¹ Ou Yesu na bhaazyi bhakwe bhahafia humpalamano nei Yerusalemu nabhaabhala, nabhafiha hu Bethfage, hwi gamba eilya mizeituni, nantele ou Yesu abhabhouzya abhaazyi bhabheilei, ² Abhabhoula ahaga, “bhalaji hushijiji shashili hwitagalila lyenyu, namwafiha mubhayaaje eidogobhi nei nyana yakwe zikoungweilwe paala, muzyaawule nazilete hulinei. ³ Nkashele ou muntu wowonti abhabhabhouzye lyolyonti einze mugaje ougousi azyanza, oumuntu ouyo abhabhapeile namwei muzalete hulinei.”

⁴ Eiga gounti gabhoombeha gagayangwilwe nou kuwe huje kafishe. Naje, ⁵ Mubhoule oumwale Sayuni huje, eenya oumweinei waho ahweinza huliwe, hogowe apandile eidogoubhi, eidogoubhi nei nyana.

⁶ Bhala abhaazyi bhahabhala nabhoombe nashi shalajizizye ou Yesu. ⁷ Bhaileta eidogoubhi nei nyana yakwe, bhaala amenda pamwanya, ou Yesu wakhala. ⁸ Abhantu abhiinji bhahaalile amenda mwidala, bhamo bhatema einsaamba zyei makwi nahwaale mwidala. ⁹ Abhantu bhabhali hwitagalila na bhaala bhabhalondozyaga hwisinda, bhateelaga huje, “Hosana mwana wa Daudi! Asayilwe oumwene wahweinza hwitawa lya Gousi, Hosana humwanya hani!”

¹⁰ Nabhiinjila hu Yerusalemu eikhaya younti abhantu bhagunduha naje, weinu oumuntu ounou?

¹¹ “Abhantu bhaga, ounou you kuwe ou Yesu wahu Nazareti yei Galilaya.”

¹² Ou Yesu nawinjila munyumba eiya puutile, wabhabheinga abhantu bhounti bhabhakazyaga na kale oumwo, wazigaluzanya eimeza zyabhala bhabhakalanyaaga eihela nei meza zyabho bhabhakazyaga einkounda. ¹³ Wabhabhoula huje, einyumba yanei yaihweitwa nyumba ya mpuuto, amwe muigaluleinye abhe ligweenya lya bhibha.”

¹⁴ Afya maso naguuga bhahabhala munyumba eila ei ya puutile, wope abhaponia.

¹⁵ Lelo alongozi bha bhasayi na manyizi bhe ndajizyo, nabhalola amambo geimayele gabhoomba ou Yesu nahwounvwe abhana bhahwanga munsonso yei nyumba ei ya puutile, bhaiga, Hosana mwana Daudi, abheene bhaviitwa.

¹⁶ Bhabhouzya ou Yesu, ouhwounvwa eizyo zyabhateela?” ou Yesu waga, eishi amwei sigamubhaziizye huje, mumaloumu gabhaana adoodo na bhabhahwoha abheisheile eindoumbo?”

¹⁷ Nantele ou Yesu ahabhaleha abhantu bhala abhahala agone hushipanga eishe Bethania.

¹⁸ Ou Yesu naweelaga shampwiiti aheinshile einzala. ¹⁹ Ahalilola ikwi eilyei tini pansheinje yi dala. Nawazubhiila aheenya mwikwi lila siga ahagalola amadoundou, gali ga mantoundou geene, ahalibhoula ikwi lila huje, usahasaanje amadoundou ahwande sanyounou,” ikwi lila lyahouma ahwande paala.

²⁰ Abhaazyi nabhalilola eilyo bhaswiga bhabhouzya bhaga, ziliweile ikwi eili linyaalile nanali?”

²¹ Ou Yesu wabhabhoula, huje, nkamuli noulweteiho, musahabhe nei mpeingaano, sigazibhabhoombeshe zyeizyi zyazibhombeishe mwikwi eili lyene, lelo atankamulibhouleile igamba eili huje lyeepe natagwe hu nsoumbei zibhabhombeshe. ²² Gagounti gamubhalabhe nahweiteisheile munzaposhele.”

²³ Ou Yesu nawafiha mushibhanza, agousi bhei makuhani na bhasaayi bha Ngouloubhei bhamwenzeila namanyizyaga nahubhouzye huje, “Eiga goubhomba oubhomba hwi khone lyananu? Nantele weinu wapiye ikhone eili?

²⁴ Ou Yesu abhabhoula na huje, nanei eimbhouzya izwi limo. Nkashele mnzamboozye, nanei eimbabhabhouzye huje eibhoomba hwikhone lya naanu eiga. ²⁵ Ouhwoziwa wa Yohana- wafumile hwii, humwanya awe hwa bhantu?” Bhajehana bhene, aje, nkatije, gwafumile humwanya, “anzaatibhouzye huje, yeenu sagamwamweiteishe?” ²⁶ Lelo nkataga, gwafule hwa bhantu, tihogopa eipouga ei ya bhantu, eipo bhounti bhahulola huje, ou Yohana ahali kuwe.” ²⁷ Nantele bhahabhoula ou Yesu huje, “Sagatimeinye” wope abhabhouzya, sigaeimbabhabhouzye huje, eibhomba eeiga hwikhone lya naanu.

