¹ Eishi ouwumweinei wa humwanya wayileingana nashi abhaleindu, ishoumi bhabhaheijile amakhozyo gabho abhale humwejelele ousahala oumweiji. ² Bhasanu bhaali bhaleima, nantele bhamwabho bhasanu bhaali nei njeele. ³ Alema bhaala bhasanu bhaheijile amakhozyo, nkahweije amafuta gei mpaya. ⁴ Lelo bhaala abheinjeele bhaheijile amakhozyo na mafuta gei mpaya muvyombo vyabho. ⁵ Oumweiji nahachelewa aleindu bhaala bhahanda asinzile na goneele.

⁶ Lelo nousiku pahati bhahounvwa eibwago, einyi oumweiji ayeinzeile, salii timwejelele.’ ⁷ Bhaala aleindu bhounti bhabhouha naleinganye amakhozyo gabho.

⁸ Bhaala alema bhasanu bhabhabhoula abheinjeele huje, tipeili hashe amafuta geinyu amakhozyo geitu gazima.’ ⁹ Bhaala bhenjeele bhabhabhoula huje, eiga amafuta sigagatiya atei namwei, bhalaje hwabhakazya mukale.’ ¹⁰ Nabhasogola abhale akale amafuta oumweiji weinza, bhala aleindu bhabhali neinjele bhiinjila huhweiji, oundyango gwagalilwa.

¹¹ Pamande bhope bhaala abhaleindu alema bheinza bhakwizya, wee gousi tigulile oundyango natei.’ ¹² Lelo oumweiji oula wabhabhoula waga, sigaeimbameinye amwei.’

¹³ Eishi eimbabhoula huje, mubhanje maso, peipo isiku nei sala yayeinza ougousi weinyu sigamuimenye.

¹⁴ Nantele ouwumweinei wa humwanya wuleingeine neishi oumuntu yahwanza shoule, wope wabhakwiizya abouyi bhakwe, nashibheishe eishouma shakwe hwabheene aje bhabhe bheimeileili bhei shouma eisho. ¹⁵ Oumo wapeelwa eitalanta zisanu, ouwamwabho wapeewa eitalanta zibheilei, wope wamwabho wapeelwa eitalanta eimo. Shila muntu apeiwilwe aleingane nikhone lyakwe, oumwene washoula. ¹⁶ Oula yapeililwe eitalanta zisanu wabhala wabhomba ei bilashala ninali, wazyaga zyamwabho zisanu, zyabha ishomi limo. ¹⁷ Wope oula wapeililwe zibheilei, wabhomba nashi ouweinjei wazyaga zyamwabho zibheilei, zyabha zinei. ¹⁸ Lelo oula yapeiwilwe eimo, wabhala wabana eileindei wayisyeila pansi eitalanta ya gousi wakwe.

¹⁹ Oula ougousi nawadeila, aweela nawande abhazizanye nabho shila muntu nei talanta zyapeililwe, ²⁰ Oula oubouyi yapeiwilwe eitalanta zisanu. Waga gousi wahabheishile hulinei eitalanta zisanu eimbombile eibilashala einzyajile eitalanta eizyamwaabho eizyapanya zisanu.’

²¹ Ougousi wakwe wabhoula huje, oubhoumbile shinza tee bouyi wanei, oulilonjeisu nantele ouli teindeisu huvintu eividoodo, eihubheiha huje oubhe mweimeileili weivintu eiviinji. Einzaga oukhale hulusoungwo lwa gousi waho.’

²² Wope weinza oula yapeililwe eitalanta zibheilei, waga gousi wabheisheile hulinei eitalanta zibheilei, nanei eimbombile eibilashala einzyajile zyapamwanya zibheilei.’

²³ Ougousi wakwe waga, oubhoumbile shinza tee, bouyi wanei ouligoulousu n. Nantele ouli lounjeisu huvintu eividoodo, eimbahubheishe oubhe mweimeileili wei vintu eivinji. Einzaga oukhale hulusoungwo lwa gousi waho.

