¹ Ou Yesu nawaamala ayanje einongwa eizyo zyounti, abhabhouzeizye abhaazyi bhakwe, ² “Mumeinye huje einsiku zibheilei hunzabhe eishikulukulu eishei pasaka nou mwana wa Adamu bhanza hufumye huje bhakhobhehanye.”

³ Pamande aloungouzi bha bhasayi na gousi bhabhantu, bhabhoungana munyumba eingousi ya sayi ougousi wa Ngouloubhei itawa lyakwe ali you Kayafa. ⁴ Bhasulihana huwilu huje bhakhate ou Yesu na hugoje. ⁵ Lelo bhayangana huje lisahabhe lisiku lyei sikulukulu aje abhantu bhasahavwalangane.”

⁶ Ou Yesu nahali Hubethania munyumba ya Simoni wahali neimpoungo yei ukoma, ⁷ Wope oushei oumo weinza hwa Yesu, ahali nei nsupa eiyei mafuta ganunshile, ageimpeiya einyinji, wasululila ou Yesu pitwe lyakwe nakheiye pameza alye eishalye. ⁸ Lelo abhaazyi bhakwe ou Yesu nabhalola zyabhoumbile oushei ouyo bhahavitwa bhaga, ouwunanzi ouwu weiyeinu? ⁹ Amafuta eiga geinzagakaziwe eimpeiya zyei nyiinji teinzagabhapeele apeina.”

¹⁰ Lelo ou Yesu, wamanya zyabhaseibha wabhabhoula waga, eishi yeenu muhuyanzya oushei ounou? Ounou abhoumbile shinza tee. ¹¹ Apeina mulinabho einsiku zyounti, lelo anei sigamwaikhala nanei einsiku zyounti. ¹² Nansululiye eishi amafuta eiga, ambeisheiye hani hwisiku eilya syeilwe. ¹³ Lyoli eimbabhoula huje papounti pabhayilombeileila ibhangili eili eizi zyabhoumbile oushei ounou wope bhayihulaata nahumwizushe.”

¹⁴ Ou Yuda ou Sikaliote yahali peka na bhaazyi abhalile hwaloungouzi bhabhasayi ¹⁵ Wabhabhoula huje, mubbhampele yeinu nkeimbasontele ou Yesu?” bhapeila eimpeiya amashoumi gatatu. ¹⁶ Ahwande oulwo ou Yuda wanda awanze idala eilinza eilya husambushile ou Yesu.

¹⁷ Isiku eilyahwande eilyei sikulukulu yei makati, gasiga bhasapiishe, abhaazyi bha Yesu bhabhouzya huje, ouhwanzaje tilabhale hwii tileinganyizye apaleile eisikulukulu eiyei Pasaka?”

¹⁸ Wabhabhoula waga, “Bhalaji hujini hwa muntu oumo mubhoule huje, oumanyizi aiga eisala yaanei eipalamiye afishe, eimbaleile eisikulukulu yei pasaka munyumba yaho na bhaazyi bhanei.” ¹⁹ Abhaazyi bhakwe bhabhala, bhabhoomba nashi shalajizizye ou Yesu, bhaleinganya apaleile eipasaka.

²⁰ Nahwafiha lyebhela ou Yesu akheiye pameza na bhaazyi bhaala ishoumi na bhabheilei. ²¹ Nabhanda alye eishalye ou Yesu wabhabhoula huje, oumo eipa amwei abhansaambushe.”

²² Bhounti bhazugumila nabhounvwa eisho, bhanda ahubhouzye, shila muntu aje, neinei gousi?”

²³ Ou Yesu wabhabhoula huje, oula yabhaatobheezye nanei mumbakuli ouyo yabhaansambushile. ²⁴ Oumwana wa Adamu abhasogole, nashi shazyasimbilwe. Lelo palwakwe oula oumuntu yabhahusambushile oumwana wa Adamu. Hwali nashi oumuntu ouyo huje agasintile napaapwe.” ²⁵ Ou Yuda, oula ya bhahusambushile waga, eishi neinei manyizi? Ou Yesu wagamula waga, wayanga weewe eilyo.