²⁸ Eishi museibha yeenu? Oumuntu walinabhana bhabheilei. Wabhala na hubhouzye oumo, mwanawanei bhalaaga oubhombe eimboombo mugounda gwei mizabibu sanyounou ²⁹ l `Oumwana wabhoula waga, seimbala, lelo pamande ahaseibha, ahabhala.

³⁰ Oumuntu Oula wabhala hwamana wakwe wabheilei nahubhouzye nashi ouwamwabho sheishila. Oumwana oula aiga na yanje aje eimbala, gousi,’ lelo sagabhaala. ³¹ Younanu mubhala bhabheilei yabhoumbile shahwanza ouyise wakwe? Bhabhoula bhaga, “oumwana ouwahwande.” Ou Yesu abhabhozya, lyoli eimbabhoula huje, asounvya eisongo na bheegu bhaibhatangulila ahwijiila huwumweinei wa Ngouloubhe. ³² Ou Yohana aheinzeile hulimwe hwidala lyaligouloushe, lelo amwe sagamwapousheiye, lelo asounvya eisongo na bheegu bhamweiteishe. Hwope namwei namwagalola gounti eigo sagamwalambile humbibhi zyeinyu na humweiteishe.

³³ Tejeelezi eishifwani shamwabho. Hwahali Oumuntu oumo, umuntu yahali nougounda gwakwe na avyale eizabibu, ahazyoungousyeizye oubhaaga munsheinjei, ahabaana eileindei eilyasouyeile eizabibu ziila. Ahazeenga eishidunku eishitali shaweinyeelezye mugounda, ahapanjizya hwabheeinyelezi bhei zabibu. Eipo oumweine asogola abhale hunsi yapatali. ³⁴ Eisala yahafiha yatoungoule eizabibu, abhasonteilezya abouyi bhakwe hwabhalimi bhala bhei mizabibu huje, bhamwejele ieizabibu zyakwe zyazifuile mugounda gwakwe. ³⁵ Lelo abhalimi bhala bhei mizabibu, bhabhakheite abouyi bhakwe, bhakhoma oumo, bhabuda wamwabho, na oumo bhakhoma namawe. ³⁶ Nantele oumwanesho gounda asonteilezya abouyi bhamwabho eibho bhalibheinji ashile yabhala bhe hwandilo, lelo abhalimi bhaala bhabbhabhoumbeiye sheisho. ³⁷ Eipo ougosi oula wasonteilezya oumwana wakwe, waga, bhanzabhe neinshinshi.’

³⁸ Lelo abhabhoumvi bhala bhabhalima amizabibu nabhanola ousahala oula, bhajehahana bhenei naje, “ounou you gaali gunda ougu, einzaji, tibuude huje ingali zyei gounda ougu zibhe zyetu’ ³⁹ `Eipo bhakhata, bhataga hwounzei yei gounda gwemizabibu na hugoje. ⁴⁰ Eishi oumwaneisho gounda nabhahweinze, abhabhabhoombeshi bhala bhabhalima amizabibu?”

⁴¹ Bhabhouzya bhaga, aibhagoga eibho abhantu abhibhi mwidala lyei wukhali tee, na abhapanjizye ougounda gweimizabibu nabhantu bhamwabho, abhantu bhabhaisomba eizabibu nazyatoona.”

⁴² Ou Yesu wabhbhoula huje, “sagamwamanyiye eigo gagasimbilwe huje, iwe lyabhalikheine abhazeinji bhei nyumba, eilyo ligalushe liwe eilinza lye musingi. Eili lifumile hwa Daada, na tiswiiga pamaso geitu?”

⁴³ Eishi eimbabhouzya, ouwumweinei wa Ngouloubhei ayihwefwa hulimwe na bhapeele bheinsi eiyeinjei eibho bhabhabhomba shinza mugounda gwakwe nameezye amadoundou gakwe. ⁴⁴ Wowonti waigwa pamwanya yeiwe eilyo aibuduhana tee nabhe tinyutinyu. Lelo walyaaihugweila, lyaihutinzanya tee.”

⁴⁵ Amafalisayo na longozi bha bhasayi bha Ngouloubhei na bhomnvwa eivifwani vya Yesu, bhahamaanyaje zibhayanga bheibho. ⁴⁶ Lelo nabhahanzaga huje, bhagolosye amakhono gabho pamwanya yakwe, bhahougoupe eimpouga yabhantu, hunongwa yaje abhantu bhamwenyaaga ou Yesu huje kuwe.