¹ ۱۔ تد یسوع روح نال جنگل وچ اپڑایا گیا۔ تانجو شیطان اوہنوں ازمائے۔ ² ۲۔ اتے جدوں اوہنے چالِیھ دیہاڑے اتے چالِیھ راتاں دا روزہ پورا کر لئیا۔ تاں اخیر اوہنوں بھُک لگی۔ ³ ۳۔ تد ازماؤن والے نے اوہدے کول آن کے آکھیا۔ جیکر توں رب دا پُتر ایں تاں آکھ پئی ایھ رَؤڑے روٹیاں بن جاؤن۔ ⁴ ۴۔ اوہنے جواب وچ آکھیا؛ لِکھیا اے پئی بندا نِرا روٹی نال ای جیؤندا نئیں رہندا۔ سگوں ہر اِک گل، جہڑی رب دے مُنھوں نِکلدی اے۔ ⁵ ۵۔ تد شیطان اوہنوں پاک شہر وچ لے گیا۔ اتے ہیکل دے کِنگرے اُتے کھلھار کے اوہنوں آکھیا۔ ⁶ ۶۔ جیکر توں رب دا پُتر ایں تاں اپنے آپ نوں تھلے سُٹ دے۔ کیؤن جو لِکھیا اے؛ اوہنے اپنے فرشتیاں نوں تیرے پاروں حُکم دِتا اے۔ اتے اوہ تینوں ہتھاں اُتے چُک لئین گے۔ تانجو تیرے پیراں نوں کِسے رَؤڑے نال سٹ نا لگے۔ ⁷ ۷۔ یسوع نے اوہنوں آکھیا؛ ایھ وی لِکھیا اے پئی توں اپنے رب نوں نا آزمائیِں۔

⁸ ۸۔ فیر شیطان اوہنوں اِک اُچے پہاڑ اُتے لَے گیا اتے اوہنوں جگ دِیاں سبھو شاہیِاں اتے اوہناں دی ٹھاٹ باٹھ وکھائی۔ ⁹ ۹۔ اتے اوہنوں آکھیا؛ جیکر توں ڈِگ کے مینوں سِر نوائیں تاں ایھ سبھے کُجھ میں تینوں دیواں گا۔ ¹⁰ ۱۰۔ تد یسوع نے اوہنوں آکھیا؛ اے شیطان! دُور ہَو جا۔ کیؤں جو لِکھیا اے پئی توں اپنے رب اگے سِر نؤا اتے اِکو اوسے دی عبادت کر۔ ¹¹ ۱۱۔ تد شیطان اوہنوں چھڈ کے چلا گیا۔ اتے ویکھو فرشتیاں نے آن کے اوہدی سیوا کیتی۔

¹² ۱۲۔ جدوں یسوع نے سُنیا پئی یوحنا پھڑیا گیا تاں گلیِلؔ نوں ٹُر پیا۔ ¹³ ۱۳۔ اتے ناصرت نوں چھڈ کے کفرنحوم وچ جا وسیا، جہڑا جھیل دے کنڈے زبلون اتے نفتالی دی حداں وچ اے۔ ¹⁴ ۱۴۔ تانجو جو کجھ اشعیاہ نبی دی راہِیں آکھیا گیا سی اوہ پورا ہَووے۔ ¹⁷ ۱۷۔ اوسے ویلے توں یسوع نے پرچار کرن اتے ایھ آکھن شروع کیتا پئی توبہ کرو۔ کیؤں جو اسمان دی بادشاہی نیڑے آ گئی اے۔

¹⁸ ۱۸۔ اتے جدوں یسوع گلیِلؔ دی جھیل کنڈے پھردا پیا سی۔ تاں اوہنے دو بھراواں، شمعون نوں، جہڑا پطرس اکھواؤندا اے، اتے اوہدے بھرا اندریاس نوں جھیل وچ جال سُٹدے ہوئے ویکھیا۔ کیؤں جو اوہ مچھیر ے سن۔ ¹⁹ ۱۹۔ اتے اوہناں نوں آکھیاپئی میرے مگرِیں لگے آؤ۔ پئی میں تہانوں آدم گیر بناواں گا۔ ²⁰ ۲۰۔ اوہ اوسے ویلے جالاں نوں چھڈ کے اوہدے مگرِیں ٹُر پئے۔

²¹ ۲۱۔ اوتھوں اگے ودھ کے اوہنے ہَورناں دو بھراواں، زبدی دے پُتراں، یعقوب اتے اوہدے بھرا یوحنا، نوں اپنے پیؤ دے نال بیڑی اُتے اپنے جالاں دی مُرمت کردے ویکھیااتے اوہناں نوں سدیا۔ ²² ۲۲۔ اوہ اوسے ای ویلے اپنے جالاں اتے پیؤ نوں چھڈ کے اوہدے مگرِیں ٹُر پئے۔

²³ ۲۳۔ اتے یسوع کُل گلیِلؔ وچ پھِردا رہیا اتے اوہناں دے عبادت خانیاں وچ تعلیم دیندا اتے بادشاہی دی خوشخبر ی دا پرچار کردا اتے لوکاں دے ہر اِک روگ اتے کمزوری نوں دور کردا رہیا۔ ²⁴ ۲۴۔ اتے اوہدی چرچا کُل سُریا وچ ہَو گئی۔ اتے لوک سبھ روگیاں نوں، جہڑے طراں طراں دے روگاں اتے دُکھاں دے مارے سن۔ اتے بد روحؤاں دے جکڑے، اتے فالج دے ماریاں نوں اوہدے کول لئیائے۔ اتے اوہنے اوہناں نوں چنگا کیتا۔ ²⁵ ۲۵۔ اتے گلیِلؔ اتے دیکاپولس اتے یروشلیم اتے یہودیہ اتے اُردن دے پاروں وڈا جتھ اوہدے مگرِیں ٹُر پیا۔