²⁶ Nabhaalyanga eishalye, ou Yesu weega ikati wasalifya, walimeinsulanya. Wabhapeela abhaazyi bhakwe waga, eijii mulye ougu beilei gwanei.” ²⁷ Nantele weega eishikombe wasalifya, wabhapeela waga, mweili mweinti eishikombe eishi. ²⁸ Eili lidanda lyanei eililagano lyalihwitiha hunongwa ya bhantu abhiinji lya hwefwezye eimbibhi. ²⁹ Lelo eimbabhoula huje, ahwande eishi siga eihayimwela lwonti eidivai, paka nehayimwela eidivai eimpya namwei huwumweinei wa yise wanei.”

³⁰ Nabhatela oulweimbo, bhabhala hwigamba lyei mizeituni.

³¹ Nahwfiha sikuu ou Yesu wabhabhoula huje, amwei eishi mweinti mubhandeishe neimweine nashi shazyasimbiilwe huje; eimbahukhome oudiimi nei ngoole zyope zibhanyampane. ³² Lelo panazyouha nayibhatagaalila abhaale hu Hugalilaya.”

³³ Ou Petro waga, abhanje bhounti kabhabhahuleshe anei siga eimbajiye ahuleshe.

³⁴ Ou Yesu wabhoula waga, awe oubhahaane hatatu ousiku ouwu eihaanda seiseile akuje.”

³⁵ Ou Petro wadaliha waga, ata kashele eihwanziwa huje eifwe peeka naawe, sigaeimbahukhane dumu! Bhope bhaala abhaazyi bhamwabho bhayanga sheisho.

³⁶ Eipo ou Yesu na bhaazyi bhakwe wabhala paka hubusitani yei hweitwa Gethsemane wabhabhoula, khali peipa amwei anei eimbala hula alaabhe hwa Ngouloubhei.” ³⁷ Hwamwenga ou Petro na bhana bha Zebedayo bhabheilei nahwande azugumale, nasweime. ³⁸ Eipo ou Yesu wabhabhoula, oumwoyo gwanei guzugumiye apululile afwe, amwei mukhale peipa peeka nanei.” ³⁹ Wabhaala pitagaalila hashe, wagwa kupama, walabha huje, nkobhajiye eishikombe eishi nefwezye, lelo shiganje bhombeshe shiila, sheihwanza anei, lelo shiila shouhwanza awe.” ⁴⁰ Nawawela afume alaabhe, wabhaga abhaazyi bhakwe bhagouneileiye wabhouzya ou Petro, huje mwapootwa abhe maso peeka nanei nkamba lisala limo? ⁴¹ Eipo wabhabhoula huje, mubhanje maso napuute, huje muganje amenwe nei njelo, oumwoyo guhweiteiha lelo oubeilei gukhaana.”

⁴² Ou Yesu ahabhala nantele oulwa bheilei apuute ahaga, wee gousi wanei, nkashele zipouteiheine hwahuje zyouzigeine zibhoombeshe.”

⁴³ Nawaweela afume apuute, wabhaga bhagouneileiye, amaso gabho gahali mamwaamu. ⁴⁴ Eipo wabhaleha, wabhaala apuute oulwa tatu, ahayanga amazwi gagaala. ⁴⁵ Nawaweela afume apuute, wabhabhoula huje gounii mutouye, eisala eipalamiye ou Mwana wa Adamu abhabhe mumakhono gabhantu abhomba mbibhi. ⁴⁶ Saali tisogolaje, einya oula yansambushila apalamiye.”

⁴⁷ Nawabha ayanga eisho, ou Yuda yaali nabhaala abhaazyi ilongo na babheilei, weinza. Nipouga lya bhantu, bhakheite amapanga, neinduugu munyoobhe, namanyizi bhei ndajizyo. ⁴⁸ Ou Yuda yasambushiye abhapiiye eishimanyilo huje, yeimbahuyayiile ouyo mweinzaje ahukhate.” ⁴⁹ Ou Yuda weinza hwa Yesu, walamuha, nahuyayiile.

