¹ ۱۔ اتے جدوں یسوع ہیرودیس بادشاہ دے ویلے یہوداہ دے بیت لحم وچ جمیا۔ تاں ویکھو پُورب توں کِنے ای مجوسیاں نے یروشلیم وچ آن کے آکھیا۔ ² ۲۔ پئی یہودیاں دا بادشاہ، جہڑا جمیا اے، اوہ کِتھے اے؟ کیؤں جو اسیں پورب وچ اوہدا تارا ویکھیا اتے اوہدے اگے سِر نؤان آئے ہاں۔

³ ۳۔ جدوں ہیرودیس بادشاہ نے ایھ سُنیا تاں اوہ اتے اوہدے نال سبھے یروشلیم گھبرایا۔ ⁴ ۴۔ تد اوہنے سبھو سردار کاہناں اتے قوم دے فقیہاں نوں کٹھا کر کے اوہناں توں پُچھیا پئی مسیح دا جنم کِتھے ہؤنا چاہیدا اے؟ ⁵ ۵۔ اوہناں نے اوہنوں آکھیا: یہوداہ دے بیت لحم وچ۔ کیؤں جو نبی دی راہِیں اِنج لکھیا اے پئی۔ ⁶ ۶۔ اے بیت لحم! یہوداہ دی دھرتی! توں یہوداہ دے وڈیاں وچوں اُکا گھٹ نئیں۔ کیؤں جو تیرے وچوں اِک حاکم نکلے گا، جہڑا میری اُمت اسرائیل دا ایالی ہووے گا۔

⁷ ۷۔ تد ہیرودیس نے مجوسیاں نوں چُپ چپیتے سد کے اوہناں توں پُچھ پڑتیت کیتی پئی اوہ تارا کِس ویلے وکھالی دِتا سی؟ ⁸ ۸۔ اتے ایھ آکھ کے اوہناں نوں بیت لحم وچ گھلیا پئی جا کے اوس بال دے بارے چنگی طراں کھوج کرو اتے جدوں اوہ لبھے تاں مینوں وی خبر دیؤ پئی میں وی آن کے اوہدے اگے سِر نواواں۔

⁹ ۹۔ اوہ بادشاہ توں ایھ سُن کے ٹُر پئےاتے ویکھو اوہ تارا، جہڑا اوہناں نے پورب وچ ویکھیا سی، اوہناں دے اگے اگے ٹُریا۔ ایتھوں تیک پئی اوس تھاں اُتے اپڑ کے کھلو گئیا، جتھے اوہ بالک سی۔ ¹⁰ ۱۰۔ اوہ تارے نوں ویکھ کے بتھیرے خوش ہَوئے۔ ¹¹ ۱۱۔ اتے اوس گھر وچ جا کے اوس بال نوں اوہدی ماں مریم دے کول ویککھیا۔ اتے اوہدے اگے ڈِگ کے سر نوایا۔اتے اپنے ڈبے کھول کے سونا، اتے لوبان اتے مُر اوہدے اگے نذر چاڑھیا۔ ¹² ۱۲۔ اتے سُفنے وچ ہدایت لے کے پئی ہیرودیس کول نا جانا، اوہ دُوجی راہِیں پِچھاں اپنے دیس نُوں مُڑ گئے۔

¹³ ۱۳۔ جدوں اوہ ٹُر پئے تاں ویکھو رب دے اِک فرشتے نے یوسف نوں سُفنے وچ وکھالی دے کے آکھیا؛ اُٹھ بال اتے اوہدی ماں نوں نال لے کے مِصر ول نس جا۔ اتے اوتھے ٹِک جا۔ جد تیکر پئی میں تینوں نا آکھاں۔ کیؤں جو اِنج ہَؤنا اے پئی ہیرودیس بال نوں لبھے گا تانجو ایہنوں جانوں مارے۔ ¹⁴ ۱۴۔ تد اوہ اُٹھ کے راتوں رات بال اتے اوہدی ماں نوں نال لے کے مصر ول ٹُر پیا۔ ¹⁵ ۱۵۔ اتے ہیرودیس دے مرن تیکر اوتھے ای ٹِکیا۔ تانجو جو کجھ رب نے نبی دی راہِیں آکھیا سی، اوہ پورا ہَوئے پئی میں اپنے پُتر نوں مصر توں سدیا۔ ¹⁶ ۱۶۔ جدوں ہیرودیس نے ویکھیا پئی مجوسیاں نے میرے نال جھیڈ کیتی تاں ڈاھڈا غصے ہَویا۔ اتے بندے گھل کے بیت لحم اتے اوہدے آل دوالے دِیاں حداں اندر سبھ مُنڈیاں نوں جانوں مروا دِتا، جہڑے دو دو ورہیاں یاں ایس توں نِکے سن۔ اوس ویلے دے حساب نال، جدوں اوہنے مجوسیاں توں پُچھ پڑتیت کیتی سی۔ ¹⁷ ۱۷۔ تد اوہ، جو ارمیاہ نبی دی راہِیں آکھیا گیا سی، پورا ہَوئیا پئی۔ ¹⁹ ۱۹۔ جدوں ہیرودیس مؤیا تاں ویکھو رب دے اِک فرشتے نے مصر وچ یوسف نوں سُفنے اندر وکھالی دے کے آکھیا۔ ²⁰ ۲۰۔ اُٹھ! بال اتے اوہدی ماں نوں نال لے کے اسرائیل دے دیس وچ جا۔ کیؤں جو جہڑے بال دی جان دے وَیری سن، اوہ مر گئے نیں۔ ²¹ ۲۱۔ تد اوہ اُٹھیااتے بال اتے اوہدی ماں نوں نال لے کے اسرائیل دے دیس وچ آیا۔

²² ۲۲۔ پر جدوں سُنیا پئی ارکیلاؤس اپنے پیؤ دی تھاں یہودیہ وچ بادشاہی کردا اے۔ تاں اوتھے جاؤن توں ڈریا اتے سُفنے وچ ہدایت لے کے گلیِلؔ دے علاقے ول روانا ہَویا۔ ²³ ۲۳۔ اتے ناصرت ناں دے اِک شہر وچ جا وسیا تانجو جو کجھ نبیاں دی راہِیں آکھیا گیا سی، اوہ پورا ہووے پئی اوہ ناصری اکھواوے گا۔