¹ Ou Yesu ahaga, ouwumweinei wa humwanya ouleingeine nashi oumwaneinsho gounda, yabhousheile nashampwiiti abhale abhanze abhantu bhabhoombe mugounda gwakwe gwei zabibu. ² Weiteihana nabho huje abhabhasoombe eidinaali yeeka hwisiku, abhasonteeleizya aje bhabhale mugounda gwakwe gweimizabibu. ³ Afishe musatatu abhalile nantele abhajile bhasigabhali nei mbombo bheimeileiye pasokoni. ⁴ Waga namwee bhalaji mubhombe eimbombo mugounda gwanei gwei zabibu ambabhapeele ouposhelo gweinyu. ⁵ Bhabhala abhombe. Wabhala nantele musaasita na musatisa wakhonzya sheisho. ⁶ Wafuma nantele musala yilongo na yeeka wabhaaga bhasigabhali nei mbombo bheimeleiye. Wabhabhouzya huje mweimeileiye eipa ousanya lyounti bila abhoombe eimbombo?

⁷ Bhabhoula bhaga, noumo oumuntu yatipiye eimbombo, namwee bhalaji mubhombe eimbombo mugounda gwanei gwei mizabibu.’

⁸ Nahwabha ndyabhela, oumwaneinsho gounda gwei mizabibu wabhoula oumweimeileili wei mbombo huje bhakwizye abhomba mbombo oubhasoombe uoposhelo gwabho, ouyande nouwamalishilo oumaleizyeizye nou wa hwande. ⁹ Nabheinza bhala bhabhandile eisala ilongo na yeeka bhaaposhela shila muntu eidinali yeeka. ¹⁰ Bhaheinza bhala bhabhahandile bhaseibheile huje abhene bhabhaposhele zyeinyinji, lelo shila muntu aposhela eidinali yeeka. ¹¹ Nabhaposhela bhahanda hululumwe oumwanei gounda.

¹² Bhaga, eibha bhabhabhombile humalishilo bhabhoumbile isala limo weene, nawe oubhapiiye ouposhelo gwabho guleingenei natee tatibhombile afume shampwiiti, tilabhile nilyoto isiku lyounti.’

¹³ Oumwaneisho gounda wabhoula oumo oula yabhalulumwaga, waga wamweetu sigaeihukhopehanya. Eishi setaheiteiheinee huje shila muntu eimbahusoombe edinali yeeka? ¹⁴ Eega ouposhelo gwaho bhalaga. Anei enamuye ahusoombe ounou wahumalishilo neshi sheisoumbile awe.

¹⁵ Eishi seeligane lyanei abhoombe shensoungweilwe anei neishouma shanei? Awe oulinejeila sheimboumbile ouhogowee ¹⁶ Eisho shashaibha, huje, ou wa hwande aibha wahumalishilo, nou wahumalishilo aibha wa hwande.”

¹⁷ Ou Yesu nazubhaga abhale hu Yerusalemu, abheijile abhaazyi ilongo na bhabheilei, wabhabhoula huje, ¹⁸ “Tizubha abhale hu Yerusalemu, alongozi bhabhantu na gousi bhei shibhanza, namanyizi bhei ndajizyo bhabhahukhate oumwana wa Adamu. Bhabhahulonje huje afwe, ¹⁹ Bhaihutwaala hwa bhantu bhasiga Bhayahudi, aje bhatone, bhashete, na hukhomeele mwikhobhehanyo. Lelo isiku ei lyatatu aizyouha.”

²⁰ Oushe wa Zebedayo weinza hwa Yesu na bhana bhakwe. Wafugamila walabhala huje abhombele lyahwanza. ²¹ Ou Yesu wabhouzya huje, “ouhwanzaje eibhombele yeinu?” waga “eilaabha huje abhana bhanei eibha, oumo akhale hukhono gwaho uoleilo ouwamwabho hukhono oumoongo huwumweinei waho.”

²² Ou Yesu waga, amwei sigamuzimeinye zyamulaabha. Eishi, mubhajiye amwelele eishikombe sheimwelela anei? “Bhaga, tibhajiye.”

²³ Ou Yesu waga, lyouli eishikombe shanei mubhashimwelele, lelo akhale hukhono gwane ouleilo nou khono gwane oumoongo eilyo siga lyane, eizyo azimeinye ouyise wanei bhaala bhabhabheisheiye.”

²⁴ Abhaazyi bhala ilongo limo bhahabhaviitwa bhaala amwabho bhabheilei. ²⁵ Lelo ou Yesu wabhakwiizya bhounti pandweimo waga, “Mumeinye huje alongozi bheinsi bhalongozya abhantu hwikhone, nalongozi bhabho bhabhabhombezya shibhibhi abhantu bhabho. ²⁶ Shisahabhe eisho hulimwei. Lelo amwe yayonti yahwanza ougousi abhe bhomba mbombo wabhounti. ²⁷ Wope yahwanzaje abhe wahwande ahwanziwa abhe bouyi weinyu. ²⁸ Neishi oumwana wa Adamu sagaheinzeile abhombelwe eimbombo, lelo aheinzeile abhombe nafyume ouwomi wakwe wubhe lisombo lya bhiinji.”

²⁹ Ou Yesu na bhaazyi bhakwe nabhasogolaga Huyeriko, abhantu abhiinji bhaloondozya. ³⁰ Afya maso bhabheilei bhakheiye mwidala. Nabhounvwa huje ou Yesu ashila bhahakhoola bhaga wegousi mwana wa Daudi outisaajile.” ³¹ Abhantu bhahaga leishi eishoongo, poumi lelo abheene sigabhahounvwanwa bhahendelela akhole naje. Wegousi mwana wa Daudi tisaajile.”

³² Eipo ou Yesu weimeileila wabhakwiizya wabhabhouzya, muhwanzaje eimbabhoombele yeinu?” ³³ Bhaga gousi tihwanzaje amaso geitu geinye.” ³⁴ Eipo ou Yesu wabhasaajila wabhapalamansya amaso gabho, amaso gaapona gaanda ahwenye bhope bhalondozya.