¹ ۱۔ اوہناں دیہاڑیاں وچ یوحنا اصطباغی آیا اتے یہودیہ دے جنگل وچ پرچار کردے ہوئیاں۔ ² ۲۔ آکھن لگا۔ پئی توبہ کرو۔ کیؤں جو اسمان دی بادشاہی نیڑے آ گئی اے۔ ³ ۳۔ پئی ایھ اوہوئی اے، جہدا ذکر اشعیاہ نبی دی راہِیں کیتا گیا۔ سدن والے دی واج۔ جنگل وچ۔ رب دی راہ تیار کرو۔ اوہدی سڑک سِدھی بناؤ۔

⁴ ۴۔ ایھ یوحنا اُوٹھ دے والاں دا لباس پاؤندا اتے چمڑے دا کمر بند اپنے لک نال بنھدا سی۔ اتے ٹرِڈِیاں اتے جنگل شہد اوہدی خوراک سی۔ ⁵ ۵۔ تد یروشلیم اتے سارا یہودیہ اتے اردن دے آل دوالے دا علاقہ اوہدے کول نکل نکل کے آؤندے۔ ⁶ ۶۔ اتے اپنے گناہواں دا اقرار کردے اتے اردن دے دریا وچ اوہدے کولوں بپتسما لیندے سن۔

⁷ ۷۔ پر جدوں اوہنے ویکھیا پئی بتھیرے فریسی اتے صدوقی بپتسما لین جوگی آئے نیں تاں اوہناں نوں آکھیا۔ اوئے سپ دی اولاد! تینوں کِنھے آؤن والے غضب توں نسن جوگی آکھ دِتا؟ ⁸ ۸۔ ایس لئی توبہ دے موافق پھل پیدا کرو۔ ⁹ ۹۔ اپنے دِلوں ایھ بھُلیکھا کڈھ دیؤ پئی ابراہیم اساڈا پیؤ اے۔ کیؤں جو میں تہانوں آکھنا ہاں پئی رب ایہناں رَوڑیاں وچوں ابراہیم جوگی اولاد پیدا کر سکدا اے۔ ¹⁰ ۱۰۔ اتے ہُن رُکھاں دی جڑ اُتے کؤاڑا رکھیا ہَویا اے۔ مُکدی گل ایھ پئی ہر اِک رُکھ، جہڑا چنگا پھل نئیں دیندا، وڈیا اتے اَگ وچ سُٹیا جاوے گا۔

¹¹ ۱۱۔ میں تاں تہانوں توبہ لئی پانی نال بپتسما دیناں ہاں پر جہڑا میرے مگروں آؤندا اے، اوہ میتھوں زوراور اے۔ پئی میں تاں اوہدی جُتی چُکن دے وی لائق نئیں۔ اوہ تہانوں پاک روح اتے اَگ نال بپتسما دیوے گا۔ ¹² ۱۲۔ اوہدا چھج اوہدے ہتھ وچ اے، اتے اوہ اپنے کھتے نوں چنگا صاف کرے گا۔ اتے کنک نوں کھتے وچ کٹھا کرے گا۔ پر تُوڑی نوں اوس اَگ وچ ساڑے گا، جہڑی بُجھدی نئیں۔

¹³ ۱۳۔ تد یسوع گلِیلؔ توں اُردن دے کنڈے یوحنا کول آیا۔ تانجو اوہدے توں بپتسما لَؤے۔ ¹⁴ ۱۴۔ پر یوحنا نے اوہنوں موڑ کے آکھیا پئی میں تاں آپ تیتھوں بپتسما لیئن دا محتاج ہاں اتے توں میرے کول آیا ایں؟ ¹⁵ ۱۵۔ یسوع نے جواب وچ اوہنوں آکھیا۔ ہُن تاں ایھ ہَؤن ای دے۔ کیؤں جو ایھ چنگی گل اے پئی اسیں ساری راستبازی پوری کرِیئے۔تد اوہنے اِنج ہؤن دِتا۔

¹⁶ ۱۶۔ اتے یسوع بپتسما لے کے یکدم پانی وچوں نکل کے باھر آیا۔ اتے ویکھو اوہدے جوگی اسمان کھُل گیا اتے اوہنے رب دے روح رُوح نوں کبوتر دے روپ وچ لتھدے ہوئیاں اتے اپنے اُتے آؤندیاں ویکھیا۔ ¹⁷ ۱۷۔ اتے ویکھو اسمان توں اِک واج اجیہی آئی پئی ایھ میرا پُتر اے۔ سبھناں توں پیارا، جہدے توں میں خوش ہاں۔