¹ Ou Yesu lwahiha pansi afume mwigamba, eimpuga ya bhantu yahasojeleiye. ² Enya oumuntu weimpoungo yeimakete aheinza ahafugamila hwitagalila lyakwe, ahaga nkoubhajiye amponei oumponei.”

³ Ou Yesu agolosyaa oukhono gwakwe waponia oula oumuntu wapoona. ⁴ Ou Yesu wabhoula waga, “ousahayanje hwa muntu wowonti. Bhalaga ouhwibhonesye hwa gousi weishibhanza na oufumye einsangu neishi shahalajizizye ou Moose huje wubhe keiti waho.”

⁵ OuYesu lwahafiha hu Kapernaumu, ougosi umo ahinza ahabhouzya ⁶ ahaga, “Gousi wanei neiweinjei ouboyi wanei abhinile eimpoungo yahwoume eilabha ounavwe.”

⁷ OuYesu aga eishi, “Eimbahweinze ahuponie.”

⁸ Ougousi wagamula waga, ‘ndaadi, wee mweine saga eihoundeiye huje aawe outoushe munyumba yanei, ouyanje izwi lyeene nouboyi wanei abhaapone. ⁹ Peipo anei nanei endi gousi wabhantu, endi nabhalwi bhabhali pansi yani. Nkanaga bhala ‘abhala ounou nkanaga einza ahweinza nouboyi wanei nkanaga bhomba eishi abhomba.’

¹⁰ Ou Yesu nawounvwa eisho, aswijile tee abhabhula bhala bhabhalondozyaga, “Lyoli eimbabhuzya seindolile nkalumo oumuntu ouwilwitiho mu Israeli neishi oulu. ¹¹ Eimbabhoula huje, bhiinji bhaayeinza afume humashariki na humagharibi, bhaikhala pameza peka nou Abrahimu, Isaka, nou Yakobo, hu huwumweene uwahumwanya. ¹² Leelo abhana huwumweene bhayitaagwa huhisi hwounzei, ouhwo bhailila nazyeguzye amino” ¹³ Ou Yesu ahabhula ougosi oula, “Bhalaga! Zibhe neishi shouyeitishe zibhombeshe sheisho huliwe, ubouyi wakwe aaponile eisala yeila.

¹⁴ Ou Yesu nahiinjila munyuba ya Peeteli ahamwajile oukhoi wa Peeteli alineizegema. ¹⁵ OuYesu ahapalamasyaa oukhono gwakwe, eizegema yaleha. Wabhuha wanda abhatengaanie.

¹⁶ Lwa hwabha lyabhela, bhahabhaleta hwa Yesu abhantu abheimpepo. Abhapuutila eimpepo zyepa bhaapona. ¹⁷ Pepo galouleishe gala gagayangwilwe nou oukuwe ou Isaya aje, “ou Yesu ahejile einpungo zyeitu nazibhouseizye eimbina zyeitu.”

¹⁸ Ou Yesu nahalola abhantu bhabhungeine bhanzyoungouleile, ajile bhabhale ouhweinjei ambali hounsoumbei eiyahu Galilaya. ¹⁹ Ousiimbi ahinza hwa Yesu ahaga, “wee manyizi, eimbahulondoozye hwahwonti hwoubhala.”

²⁰ Ou Yesu ahabhula huje eimbeila zilina magwenya nei nyonyi zilineivyaansu, leelo anei napamo pagonie itwe lyanei.”

²¹ Oumanyili wamwabho ahabhula ahaga, “Gosi wanei eilabha ouneiteisheile eimbale einsyeile ouyise wanei nasouti.”

²² Leelo ou Yesu wabhula waga, “awe ndondoozye anei, bhaleshe abhafwe bhasyilane bheene.”

²³ OuYesu nawiinjila mwitouli, amanyili bhakwe bhope bhahinjiye. ²⁴ Eihaala yahanda avugule amabhilingwa gahabha magousi, ameinzei gahanda atoushe mwitouli, oumwene ou Yesu agonile. ²⁵ Amanyili bhakwe bhadamuuzya bhahaga tavwee tihwanda afwe!”

²⁶ Ou Yesu ahaga, “Muhwogopaanshi, amwe mwamuli noulweteho oudoodo?” Ahadamuha na yikhajile eihaala nei nsoumbei pamandei hwabha myee.

²⁷ Abhantu bhaala bhaaswijile bhaga, “Umuntu ounu younaanu huje eihaala neinsoumbei zihumweiteiha oumwene?”

²⁸ Ou Yesu naheinza ambali hunsi eiya bha Gerasi, alume bhabheilei bhahali nei mpepo bhahakhomana nawo. Bhahafumiye humbeipa bhahali bhakhali tee noumo oumuntu wahashilaga idala lila. ²⁹ Bhahakholile na jeishi, tilinahenu nawe mwana wa Ngulubhi? Ouyeinzeile eipa hutilavye ahabhalilo hetu sahaseili afishe ³⁰ Hwahali nipuga igousi lyeingurubhi lyaadimwaga shapatali pabhahali.

³¹ Eimpepo zyaheindeleiye akhoole hwa Yesu naje, “Tiifume tiibhale mumpuga yeingurubhi.”

³² Ou Yesu ahazibhula ahaga, bhalaji. Eimpepo zila zyahinjila mungurubhi, eingurubhi zyasheimbeileiye munsoumbei zyahafweila mumeinzei. ³³ Alume bhabhaadimaga eingurubhi bhasheimbeiye. Bhabhala hujini bhayanjile zyonti zyazyafumiye hwa bhaala abheimpepo. ³⁴ Eikhaya yonti yaheinza atangane nou Yesu. Nabhahalola ou Yesu bhahabhula aje ayepe mumpaho zyabho.