¹ ۱۔چھ دِناں مگروں یسوع پطرس، یعقوب اتے اوہدے بھرا نوں نال لے کے اُچی پہاڑی اُتے وکھریاں لے گئیا۔ ² ۲۔اتے اوہناں دے ساہمنے اوہدی رَؤ پھِر پرت گئی اتے اوہدے لیڑے نور وانگوں لاٹاں مارن لگ پئے۔ ³ ۳۔ اتے ویکھو! موسیٰ اتے ایلیاہ اوہدے نال گلاں کردے ڈِٹھے گئے۔ ⁴ ۴۔پطرس نے یسوع نوں آکھیا پئی خداوندا! ساڈا ایتھے رہنا چنگا اے۔ جیکر تیری رضا ہووے تے ایتھے تِن ڈیرے بناواں گا۔ اِک تیرے جوگی، اِک موسیٰ جوگی اتے اِک ایلیاہ جوگی۔

⁵ ۵۔ اوہ ایھ آکھ ای رہیا سی پئی اِک نورانی بدلی نے اوہناں اُتے چھاں کر لئی اتے اوس بدلی وچوں واج آئی پئی ایھ میرا محبوب پُتر اے۔ایہدی سُنو۔ ⁶ ۶۔ چیلے ایھ سُن کے مُدھڑے مُونھ جا پئے اتے بتھیرا ڈر گئے۔

⁷ ۷۔ تد یسوع نے نیڑے آ کے اوہناں نوں آکھیا پئی اُٹھو۔ نا ڈرو۔ ⁸ ۸۔ جدوں اوہناں نے اکھاں چُکیاں اتے یسوع دے باہجھ کوئی ہور نہ ڈِٹھا۔

⁹ ۹۔ جدوں اوہ پہاڑ توں لھ رہے سن تد یسوع نے اوہناں نوں ایھ حکم دِتا پئی جدوں تیک آدم دا پُتر موئیاں وِچوں جیو نہ پوے، جو کجھ تُسی ویکھیا اے، کِسے نوں نا دسنا۔

¹⁰ ۱۰۔ چیلیاں نے اوہنوں پُچھیا پئی فیر فقیہ کیؤں آکھدے نیں پئی ایلیاہ دا پہلوں آؤنا لازمی اے؟

¹¹ ۱۱۔اوہنے آکھیا پئی ایلیاہ آوے گا اتے سبھ کجھ ٹھیک کرے گا۔ ¹² ۱۲۔ پر میں تہانوں آکھناں پئی ایلیاہ تاں آ وی گئیا اے، اتے اوہناں نے اوہناں نئیں جانیا۔ سگوں جو چاہیا، اوہدے نال کیتا۔ ایسے طراں آدم دا پُتر وی اوہناں ہتھوں دکھ سہوے گا۔ ¹³ ۱۳۔فیر چیلے جان گئے پئی اوہنے یوحنا بپتسما دین والے بارے آکھیا اے۔

¹⁴ ۱۴۔ جدوں اوہ رُکھ کول اپڑیا تاں اِک بندا اوہدے کول آیا تاں اوہدے اگے گوڈے نِوا کے آکھن لگا ۔ ¹⁵ ۱۵۔ اے خداوندا! میرے پُتر اُتے رحم کر۔ کیؤں جو اوہنوں مِرگی پیندی اے اتے اوہ ڈاہڈا دُکھ سہندا اے۔ ایس پاروں اوہ اگ اتے پانی وِچ ڈِگ پیندا اے۔ ¹⁶ ۱۶۔ میں اوہنوں تیرے چیلیاں کول لئیایا ساں پر اوہ اوہنوں چنگا نئیں کر سکے۔

¹⁷ ۱۷۔ یسوع نے جواب دِتا پئی اے بھروسے توں خالی اتے گُمرا نسل! میں کدوں تیک تہاڈے نال رہواں گا اتے کدوں تیک تہانوں سہواں گا؟ ایہنوں میرے کول لئیاؤں۔ ¹⁸ ۱۸۔ تد یسوع نے اوہنوں جھِڑکیا اتے بُری روح اوہدے وچوں نکل گئی۔ اتے اوہ مُنڈا اوسے ای ویلے چنگا ہو گئیا۔

¹⁹ ۱۹۔ تد چیلیاں نے لوکاں توں وکھ ہو کے یسوع نوں آن پُچھیا پئی اسی اوس بُری روح نوں کیؤں نا کڈھ سکے؟

²⁰ ۲۰۔ یسوع نے اوہناں نوں آکھیا پئی تُسی اپنے بھروسے دے گھاٹے پاروں نا کڈھ سکے۔ میں تہانوں سچی سچی آکھاں پئی جیکر تہاڈے وچ رائی دے دانے بروبر وی بھروسا ہووے تاں تسی ایس پہاڑ نوں آکھو پئی ایتھوں اوتھے جا لگ تاں اوہ جا لگے گا۔ اتے کوئی گل اجیہی نا ہووے گی، جنھوں انہونی آکھدے نیں۔ ²¹ ۲۱۔ پر ایہہ شئے دعا اتے روزے باہجھوں نئیں کڈھی جا سکدی۔

²² ۲۲۔ اتے جدوں اوہ گلیل وچ رُکے ہَوئے سن۔ تد یسوع نے اوہناں نوں آکھیا: لازمی اے پئی ابنِ آدم بندیاں دے حوالے کیتا جاوے۔ ²³ ۲۳۔ اتے اوہ اوہنوں جانوں مار دین گے اتے اوہ تیجے دیہاڑے جیو پؤے گا۔ ایس گل اُتے اوہ چوکھے رِنج ہَوئے۔

²⁴ ۲۴۔ جدوں اوہ کفرنحوم وچ اپڑے تاں دو دِرہم لین والیاں نیں پطرس کول آن کے آکھیا پئی کیہ تہاڈا مُرشد دو دِرہم نئیں دیندا؟ ²⁵ ۲۵۔ اوہنے آکھیا پئی دیندا اے۔ اتے جدوں اوہ گھر اپڑیا تاں یسوع نے پہلوں ای آکھ دِتا پئی اے شمعون! توں کیہ آکھدا ایں؟ جگ دے راجے کِنھاں توں چُنگی یاں جزیہ لیندے نیں؟ اپنے پُتراں توں یاں بیگانیاں توں؟

²⁶ ۲۶۔ جدوں اوہنے آکھیا پئی بیگانیاں توں۔ تاں یسوع نے آکھیا پئی فیر تاں پُتر بَری ہَوئے۔ ²⁷ ۲۷۔ ایس پاروں تاں جو اوہناں نوں موقعا نہ مِلے۔ تُوں جا کے کنڈا سُٹ اتے جیہڑی مچھی سبھناں توں پہلوں نکلے اوہنوں وکھ کر کے اوہدا مُونھ کھولِیں تاں اوہدے مُونھ وچ دِرہم ہَؤن گے۔ اوہو ای لئیا کے اوہناں نوں دے دے۔