¹ Ago mango Yezu agera omu mashwa g'obulo, lwali lusiku lwa sabato, bulya Abanafunzi bal'ishalisire baja batwa emihuli y'obulo bana hulumulira ekanwa. ² Abayahudi babona eco, bamubwira, erhi: “Ala oku Abigirizibwa bawe bali bajira ebirhankajirwa olusiku lw'e sabato?”

³ Ci Yezu abashuza, mpu: “Ka murhasomaga oku Daudi ajiraga erhi ashalika n'abo bali boshi. ⁴ Oku ajaga omu nyumpa ya Nyamuzinda, alya emigati yal'irhalwirwe mpu ya Nyamuzinda, arhanal'ishinganine okuy'irya, ciru n'abo bali boshi nkaba abadahwa bône ⁵ Ngahi murhasomaga omu marhegeko oku abadahwa ba gomîre olusiku lwa sabato omu lurhamba barhac'iyagirizagya? ⁶ Nna mbabwizire, oku aha hali bintu binji bilushire olurhamba ⁷ Erhi ankaba mumanyire, ebidesirwe, mpu: “Nndozize olukogo ahali h'entulo, murhali mwatumuza abarhali kw'ishembo. ⁸ Bulya omwana w'Omuntu ye mukulu w'e sabato.”

⁹ Erhi arheng'aho Yezu ayingira omu sinagogi. ¹⁰ Omwo mwali omuntu wali huhire okuboko. Badosa Yezu, erhi: “Ka bihangwirwe oku fumya olusiku lw'e sabato?” Bâli lonzize oku mulega.

¹¹ Abashuza, mpu: “Ndi mulimwe w'ankaba n'ecibuzi ciguma cina rhogere omu mwina olusiku lwa sabato arhana ci kulule acirhenze omu mwina? ¹² Gurhigi omuntu arhalushiri e Cibuzi! Bihangwirwe okujira aminja lusiku lwa sabato.” ¹³ Anac'ibwira oyo muntu, erhi lambula okuboko kwawe, akulambula kwa yam'ifuma kwaba nk'okwabo. ¹⁴ Abafarisayo bahuluka baj'irigi ly'oku banka muheza ¹⁵ Ci kwone Yezu ababona, aja kuli nabo. Olubaga lwa mushimba. Afumya abalwazi boshi. ¹⁶ Abahanza oku barhamulangulanaga omu bantu. ¹⁷ Lyo ebi omulebi Isaya aderhaga bihikirira. ²⁰ Arhakavuna ishanga livungusire, arhana kazimya olutambi luyasire ahikirire okukolesa okuli kuhima ²¹ N'olubaga lway'ishi langalira izino lyage ²² Ba mulerhera musire muguma w'omuhurha na ciduma amufumya kuhika eco ciduma ca kaderha n'oku bona. ²³ Olubaga lwoshi lwa somerwa, bakaderha, mpu: “C'ankaba oyu ali Mwene Nyamuzinda.”

²⁴ Abafarisayo erhi bayumva ebyo baderha, erhi: “Kuli nk'oku izino lya Belzebuli ali akaga abazimu bulya ye mukulu w'emizimu.”

²⁵ Bulya ali manyire entanya zabo, ababwira, mpu: “Obwami nka bwankac'igabamwo kabiri, erhi bukol'ihera. N'ecishagala kandi erhi nyumpa nguma erhi bankakumirana, barhankalama. ²⁶ Nka Shetani ankahimva owabo, erhi amac'itwamwo kabirhi, kurhigi obwami bwage bwa nkalama? ²⁷ N'erhi ankaba nndi nakaga abazimu kugerera Belzebule, abana binyu nabo oku njira nci baka bakagaga? Co cirhumire abo bayishi batwira olubanja ²⁸ Ci erhi ankaba Mûka gwa Nyamuzinda gwo nkaga mw'abazimu, obwami bwa Nyamuzindq bwa bayishire.

²⁹ Kandi, gurhi omuntu ankayingira omunyumpa y'omuntu w'emisi n'okuhagulamw'ebyage buzira okurhang'imushweka? Abuli hagula omunyumpa yage.