²⁴ Wope oula wapeiwilwe eitalanta eimo weinza, waga, gousi wanei nameinye huje awe oulimuntu khome, nantele ouyabhila vyasiga outotile nantele oubhounganya zyasiga ounyampeinye, ²⁵ Eishi anei nahogopa, eitalanta yaho nayisyeileile pansi, einei eipe eitalanta yaho.

²⁶ Lelo ougousi wakwe waga, awe bouyi ouli bhibhi nantele ouli mwoolo, ouhameinye huje anei eiyabhila vyasiga eitoutile, nantele eibhounganya vyasiga einyampeinye. ²⁷ Shinza, eishi yeenu sigawatwalile eitalanta yanei hwachuluzi huje, neiweela einjagaje eiya pamwanya. ²⁸ Ougousi wabhabhoula abouyi bhaala bhabheilei waga, fyouli ouyo eitalanta eiyo apeilwe ouwishoumi, ²⁹ Eisho eimbabhoula huje, yalineivintu abhapelwe vyeivinji, lelo yasigalinahantu abhafyoulwe hata halinaho. ³⁰ Ouyo oubouyi oubhibhi mubheinje na hutaje hwounze huhisi, ouhwo hwahwayibha nei hoolo na zyeizyeigule amino.

³¹ Oumwana wa Adamu lwayihweinza nou mwamu wakwe, na antumi bhounti peeka noumweene, eipo ayikhala pamwanya yei tengo lyakwe imwamu. ³² Abhantu bheinsi zyounti bhayibhoungana pitagalila lyakwe, wope aibhabagulanya abhantu, nashi oudimi shazibagulanya eingole nei mbuzi. ³³ Ayibheiha eingole hukhono ouleilo, lelo eimbuzi hukhono oumongo.

³⁴ Nantele oumweinei aibhabhoula bhaala bhabhali hukhonongwakwe ouleilo. Einzaji, amwei mwamusayilwe nou yise wanei, uolugalo lwei ouwumweinei lwaleinganyiziwe hunongwa yeinyu, afume napewaga einsi. ³⁵ Lwanahali nei nzala mwampiye eishalye, nanahali jeenyi mwampousheiye. ³⁶ Lwanahali weleele, na mwankwatizizye amenda, nanahali bhiinu mwaneinyizye, nantele nanafungwilwe muhoobhe mwaheinza aneinye.

³⁷ Eipo abhantu agoulousu bhayihubhoula naje, Daada, lwandii talolile oulineinzala, tahapiye eishalye? Awe ouyoumeile, tapiye ameinzi? ³⁸ Na ndii tahaloulile oulijenyi tahaposheiye? Awe nouli weleele takwatizwa amenda? ³⁹ Na ndii tahaloulile ouli bhiinu, awe oupinyilwe na taheinza?

⁴⁰ Na ouwumweinei wayibhabhoula nayanje huje, hamubhoombile eipa peeka na holo bhanei adoodo, mwamboumbeiye nanei.’

⁴¹ Eipo payibhabhoula eibho bhabhali hukhono gwakwe gwei moongo, sougouli hulinei, mwamukhanilwe, bhalaji humwoto ougwawiila gwabheisheiye hunongwa ya seetano na antumi bhakwe, ⁴² anei nahali nei nzala lelo sigamwampiye eishalye; nahoumeile ameinze sigamwampiye ⁴³ Nahali jenyi lelo sigamwampousheiye, nahali weleele sigamwakwatizizye amenda, nanahali bhiinu na nanapinyilwe sigamwaneinyizye.

⁴⁴ Bhoope bhayihubhoula bhaiyiga, ndii taloulile oulinenzala, awe ouyoumeile, awe oulijenyi, awe ouli weleele, awe oulibhiinu awe lwabhapinyile seitateindeishe?

⁴⁵ Eipo ayanga naje, hubhawuozye, ‘Lyoli eimbabhoula, haseimwabhombile hwadoodo eibha, seimwamboumbeiye anei.’

⁴⁶ Eibha bhayibhala humalabha gawiila na bhaala agoulousu bhayitouhahuwumweinei ouwa wiila.