¹ Erhi Yezu aba amayigiriza abanganda bage ikumi na babiri ezo nyigirizo, arhenga aho, aja ahanûla n'okuyigiriza omu bishagala by'omu cihugo.

² Erhi Yowane Mubatiza aba akola ali omumugozi, ayumva baderha ogw'emikolo ya Kristo Ago mango amurhumira baguma b'omu baganda bage mpu bamudosa mpu: ³ “Ka w'olya wayishe erhi rhulinde owundi?”

⁴ Yezu abashuza erhi: “Mugende mushambalire Yowane ebi mwanyumvire n'ebi mwabwine: ⁵ Emihûrha ekola eri yabona, n'ebirema bikola biri byalambagirha n'abashomyo bali bashukulwa, n'ebihuli biri byayumva, n'abafire bali bafûka, n'Emyanzi y'Akalembe eri yayigirizibwa oku bakenyi. ⁶ Ali w'iragi omuntu ompira kw'obwemere!”

⁷ Erhi abo baganda ba Yowane bagenda, Yezu arhondera okubwira olubaga ogwa Yowane Aderha erh: “Bici mwal'ijir'ilola kwo? Ka nanga? ⁸ Bicigi mwali mujir'ilola kwo obwo? Ka muntu oyambirhe emyambalo minja minja? Cikwone abayambirhe emyambalo minja minja bali omu mw'abami. ⁹ Bicigi mwal'ijir'ilola kwo obwo? Ka mulêbi? Mmubwizire nti oyo ye olushire omulêbi. ¹⁰ Bulya Yowane ye Amandiko gadesirhe ogwage mpu: Nnâmahanga adesire erhi: Ntumire entumwa yani embere zawe ekurheganyize enjira.

¹¹ Okuli okuli, mmubwizire okw'omu kagarhi k'abantu, harhasag'iba okulîre Yowane Mubatiza. Cikwone oli murho bwenene omu Bwami bw'e mpingu, yeri mukulu kulusha oyo Yowane ¹² Kurhenga amango Yowane Mubatiza akag'iyigiriza kuhika buno Obwami bw'e mpingu kurherwa burherwa, n'abo baburhera, kulonza balonza okubunyaga. ¹³ Amarhegeko ga Musa n'abalêbi badesire ogw'obwo Bwami kuhika oku mango ga Yowane. ¹⁴ N'erhi ankaba mulonzize okunyemera, Yowane ye y'olya Eliya waderhagwa okw'ayisha. ¹⁵ Yumvi bwinja akaba mugwerhe amarhwirhi g'okuyumva.

¹⁶ “Nndi nankahasha okugerera kwa'abantu b'omwimo gw'ene? Bashusha abana batamire okw'irango banali bayakûzanya mpu: ¹⁷ Rhwamuzihîre akarhera n'ensirimbi nti mubisâmire, cikwone murhasâmire! Rhwabanzire endûlu, cikwone murhâlasire! ¹⁸ Bulya Yowane ayishire, arhâlyaga arhânanywaga idivayi, baderha mpu: Ali kw'omuzimu! ¹⁹ Nani nie Mwene-Muntu nayishire nandye n'okunywa cokwone banaderha mpu: Oyu muntu abamudambye aba na mulalwe mwira wa bavurhisa b'ikoli n'abanyabyaha! Cikwone obumanye bwa Nnamahanga bunaciyerekane oku bushinganine, ebijiro bujira byo buciyerekana mwp.”

²⁰ Ago mango Yezu arhondera okukalihira abantu b'omu bishagala ajiraga birhangaza byage binji kulusha ahandi, bulya abantu ba mwo barhagokôlaga okujira ebyaha. Aderha erhi: ²¹ “Oli muhanya Korazini! Oli muhanya Betesaida! Bulya ebirhangaza byajijirwe emwinyu, bicijiragwa e Tiro n'e Sidoni, rhinga mira abayo bayambalaga amasunzu, bacishige n'oluvu, lyo bayerekana oku balonzize okugokola ebyaha byabo. ²² Co cirhumire mmbwizire nti omu lusiku lw'Okutwa olubanja, Tiro bona Sidone bo bahanwa kunyi kumulusha ²³ Nawe Kapernaumu, k'omanyire mpu wacîlengeza kuhika oku nkuba? Wayandagalizibwa omu kuzimu Bulya ebirhangaza byajijirwe emwawe, bicijiragwa e Sodoma rhinga eco cishagala ho ciciba kuhika ene. ²⁴ Co cirhumire mmubwizire nti omu lusiku lw'Okutwa olubanja, Sodoma ahanwa kunyi kumulusha.”

²⁵ Muli ago mango Yezu aderha erhi: Larha, we Nyamuzinda w'empingu n'en'igulu, nkuvuzire omunkwa bulya wayeresire abirhôhye. ²⁶ Neci Larha kwo banali ntyo, bulya wabwine kukusimisize.

²⁷ Larha ampîre ngasi kantu, na ntaye oyishi Omugala kulaka Ishe, nabo Omugala alonzize okuyereka ebyo. ²⁸ “Muyishe emwami mweshi, mwemuyabirwe n'emizigo mizirho, namurhamula. ²⁹ Mubarhulire oku ngarha yani mubul'ileka mmuyigirize, bulya mba mutudu na mwirhohye omu murhima, mwarhamuka omu mirhima yinyu. ³⁰ Engarha namuha eri nnembu okubarhulira, n'omuzigo namuhêsa guli mwangu.”