³⁰ Eye rhurhali kuguma erhi anshobire n'orhali akungiza haguma na nani erhi ali ashandaka.

³¹ Co cirhumire mmbabwizire oku ngasi caha na ngasi kulogorha abantu bana babalirwe, ci owalogorhe enyanya lya Mûka arhaka babalirwa. ³² Ngasi owa nkaderha Mwene-muntu kubi ay'ishi babalirwa okw'eco; ci ngasi owa nkaderha Mûka Mutagatifu kubi arhakababalirwa okw'eco omu agano mango n'amango gayisha.

³³ Kandi ojire omurhi okuguli mwinja n'amalehe gagwo minja, erhi oshereze omurhi n'amalehe gagwo, bulya omurhi gumanyirwa oku malehe. ³⁴ Cibusi c'enjoka, gurhi mwankaderha ebintu binja mwe bantu babi? Bulya ebiyunjwire omu murhima byo biderhwa omu kanwa. ³⁵ Omuntu mwinja anakarhenza obwinja bwage omu muhako gwage mwinja, n'omuntu mubi anakarhenza obubi bwage omu muhako gwage mubi. ³⁶ Mmbabwizire oku olusiku lw'okutwa emanja, ngasi muntu ayish'idosibwa ebiyerekire ebinwa akag'iderha. ³⁷ Bulya kugerera ebinwa byawe wayish'iganjirwa okuli, n'oku binwa byawe wayish'ihanwa ³⁸ Lero Abandisi n'Abafarisayo baderha mpu: “Mwigiriza, rhucifinjire rhubone oku wajira ebisomerine.

³⁹ Abashuza, erhi: “Cibusi cibi na ca bugonyi, muli mwahuna ebisomerine, nta cindi cisomerine mwa jirirwa, kulusha cirya ca Yona. ⁴⁰ Bulya nkakulya Yona qjirqgq nsiku zisharhu, budufu n'omushi omunda y'e nfi nene; kwo n'okwo Mwene-muntu ayish'ijira nsiku zisharhu budufu n'omushi omu kuzimu. ⁴¹ A bantu b'e Ninawi bayish'ifûka olusiku lw'okutwa emanja haguma n'eci cibusi bana bahânise bulya bahungamire ebyaha byabo erhi bayumva enyigirizo za Yona. N'obu aha hali okulire Yona. ⁴² Omwami-kazi w'e Midi ayish'ifûka kuguma n'eci cibusi; ana citwire olubanja oku bahabusire bulya arhenzire omu mpande z'obuzinda bw'igulu mpu ayumve obwirhegereze bwa Sulemani; na hano haligi okulire Sulemani.

⁴³ Nk'omuzimu ankarhenga omu muntu anaje omu mpinga aj'alonza aho arhamukira arhahabone, ⁴⁴ ho n'aho anaderha erhi, nnagaluka omu nyumpa yani na rhengagamwo, na hani ahika ashimane eri ntyo, eri nkubule, muli n'eminjihizo. ⁴⁵ Ana ci gendera, arhole babo bazimu nnda bazibu kumulusha baje omu eyo nyumpa, bagandazemwo, n'obworhere bw'oyo muntu bube bubi kulusha oku âli. Kwo byanayish'ibera eci cibusi cibi.”

⁴⁶ Oku Yezu aciri aderheza olubaga, alaga! Nnina na bene-wabo bali yimanzire ahambuga, bali balonza oku mudesa. ⁴⁷ Muntu muguma amu bwira, erhi: “Ala nyoko na bene-winyu bali aha mbuga, banali balonza oku kudesa” ⁴⁸ Ci kwone Yezu ashuza oyo wakag'imubwira ntyo, erhi: “Indi nyama na bene-wirhu bo bandi?” ⁴⁹ Ashonga abigirizibwa bage okuboko, aderha, erhi: “Alaga nyama na bene-wirhu. ⁵⁰ Bulyq owajira obulonze bwa Larha oli omu mpingu, oyo ye mwene-wirhu, mwali-wirhu na nyama.