¹ Amafarisayo na siimbi bhaheinzeile hwa Yesu afume hu Yerusalemu. Na yanje, ² “Yeenu abhaazyi bhananganya eindajizyo zya gousi? Sebhahwoga amakhono gabho nabhalya eishalye.”

³ Ou Yesu abhabhoula huje, “Namwe yeenu munanganya eindajizyo zya Ngouloubhei muzyonvwa eindajizyo zya gousi bheinyu? ⁴ Eisho ou Ngouloubhei ajile, ‘Oubhanje neinshinshi hwa yise waho nou nyina waho; na ‘Wahuliga ouyise wakwe nou nyina wakwe ouyo lyouli aifwa.’

⁵ Lelo amwe mubhamanyiza muiga shinza wene knashele oumuntu ahubhouzya ouyise wakwe nou nyina wakwe huje, “eivintu vyananzaga hubhavwe, einfumizye hwa Ngouloubhei,” ⁶ “Oumuntu neishi ouyo sahwaanza abhe neinshinshi hwayise wakwe nou nyina wakwe. Akhonzye eisho mungeinye endajizyo zya Ngouloubhei hunongwa yei ndajizyo zya gousi bheinyu. ⁷ Amwe mwagulugulu, shinza neshi shakuwilwe ou Isaya hulimwei aje, ⁸ ‘Abhantu eibha bhanshinshima anei humalomu gabho, lelo amoyo gabho galihutali nanei. ⁹ Bhahunsaya weene, peipo bhamanyizya eindajizyo zya bhantu.”

¹⁰ Wakwizya abhantu nabhabhoule, “Teijeileizi na mumanye huje— ¹¹ Nahamo ahantu hahahwinjila mwilomu lya muntu nahubheishe bhibhi. Lelo, shila shashifuma mwilomu eisho shashihubheha oumuntu hubhe bhibhi.

¹² Eipo abhaazyi bhabhalila nayanje nou Yesu huje, “Eishi! Oumeinye huje Amafarisayo bhavitilwe einongwa zyouyanjile zila?” ¹³ Ou Yesu abhabhoula huje shila ahantu hahameilile hasigatoutile ouyise wane habhaseenywe. ¹⁴ Bhaleishii afwemaso, bhabhalongozya afwemaso. Oumuntu oufwwemaso nkahulongozya ufwemaso bhaitumbushila mwileindei bhonti bhabheilei.”

¹⁵ Ou Petro wabhouzya ou Yesu waga, “Tilanganyizye eshifwani eisho.”

¹⁶ Ou Yesu wabhabhouzya, “Amwei museile amanye? ¹⁷ Eishi semumeinye huje ahantu hahonti hahahwinjila mwiloumu hashilila muvyaanda natagwe hwisalani? ¹⁸ Lelo vyavifuma mwiloumu vifuma humwoyo, eivyo vyavihubheiha oumuntu abhe bhibhi. ¹⁹ Lelo Humwoyo zifuma einseibho eimbibhi, ougouji, oukenke ouwumalaya, ouwibha, ousimishizi ou wilenga neindigo. ²⁰ Eiga gageigo gahubheha oumuntu huje abhe bhibhi. Lelo alyee nkahwooje amakhono seigahuhubheha oumuntu abhe bhibhi.”

²¹ Eipo ou Yesu ahaseguha pa bhantu bhaala ahabhala hu Tiro na hu Sidoni. ²² Enya oushei oumo ou Kananayo afume ouhwo. Wakhola waga nsajilee, awe gousi, wou mwana wa Daudi Azuvya isauti ayanga, oumwale wanei aperushe nei eimpepo eimbibhi alinamayemba miinji.”

²³ Lelo ou Yesu apoumeile kati. Abhaazi bhakwe bheinza bhalamba tee bhaga, “Mwefwe ouyo atibwajila ibwago.”

²⁴ Ou Yesu waga, eintumwilwe hungoole eizya Israeli zyaziteejile.”

²⁵ Lelo oula oushei wafugamila ou Yesu waga gousi navwee.”

²⁶ Ou Yesu waga seimbajiye ahweeje eishalye sha bhaana naziponyezye eimbwa.”

²⁷ Oula oushei wayanga waga, “zyope eimbwa zilya amalagalizi gagalageiye pa meza ya gousi wakwe.”

²⁸ Ou Yesu nwounvwa eisho wabhoula oushei oula waga, “Oulweteho lwaho gousi. Zibhe nashi shoulaabhile sheisho.” Ou mwalei wakwe aponile lulula.

²⁹ Ou Yesu wasogola nabhale hunsheinje yei nsoumbei ya hu Galilaya. Nantele wabhala pamwanya pigamba na khale ouhwo. ³⁰ Eimpouga yabhantu yaheinza hwamwene. Bhabhaleta abhinu abheivipela, afwamaso, abhishilema, bhasagabhayanga, nabhamwabho bhabhinji bhabhabheiha pamanama ga Yesuwabhaponia bhonti. ³¹ Abhantu eibho bhaswiga tee nabhabhalola bhasaigabhayanga bhayanga abhevilema bhapona, bhasigabhajenda bhajenda, afwamaso bhalola, bhashiinshima Ou Ngouloubhei wa hu Israeli.

³² Ou Yesu abhakwizizye abhaazyi bhakwe waga, “Eimbasaajila abhantu eibha tili teinti nanei einsiku zyonti zitatu sebhali neishalye shashounti, nanei sigaeisoungwa abhalaje nabhali nenzala bhasahazimile mwidalasa.”

³³ Abhaazyi bhakwe bhaga, “Tibhagaje hwii amakati agabhaye abhantu bhonti eibha? Eipa tilipangwelele weene,” ³⁴ OuYesu wabhabhouzya, “Muli na makati galeinga?” Bhaga, “tilinago Saba, neiswi nishee.”

³⁵ Ou Yesu wabhabhoula abhantu aje bhakhale pansi. ³⁶ Ou Yesu wega amakati gaala neiswei, wasalifya ou Ngouloubhei wameinsulanya nabhapeele abhaazyi bhakwe bhope bhabhagabhila abhantu bhonti. ³⁷ Bhonti bhalya nakute. Abhaazyi bhabhonganya amasagalizyo bhamemya eivikapo saba. ³⁸ Bhabhaliye bhaali alume eilufu zinei nkabhaazye abhashe na bhaana.

³⁹ Eipo ou Yesu wabhalaga abhantu oumwene winjila mwitouli nabhale hu Magadani.