi bammujirire, Sho w'empingu naye anammubabalira. ¹⁵ N'akaba murhababaliri abantu, naye Sho arhammubabalire ebyaha binyu.

¹⁶ Nka mwacishalisa, murhabaga burhe nka ndyalya, ezicijira eminyuga ebusu, mpu lyo abantu babona oku bacishalisize. Okuli mmubwire, mira bahabagwa oluhembo lwabo. ¹⁷ Ci wehe, nka wacishalisa, ohebe amavurha omu irhwe onashuke obusu bwawe; ¹⁸ olek'ibonwa n'abantu nk'ocishalisize, ci obonwe na Sho omu bufunda, na Sho odwirhe abona eby'obufunda, akugalulira.

¹⁹ Murhacibikizagya omuhako en'igulu, emunda engisha n'enundo zaguhalagula, n'emunda ebishambo birhula enyumpa binazimba. ²⁰ Ci mucibikire amahirhi empingu, emunda engisha n'enundo zirhahalagula, n'aha ebishambo birharhula nyumpa birhanazimba. ²¹ Bulya aha omuhako gwage guli ho n'omurhima gwage guba.

²² Akamole k'omubiri gwage, lyo isu lyawe. Isu lyawe likaba liri ligumaguma, omubiri gwawe gwanaba omu bulangashane. ²³ Ci isu lyawe likaba libi, omubiri gwawe gwoshi gwanaba omu mwizimya. Akaba akamole kawe kalimwizimya, mwizimya muci kankaba!

²⁴ Ntaye wankakolera bami babiri: bulya anashomba muguma, azigire owundi; erhi ashimbe muguma, anene owundi. Murhankahash'ikolera Nyamuzinda n'ebirugu.

²⁵ Co cirhumire mmubwira: MUrharhanyagya oku buzine bwinyu, mpu bici mwalya, n'oku mubiri, mpu bici mwayambala. Ka obuzine burhalushiri ebiryo, nisi erhi omubiri, ka gurhalushiri emyambalo? ²⁶ Rhengi mulole orhunyunyi, oku rhurhamira rhurhanashalula, ciru rhurhanahaka; na Sho w'empingu ye orhulisa. Mashi! Ka murharhulushiri? ²⁷ Ndi muli mwe, ciru ankahangaza, wankahash'iyushula ikoro liguma oku buli bwage?

²⁸ Cirhuma murhanya oku myambalo? Lolagi obwaso bw'omu mashwa oku bumera: burhahinga burhanaluka. ²⁹ Mmubwizire oku ciru Solomani omw'irenge lyage lyoshi, arhayambalaga nka hyaso higuma muli rhwo. ³⁰ Mashi! Nnamahanga akayambika ntyo ehyasi hy'omw'ishwa, ehiriho ene n'irhondo erhi hyakwebirwe omu muliro; banyamubula-bwemere, ka arhammjirire okulushire aho! ³¹ Murharhanyagya n'okuderha, mpu: “Bici rhwakalya, erhi bici rhwanywa, erhi bici rhwakayambala?' ³² Ebyo byoshi, bapagani babilonza. Kali Sho w'empingu ayishi oku mubuzire ebyo byoshi. ³³ Burhanzi mulonze Obwami n'obushinganyanya bwabo, n'ebyo byoshi mwayish'ibiyushulirwa. ³⁴ Kuziga murhakag'iciyirha oku b'irhondo: olusiku lw'irhondo lwacilongeza lwone. Ngasi lusiku n'amabi galwo.