¹ ۱۔ اتے یسوع جتھ نوں ویکھ کے پہاڑ اُتے چڑھ گیا۔ اتے جدوں بیھ گیا، اوہدے چیلے اوہدے کول آئے۔ ² ۲۔ اتے اوہ اپنا مُنھ کھول کے اوہناں نوں سکھاؤن لگا پئی۔

¹² ۱۲۔ خوشی کرو۔ کیؤں جو اسمان اُتے تہاڈا چوکھا اجر اے۔ ایس لئی پئی اوہناں نے اوہناں نبیاں نوں وی، جہڑے تہاڈے توں اگیترے سن، ایسے طراں ای ستایا سی۔

¹³ ۱۳۔ تسی دھرتی دا لُون او۔ پر جیکر لُون دا سواد مُک جاوے، تاں اوہنوں کہڑی شئے نال لُونا کیتا جاوے گا؟ فیر تاں اوہ کِسے کم دا نئیں۔ سوا ایس سے پئی اوہنوں باھر سُٹیا جاوے۔ اتے اوہ لوکاں دے پیراں ہیٹھ لتاڑیا جاوے۔ ¹⁴ ۱۴۔ تُسی جگ دا چانن او۔جہڑا شہر پہاڑ اُتے وسیا اے، لُک نئیں سکدا۔ ¹⁵ ۱۵۔ اتے لوکی دِیوا بال کے ٹھِیکردے تھلے نئیں رکھدے۔ سگوں اُتے دھردے نیں۔ تانجو اوہناں سبھناں نوں، جہڑے گھر وچ وسدے نیں، چانن اپڑائے۔ ¹⁶ ۱۶۔ ایسے طراں تہاڈا چانن بندیاں دے اگے لاٹاں مارے۔ تانجو اوہ تہاڈے چنگے کم ویکھن اتے تہاڈے رب دی، جہڑا اسمان اُتے اے، وڈیائی کرن۔

¹⁷ ۱۷۔ ایس بھلیکھے وچ نہ رہؤو پئی میں تورات یاں نبیاں دِیاں لِکھتاں نوں منسوخ کرن آیا ہاں۔ منسوخ کرن نئیں سگوں پورا کرن آیا ہاں۔ ¹⁸ ۱۸۔ کیؤں جو میں تہانوں سچی آکھناں ہاں پئی جدوں تیکر اسمان اتے دھرتی ٹل نا جاؤن، شریعت دا اِک شوشہ اُکا نا ٹلے گا، جدوں تیکر سبھ کجھ پورا نا ہَو جاوے۔ ¹⁹ ۱۹۔ مُکدی گل ایھ پئی جہڑا وی ایہناں نِکے توں نِکیاں حُکماں وچوں اِک نوں وی منسوخ کرے، اتے ایہوئی لوکاں نوں وی سِکھاوے، اوہ اسمان دی بادشاہی وچ سبھناں توں نِکا اکھواوے گا۔ پر جہڑا عمل کرے اتے سِکھاوے، اوہوئی اسمان دی بادشاہی وچ وڈا اکھواوے گا۔ ²⁰ ۲۰۔ کیؤں جو میں تہانوں آکھدا ہاں پئی جیکر تہاڈی راستی فقیہاں اتے فریسیاں دی راستی توں ودھ نا ہووے تاں تُسی اسمان دی بادشاہی وچ اُکا نئیں وڑ سکدے۔

²¹ ۲۱۔ تُسیں سُن لئیا اے پئی اگلیاں نوں آکھیا گئیا سی پئی تُوں جانوں نا مارِیں۔ اتے جہڑا وی جانوں مارے، عدالت وچ سزا پاؤن دے لائق ہووے گا۔ ²² ۲۲۔ پر میں تہانوں ایھ آکھدا ہاں پئی جہڑا وی اپنے بھرا نال غصہ ہووے، عدالت دی سزا دے لائق ہووے گا۔ اتے جہڑا وی اپنے بھرا نوں جھلّا آکھے، اوہ وڈی عدالت وچ سزا دے لائق ہووے گا۔ اتے جہڑا اوہنوں پاگل آکھے، اوہ دوزخ دی اگ دی سزا دے لائق ہووے گا۔ ²³ ۲۳۔ مُکدی گل ایھ پئی جیکر توں قربان خانے دے کول اپنی نذر لیجاویں اتے اوتھے تینوں چیتا آوے پئی میرے بھرا نوں میتھوں کجھ گِلہ اے۔ ²⁴ ۲۴۔ تاں اپنی نذر قربان خانے دے اگے چھڈ کے چلا جا۔ پہلے اپنے بھرا نال میل کر، تد آن کے اپنی نذر چاڑھ۔ ²⁵ ۲۵۔ جدوں تیکر توں اپنے دعوے دار نال رستے وچ ایں، چھیتی اوہدے نال میل کر لَے۔ تانجو اِنج نا ہووے پئی اوہ تینوں قاضی دے حوالے کر دیوے اتے قاضی تینوں سپاہی دے حوالے کر دیوے اتے توں قید خانے وچ پا دِتا جاویں۔ ²⁶ ۲۶۔ میں تینوں سچی آکھدا ہاں پئی جدوں تیکر توں کوڈی کوڈی نا موڑ دیویں، اوتھے اُکا نا چھُٹیں گا۔