⁵⁰ Ou Yesu wabhoula waga, wee wamweitu bhombaga zyouyeinzeiye eipa. Liila ipouga lya bhantu lyazubhiila nahukhate ou Yesu. ⁵¹ Eishi oumo wali peeka nou Yesu ahakoula ipangalyakwe, wakoonya oubouyi wasayi wadumula ikutu. ⁵² Ou Yesu wabhoula huje weizya ipanga lyaho palyahaali, peipo bhabhatumila amapanga, bhaifwa namapanga. ⁵³ Eishi muyiga siga embajiye alaabhe hwa yisewanei, huje anavwe abhalwii eishomi na gabheilei ga ntumi? ⁵⁴ Eishi weilei, nkashele nabhoumba eisho, eishi gabhajiiye abhoombeshe eigo, gasimbwilwe mu nsimbo einfinjile huje shasheisho gahwanziwa abhombeishe?”

⁵⁵ Eisho ou Yesu abhabhoula bhaala bhabhakheite huje, mweinzeile namapanga, neinduugu huje anei endi mwibha? Einsiku zyounti nakheiye peeka namwei munyumba eiya puutile, yeenu sigamwaahataga! ⁵⁶ Lelo gounti eiga gafumiye huje, einsimbo zya kuwe zifishe.” Eipo abhaazyi bhakwe bhounti bhaleha, bhasheimbeila.

⁵⁷ Bhaala bhabhakheite ou Yesu bhatwala hwa Kayafa, ousayi ougousi, eipo amanyizi bhei ndajizyo na gousi bhabhoungeine. ⁵⁸ Lelo ou Petro alondozya shapaali paka hunyumba ya sayi ougousi. Hwinjiila wakhala peka na diimi huje ayeenye zyazibhabhoombeshe.

⁵⁹ Alongouzi bha bhasayi nikoloti lyounti lya bha Yahudi, bhaleta oukeeti ouwileinga huje ou Yesu, ahwanziwa abudwe. ⁶⁰ Lelo sigabhawajile ounaanzi naumo hwa Yesu, bhope akeiti abhilenga bhabheile bhaheinza. ⁶¹ Naje, oumuntu ouno ajiile, eimbayigwisye einyumba einei eiya puutile nayizenje nantele hunsiku zitatu.”

⁶² Ousayi ougousi weimeileila wabhouzya ou Yesu huje, awe souyanga naziimo hu keiti ouwu wabhaletile? ⁶³ Lelo ou Yesu apoumeile kati. Eipo ousayi ougousi waga, eihulapizya hwitawa lya Ngouloubhei oumwoumi. Tibhoule nkashele awe we Klisti oumwana wa Ngouloubhei.”

⁶⁴ Ou Yesu waga, “Awe woyanjile. Lelo eimbabhoula mweinti einsiku eizya malabho mwayihuklola ou Mwana Wa Adamu akheiye hukhono ouleilo gwamanikhone, nahweinze mumabheingo ga humwanya.”

⁶⁵ Eipo ousayi ougousi nawonvwa eizyo, azembula igolole lyakwe, alolesye huje avitilye waga, tihwanza bhaashi akeiti muhwounvwa mweimwei eindigo zyayanga? ⁶⁶ Eishi muhwamula zyenu? “Bhaga ahwanziwa abudwe.” ⁶⁷ Eipo bhasyeila amatei humaso, bhamo bhakhoma nei ngumi, na makofi, ⁶⁸ naje, tikuwile, awe we Klisti weenu wakhomile?”

⁶⁹ Eipo ou Petro akheiye hwounzi pa bhoungoulou, oubouyi oumo wei shileindu abhouzya ou Petro huje, “nawe ouli peeka nou Yesu ou wa hu Galilaua.”

⁷⁰ Lelo ou Petro wakhana hwa bhantu bhounti huje, sigaeimeinye einongwa eizyo zyouyanga.”

⁷¹ Nawafuma hwounze, oubouyi wamwabho we shilendu, walola wabhabhoula abhantu huje, ouno ali peeka nou Yesu ou munazaleti.”

⁷² Ou Petro wakhaana nalape, naje sigaeimeinye oumuntu ounou anei.”

⁷³ Pamande hashe bhaala bhabhaheimeileiye nawo bhabhoula huje, lyoli awe ouli peeka nou muntu oula, ata njango ouleingeine nawo.”

⁷⁴ Eipo ou Petro waanda ahwilape huje, siga eimeinye oumuntu ounou,” peipo eihanda yakuga.

⁷⁵ Eipo ou Petro wiizuha shayanjile ou Yesu huje, seiseile eihaanda akuje abha haane hatatu.” Wope wafuma hwounzei waanda alile amansouzi.