¹ Ou Yesu nawamala einongwa eizyo weepa hu Galilaya wabhala humpaho yei hu Uyahudi wabhala hwisyeila lya huRodani. ² Eimpouga eingousi yalondouzeizye, na wabhaponia ouhwo.

³ Amafalisayo bhahamweinzeila, bhajela, bhabhouzya, “Eishi shinza oumuntu ahuleshe oushei wakwe hunongwa yayountii?”

⁴ Ou Yesu ahayanga ahaga, “Sagamwabhazizye, aje ahwande huwaandilo huje ou Ngouloubhei abhoumbeile oushe nou lume? ⁵ Eisho oulume abhaleha ouyise nou nyina aibha noushe wakwe, ‘eibho bhabheilei bhaibha beilei gumo?’ ⁶ Eibhho saga bhabheilei nantele, bhali beilei gumo, eisho shabhabhongeinye ou Ngouloubhei noumo oumuntu wabhalehanye.”

⁷ Bhabhouzya bhaga, “Eishi yeinu ou Musa abheiteisheiye abhantu alehane na pelane eitalaka?”

⁸ Ou Yesu wabhabhoula huje, ou Musa abheiteisheiye alehane hunongwa yei moyo geinyu amakhome, lelo ahwande huwandilo sigashaali eisho. ⁹ Lelo anei eimbabhoula huje, oumuntu yayonti yabhahuleshe oushe wakwenahukhate hukenke na weeje oushi ouweinje wope kenke, wope yaleihwilwe nkayegwe bhounti bhabheilei bhabheigeine ebho bhakenke.”

¹⁰ Abhaazyi bhahaga nkashasheisho shinza akhale bila ahweeje.”

¹¹ Ou Yesu wabhabhoulahuje, “Saga bhounti bhabhagejelela einongwa eizi ila bhala bhabhapeiwilwe nou Ngouloubhei. ¹² Lelo bhamo sagabhahwega hunongwa yahuje bhapeipwe sheisho, bhamo bhabhehweilwe na bhantu, bhamo bhahwibheisheile bheibhoafume muvyanda vyanyina bhabho, bhamo hunongwa yeiwumweinei wa humwanya, oumuntu yawezizye azyejelele einongwa eizi azyejelele.”

¹³ Nantele bhaleetela abhana adoodo huje, abhabheisheile amakhono pitwe nabhapuutile. Lelo abhaazyi bhakwe bhabhadamila bhala bhantu. ¹⁴ Ou Yesu waga, “Bhaleishi abhana adoodo bheinzaje huliinei, abhana nashi eibha ouwoumi wa humwanya wabho. ¹⁵ Wabheiha amakhono gakwe pamwanya wabhapuutila nasogole.

¹⁶ Oumuntu oumo weinza hwa Yesu wabhouzya huje wee gousi eimbombe mbombo weilei einyinza nkeiniinjile huwumweinei wa humwanya?”

¹⁷ Ou Yesu waga, “Yeinu ouiga endi mwinza? Alii oumo yalimwinza, lelo nkouhwanza ahwiinjile huwoumi, uzikhate eindajizyo zya Ngouloubhei.

¹⁸ Waga zilihuu?” ou Yesu waga eizi, usahabude, ousahibhe, ousahabhe nabhasheinkwa, ousashimisizye eilenga, ¹⁹ Oubhatinihaje ouyise waho nou nyina waho, oubhaganaje ajilani bhaho neishi shouhwigana awe.”

²⁰ Oula oumuntu waga, “Amambo eigo gounti eingakheite, geinu ganwabho geimpongousheilwe?

²¹ Ou Yesu wabhoula waga, “Nkouhwanza abhe goulousu, bhalaga, oukazye vyouli navyo, oubhapele apeina ubhabhe ninfuha humwanya nkoundodonzyaaje.” ²² Oula oumuntu nawounvwa einongwa eizyo, wazugumila nasogole, sheisho ali neishouma shiinji.

²³ Ou Yesu abhabhoula abhaazyi bhakwe huje, “Lyoli anei eimbabhoula huje oumuntu weishouma pakhome ahwiinjile huwoumi wa humwanya. ²⁴ Nantele eimbabhoula huje shipoupousu eingamia atoushe mwahina hei sindano, ashile weshouma ahwiinjile huwumweinei wa humwanya.”

²⁵ Abhaazyi bhakwe nabhounvwa eisho bhaswijile tee bhaga, “eishi wenu yabhajiye apeindushe?”

²⁶ Ou Yesu wabhalangulila amasowaga, “hwabhantu sezibhajiiye eizyo lelo hwa Ngouloubhei zibhajiiye.”

²⁷ Eipo ou Petro wabhoula waga, enya etei tivileishile vyounti tihulondozya awe oubhatipele yeinu?”

²⁸ Ou Yesu abhabhoula huje, “Lyoli amwe mwamundondozya anei, hunsi eipya paikhala oumwana wa Adamu pitengo eilyeituntumu wakwe, amwe namwei mwaikhala mumatengo ilongo na gabheilei mwaibhalonga eikabeila ilongo na zibheilei eizye Israeli. ²⁹ Oumuntu wawounti yaleishile einyumba awe aholo bheshilume na bheshishei awe ouyise wakwe nou nyina wakwe, nabhana bhana bhakwe, namagounda hunongwa yandondozye anei nitawa klyane aiyiyejelela eishomi mala eishomi, na huwugale ouwoumi wa wila na wila.

³⁰ Lelo abhiinji bhabhali bhahwande bhaibha bhamalishilo, na bhabhali bhamalishilo bhaibha bhahwande.