¹ Husala yeila abhaazyi bheinza hwa Yesu na hubhouzye, “You nanu waligousi houwumweinei wa humwanya?”

² Ou Yesu akwizya oumwana oudoudo, hwabheha pahati yabho, ³ na yanje, “Lyoli eimbabhouzya, nkasagamulamba nabhe nanshi abhana adoudo sagamwayiweza ahwinjile houwumweinei wa Ngouloubhei. ⁴ Eisho wowonti wahwiha nanshi oumwana oudoudo, oumuntu nanshi ouyo gousi huwumweinei wa humwanya. ⁵ Na wowonti wahuposhela oumwana oudoudo hwitawa lyanei amposhela neinei.

⁶ Lelo wowonti oula wahumwalanganya ouwamwabho oumo mweibhadoudo bhabhaneiteishe anei huje abhombe eimbibhi, yayibha shinza hwa muntu ouyo iwee igousi eilya syele lipinywe munsingo yakwe, nataje munsoumbi. ⁷ Palweinyu amwe mwabheinsi mwamubhabhonvizye abhantu eimbibhi, eigo lazima gabhe lelo palwaho awe woubhonvya eigo. ⁸ Nkashele oukhono gwaho awe inama lyaho lihubhonvya eimbibhi oulidumule na litaje ouhutali nawe. Shinza ahwinjile huwumweinei wa humwanya neishilema ashile oubeilei gwounti atagwe humwoto gwaseguzima. ⁹ Lyope iliso lyaho nkalihubhombezya eimbibhi oulisenye na oulitaje ouhutali nawe. Shinza huliwe ahwinjile huwoumi nei liso limo ashile abhe na maso gounti na tagwe humwoto.

¹⁰ Enya huje ousahashente nkoumo wadoodo eibha, Anei eimbabhouzya huje antumi bhabho bhahweli humwanya bhahumwenya ou Ngouloubhei. ¹¹ (Shasheisho: oumwana wa Adamu aheinzeile abhafyule bhabhateijile humbibhi.) ¹² Mulola weilei? Nkashele oumuntu alineingole eimya eimo, eimo yateega eishi sigabhajiye azileshe zila amalongo tisa nei tisa nabhale ahwanze eila yeiteijile? ¹³ Lelo nawayaaga yeiteijile asoungwa tee ashile ziila zyasigaziteijile. ¹⁴ Shesho shali ouyise weenyu wa humwanya aje oumuntu oumo ateeje.

¹⁵ Nkashele ouhoolo waho avisizye, bhalaga, ousunde wumwene, lelo nkaweiteiha eipo wamwaga ouhoolo waho. ¹⁶ Lelo nkashele sahounvwa oumweje ouwamwenyu mubhe bhabheilei mubhale ahusunde, einongwa zyabhantu bhabheilei awe bhatatu zigoloha shinza. ¹⁷ Nkasiga abhounvwe amwei mulibhoulei ikanisa, kasigalyounvwa ikanisa, abhe nashi abhantu bhahwounzei na sonjezya songai. ¹⁸ Lyoli eimbabhoula, gagounti gamugapinya pansi gabha gapinyilwe humwanya na gagounti gamugigula pansi gabha gigulwe humwanya. ¹⁹ Nantele eimbabhoula, abhantu bhabheilei nkabheiteiheine na laabhe lyalyounti ouyise wanei wahumwanya abhalibhombe. ²⁰ Peipo eimbabhoula huje pabhali abhantu bhabheilei awe bhatatu nanei eindi peipo pahati yabho.

²¹ Nantele ou Petro wabhalila wabhouzya, ouhoolo wanei anvisye haleinga eisaajile? Hata mala saba?”

²² Ou Yesu waga, “Siga einjiga mala saba einjiga eisaba zibhe amalongo saba. ²³ Eisho eimbabhoula huje ouwumweinei wa humwanya oulinashi oumweinei oumo yahanzaga abhoumbe eimbazyo yeivintu vyakwe na bouyi bhakwe. ²⁴ Nahanda ahwande abhaazye, bhahaleta oumuntu oumo yadaiwa eitalanta elufu amalongo myaa. ²⁵ Nawapootwa asoombe oumwaneisho waga akaziwe youyo, oushei wakwe, abhana bhakwe, neivintu vyakwe vyounti vyalinavyo aje viiye asoombe ideeni lyadayiwa. ²⁶ Ouboyi oula wafugamila ougousi wakwe waga, eilaabha oungoule nanei eimbahusoombe ideeni lyaho lyonti.’ ²⁷ Ougosi wa bouyi oula walolela einkombou wasaajila ideeni lyake lyonti. ²⁸ Ouboyi oula asogoye nawafuma paala wope walola oumuntu yadayaga eidinali myaa wakhata wabida imilo naje nsoombe ideeni lyanei.

²⁹ Oula oumuntu yadaiwa wafugamila walabha waga, ngouleile eimbahusoombe ideeni lyaho lyonti.’ ³⁰ Leo ouboyi uola wakhata watwaala mwijela waga, paka ounsoombe ideeni lyanei lyonti. ³¹ Abouyi bhamwabho nabhalola zyabhombile ouwamwabho bhaswiga, bhabhala hubhoule ougousi zila zyabhoumbile oubouyi oula.

³² Eipo ougousi wakwe wakwiizya waga, awe bouyi woubhibhi anei nasajiiye ideeni lyanei lyeihadayaga nouhandambile. ³³ Yeinu sagaousajiiye ouwamwenyu nashi anei sheisajiiye awe. ³⁴ Ou gousi wakwe eilyooyo lyakhata watwaala wabhala bhabhalavya paka naisoomba ideeni lyakwe lyonti. ³⁵ Eisho shaibhabhoomba amwe ouyise wanei wa humwanya nkasiga mubhasaajila ahoolo bheinyu.”