²⁷ ۲۷۔ تسیں سُن لئیا اے۔ پئی آکھیا گیا سی۔ تُوں زِنا نا کرِیں۔ ²⁸ ۲۸۔ پر میں تہانوں آکھدا ہاں پئی جہڑا وی کِسے بی بی نوں بھیڑی اکھ نال ویکھے، اوہ اپنے من وچ اوہدے نال زِنا کر بیٹھا۔ ²⁹ ۲۹۔ مُکدی گل ایھ پئی جیکر تیری اکھ تینوں ٹھیڈا لؤاوے تاں اوہنوں باھر کڈھ سُٹ۔ کیؤں جو تیرے جُسے وچوں اِک دا گھٹدا رہنا تیرے لئی ایس توں چنگا اے پئی تیرا سبھو جُسا دوزخ وچ سُٹیا جاوے۔ ³⁰ ۳۰۔ جیکر تیرا سجا ہتھ تینوں ٹھیڈا لؤاوے تاں اوہنوں وڈھ دے۔ اتے اپنے نالوں سُٹ چھڈ۔ کیؤں جو تیرے جُسے وچوں اِک دا گھاٹا تیرے لئی ایس توں چنگا اے پئی تیرا سبھو جُسا دوزخ وچ سُٹیا جاوے۔

³¹ ۳۱۔ ایھ وی آکھیا گیا سی پئی جہڑا وی اپنی ووہٹی نوں چھڈنا چاہؤے، اوہنوں طلاق ناواں لِکھ دیوے۔ ³² ۳۲۔ پر میں تہانوں ایھ آکھناں ہاں پئی جہڑا وی اپنی ووہٹی نوں حرام کم دے سوائے کِسے ہَور پاروں چھڈ دیوے، اوہدے توں زِنا کراؤندا اے۔ اتے جہڑا وی اوس چھڈی ہَوئی نال ویاہ کرے، اوہ زِنا کردا اے۔

³³ ۳۳۔ فیر تسیں سُنیا اے پئی اگلیاں نوں آکھیا گیا سی پئی توں جھوٹی سونھ نا کھاوِیں۔ سگوں اپنیاں سونھواں رب لئی پورِیاں کرِیں۔ ³⁴ ۳۴۔ پر میں تہانوں آکھناں پئی اُکا سونھ نئیں کھانی۔ ناں اسمان دی، کیؤں جو اوہ رب دا تخت اے۔

³⁵ ۳۵۔ نا دھرتی دی، کیؤں جو اوہ اوہدے پیراں دی چوکی اے۔ اتے ناں یروشلیم دی۔ کیؤں جو اوہ وڈے بادشاہ دا شہر اے۔

³⁶ ۳۶۔ اتے نا اپنے سِر دی سونھ کھاوِیں۔ کیؤں جو تُوں اِک وال نوں وی چِٹا یاں کالا نئیں کر سکدا۔ ³⁷ ۳۷۔ سگوں تہاڈا کلام ہاں، ہاں ای ہووے۔ اتے ناں، ناں ای ہووے۔ کیؤں جو جو کجھ ایس توں ودھ اے، بریائی نال اے۔

³⁸ ۳۸۔ تسیں سُنیا اے پئی آکھیا گیا سی پئی اکھ دے بدلے اکھ اتے دند دے بدلے دند۔ ³⁹ ۳۹۔ پر میں تہانوں آکھناں پئی بریائی نال ٹاکرا نئیں کرنا۔ سگوں جہڑا تیری سجی گل اُتے چنڈ مارے، اوہدے ول دوجی وی پھیر دے۔ ⁴⁰ ۴۰۔ اتے جیکر کوئی عدالت وچ تیرے برخلاف دعویٰ کر کے تیرا کُڑتا لینا چاہؤے، توں اوہنوں چوغا وی لَے لئین دے۔ ⁴¹ ۴۱۔ جیکر کوئی تینوں اِک کوء بِنا اُجرت لیجانا چاہؤے، اوہدے نال دو کوء لگا جا۔ ⁴² ۴۲۔ جہڑا وی تیتھوں کجھ منگے، اوہنوں دے، اتے جہڑا تیتھوں قرض چاہؤے، اوہدے ولوں مُنھ نا موڑ۔

⁴³ ۴۳۔ تسیں سُنیا پئی آکھیا گیا سی؛ اپنے گواہنڈی نوں پیار کر اتے اپنے وَیری نال وَیر رکھ۔ ⁴⁴ ۴۴۔ پر میں تہانوں آکھناں پئی اپنے وَیری نوں پیار کرو۔ اتے ستاؤن والیاں جوگی دعا منگو۔ ⁴⁵ ۴۵۔ اتے جہڑے تہانوں ستاؤن اتے بدنام کرن، اوہناں جوگی دعا منگو۔ تانجو تسیں اپنے باپ دے، جہڑا اسمان اُتے اے، پُتر مِتھے جاؤ۔ کیؤں جو اوہ اپنے سورج نوں نیکاں اتے بداں دونہواں جوگی اُگاؤندا اے۔ اتے راستاں اتے نا راستاں دونہواں اُتے مینھ وساؤندا اے۔ ⁴⁶ ۴۶۔ کیؤں جو جیکر اوہناں نوں ای پیار کرو، جہڑے تہانوں کردے نیں تاں تہاڈے جوگی کیہ اجر اے؟ کیہ چُنگی والے وی اِنج ای نئیں کردے؟ ⁴⁷ ۴۷۔ جیکر تسیں نِرا اپنے بھراواں نوں ای سلام کرو۔ تاں تہاڈی کیہ سخاوت اے؟ کیہ بے گانیاں قوماں دے لوک وی اِنج ای نئیں کردے؟ ⁴⁸ ۴۸۔ ایس لئی تسیں کامل ہو جاؤ، جیویں تہاڈا اسمانی باپ کامل اے۔