¹ “Obwami bw'empingu bushushine na nnakâ wazûkaga muceracera mpu aj'ilalika abamukolera omu lukoma lwage lw'emizabibu. ² Erhi aba amalagana n'abakozi oku abaha igerha liguma oku lusiku, abarhuma omu lukoma lwage. ³ Erhi amashî gakala, mpu ahuluka, alangira abandi ba bwarhire oku irango buzira mukolo. ⁴ Anacibabwira, erhi: “Gendi ninyu ekwani, nayish'immuhâ oluhembo lummukwanine.” Nabo banacigendi kola. ⁵ Ashub'ihuluka erhi izuba liyimanga n'erhi izuba liyerera, ashub'ijira nk'oku ajiraga burhanzi. ⁶ Erhi enkafu zirya ebizîzî, ashub'ihuluka, ashimana abandi bayimanzire, ababwira erhi: “Kurhi mwayimangaga omulegerege gwoshi buzira mukolo?”

⁷ Banacimushuza, mpu: “Bulya ntaye warhulalisire.” Anacibabwira erhi “Ji ninyu ekwani.”

⁸ Erhi kuciba bijingo, nnakâ abwira omwambali, erhi: “Hamagala abakozi, obahê oluhembo, orhangirire oku bazinda kuhika oku barhanzi.” ⁹ Erhi balya barhonderaga enkafu zirya ebizîzî bayisha, bahâbwa ngasi muguma igerhaa liguma. ¹⁰ Erhi abarhanzi baciyisha, bamanya mpu bahâbwa ngasi muguma kulusha abazinda, ci nabo bahâbwa ngasi muguma igerha. ¹¹ Obwo bakaz'iliyanka erhi banaci duduma banagayire nnakâ.

¹² Bakacidesa, mpu: “Ewani! Aba ba nyuma kasanzi katya kône bakozire, wanarhuyumamanyanya nabo, rhwe rhwanarhangiraga sezi rhwa rhindibuka oku izuba n'idurhu mushi gwoshi.”

¹³ Lero naye erhi ashuza muguma muli bo, amubwira, erhi: “Yaga mwira wani, ntakuzimbiri: ka lirhali igerha liguma rhwalagananaga?” ¹⁴ Yanka ehyawe, ogende. Nalonza okuha owinyu wa buzinda nka we.

¹⁵ Ka ntankajira ebyani oku nalonza? Nisi nkaba isu lyawe lyo libi bulya ndi mwinja?” ¹⁶ Ntyo kwo abazinda bayish'iba barhanzi, n'abarhanzi babe bazinda. (Bulya abahamagale bali banji, ci enshagi ziri nyi.)

¹⁷ Erhi akola arheremera e Yeruzalemi, arhôla balya Ikumi-na-babirhi bône bône, n'erhi bakola bali omu njira, ababwira, erhi: ¹⁸ “Rh'ono rhwarheremera e Yeruzalemi; obwo Mwene-omuntu bahânwa omu maboko g'abajinji n'abashumuka b'ihano: bamutwire olufu. ¹⁹ Bayish'imuhâ abapagani mpu bamushekere, bamushurhe emikoba banamubambe oku musalaba; n'olusiku lwa kasharhu ayish'ifûka.”

²⁰ Oku handi nnina wa bene Zebedeyo anacimujaho bo n'abagala, amuharâmya, anamusengerera akantu. ²¹ Naye anacimubwira, erhi: “Bici walonza?” Amushuza, erhi: “Abana bani aba oku bali babiri; orhegeke babwarhale omu Bwami bwawe, muguma ekulyo kwawe, owundi ekumosho.”

²² Yezu anacishuza, aderha, erhi: “Murha manyiri ebi muhunyire. Ka mwankhash'inywa omu kabehe nayish'inywa?” Banacimubwira, mpu: “Rhwanahasha.”

²³ Anacibabwira, erhi: “Omulengo gwani gwôhe mwagunywa, ci okubwarhala ekulyo kwani erhi ekumosho, arhali nie nammuhekwo, ci Larha okuha abakurheganyize.”

²⁴ Erhi balya lindi ikumu liyumva okwo, bakunirira balya babo babiri. ²⁵ Okuhandi Yezu anacibahamagala hofi naye, ababwira, erhi: “Muyishi oku emwa abapagani, abami banabayereke obuhashe bwabo, n'abakulu obukulu bwabo. ²⁶ Ci arhali kwo byaba ntyo muli mwe; owalonzi'iba mukulu muli mwe, acijire murhumisi winyu; ²⁷ n'owalonz'iba wa burhanzi muli mwe, acijire mwambali winyu; ²⁸ Nk'oku Mwene-muntu arhayishaga mpu akolerwe, ci akolere abandi, anahâne obuzine bwage mpu lyo acungula banji.”

²⁹ Erhi bacirhenga e Yeriko, nyamugege w'abantu amukulikira. ³⁰ Ho n'aho mihurha ibiri yali ebwarhire oku njira, yayumva oku Yezu wagera; yanacihamagala, yaderha, erhi: “Muciza w'abantu, Mwene Daudi, orhubêre obwonjo!” ³¹ Kalya katu k'abantu kanacikaz'iyikalihira mpu ehulike. Lero yône yanaciyâma, yalushisa, yanaderha, mpu: “Muciza w'abantu, Mwene Daudi, orhubêre obwonjo!”

³² Obwo Yezu anaciyimanga, abahamagala, anababwira, erhi: “Bici mwalonza mmujirire.” ³³ Banacimushuza, erhi: Muciza, nti nirhu rhubone!” ³⁴ Okubundi Yezu anacigwarhwa n'olukogo, abahuma oku masu gabo: ho na halya babona, banamukulikira.