¹ ۱۔ اوسے ای گھڑی چیلیاں نے یسوع کول آن کے آکھیا پئی اسمان دی بادشاہی وچ سب توں وڈا کون اے؟

² ۲۔ اتے یسوع نے اک بال نوں اپنے کول سد کے اوہناں دے وچ کار کھلاھریا۔ ³ ۳۔ اتے آکھیا پئی میں تہانوں سچی آکھدا ہاں پئی جیکر تُسی نا مُڑو اتے نِکے بالاں ورگے نا بنو تاں اسمان دی بادشاہی وچ اُکا نا وڑو گے۔ ⁴ ۴۔ ہُن جیہڑا وی اپنے آپ نوں ایس بال وانگ نِکا بنائے، اوہو ای اسمان دی بادشاہی وچ سبھناں نالوں وڈا اے۔ ⁵ ۵۔ اتے جیہڑا وی میرے ناں توں اجیہے بالاں نوں قبُولے، مینوں قبولدا اے۔

⁶ ۶۔ پر جیہڑا وی، اوہناں نِکیاں وچوں، جیہڑے میرے اُتے بھروسا رکھدے نیں، ٹھیڈا لواؤندا اے، اوہدے جوگی ایہوئی چنگا اے پئی چکی دا پتھر اوہدے گلے وچ پا دِتا جاوے اتے اوہنوں سموندر دے ڈُونگھ وچ ڈوب دِتا جاوے۔ ⁷ ۷۔ ٹھیڈَیاں پاروں جگ اُتے ہاڑا! کیوں جو ٹھیڈے لگنا تاں پکا اے۔ پر ہاڑا اوس جی اُتے، جہدے پاروں لگے۔ ⁸ ۸۔ ہُن جیکر تیرا ہتھ یاں تیرا پیر تینوں ٹھیڈا لوائے تاں اوہنوں وڈھ کے سُٹ دے۔ کیوں جو ٹُنڈا یاں لنگڑا ہو کے ابدی حیاتی وچ وڑنا تیرے جوگی ایس گلوں چنگا اے پئی توں دو ہتھ یاں دو پیر رکھدا ہویا ہمیشاں دی اگ وچ سُٹیا جاویں۔ ⁹ ۹۔ اتے جیکر تیری اکھ تینوں ٹھیڈا لوائے تاں اوہنوں کڈھ کے سُٹ دے۔ کیوں جو کانا ہو کے ابدی حیاتی وچ وڑنا تیرے جوگی ایس گلوں چنگا اے پئی توں دو اکھاں رکھدا ہویا دوزخ دی اگ وچ سُٹیا جاویں۔

¹⁰ ۱۰۔ خبردار! ایہناں نِکیاں وچوں کِسے نوں وی ماڑا نا جانیو۔کیوں جو میں تہانوں آکھدا ہاں پئی اسمان اُتے اوہناں دے فرشتے میرے اسمانی باپ دا مُنھ ہمیشاں تکدے رہندے نیں۔ ¹¹ ۱۱۔ کیوں جو ابنِ انسان ایس لئی آیا اے پئی گواچیاں ہوئیاں نوں لبھے۔ ¹² ۱۲۔ تہاڈا کیہ وچار اے؟ جیکر کِسے بندے دِیاں سو بھیڈا ہؤن۔ اتے اوہناں وچوں اک گواچ جاوے تاں کیہ اوہ نڑینوے بھیڈاں نوں پہاڑاں اُتے نا چھڈے گا اتے اوس گواچی ہوئی بھیڈ نوں لبھن نا جاوے گا؟ ¹³ ۱۳۔ اتے جیکر اِنج ہووے پئی اوہ اوہنوں لبھ جاوے تاں میں تہانوں سچی آکھدا ہاں پئی اوہ اوہناں نڑینوے بھیڈاں توں جہڑیاں گواچیاں نئیں، چوکھا خوش ہووے گا۔ ¹⁴ ۱۴۔ ایسے طراں تہاڈا اسمانی باپ جہڑا اسمان اُتے اے، نئیں چاہؤندا پئی ایہناں نِکیاں وچوں اِک وی مرے۔

¹⁵ ۱۵۔ ہُن جیکر تیرا بھرا گناہ کرے تاں جا اتے اوہنوں وکھریاں سمجھا۔ جیکر اوہ تیری سُنے تاں تینوں تیرا بھرا لبھ گیا۔ ¹⁶ ۱۶۔ اتے جیکر اوہ نا سُنے تاں اِک یاں دو جی نال لیجا تاں جو ہر اِک گل دو یاں تِن گواہواں دے مُونھوں وی پکی ہو جاوے۔ ¹⁷ ۱۷۔ جیکر اوہ اوہناں دی وی نا سُنے تاں کلیسیاء نوں آکھ۔ اتے جیکر اوہ کلیسیاء دی وی نا سُنے تاں اوہنوں مُشرِک اتے چُنگی وان دے بروبر جان۔ ¹⁸ ۱۸۔ میں تہانوں سچی آکھدا ہاں پئی جو کجھ تُسی زمین اُتے بنھو گے، اوہ اسمان اُتے بَجھا رہوے گا۔ اتے جو کجھ تسی زمین اُتے کھولو گے، اوہ اسمان اُتے کھُلا رہوے گا۔ ¹⁹ ۱۹۔ فیر میں تہانوں آکھدا ہاں پئی جیکر تہاڈے وچوں دو جی زمین اُتے اتفاق کر لئین۔ تاں جو کجھ وی منگن گے اوہ میرے اسمانی باپ کولوں حاصل کر لئین گے۔ ²⁰ ۲۰۔ کیوں جو جِتھے دو یاں تِن میرے ناں توں کٹھے ہؤن، اوتھے میں اوہنوں دے وچکار ہاں۔

²¹ ۲۱۔ تد پطرس نے کول آن کے اوہنوں پُچھیا پئی اے خداوند! کِنی واری میرا بھرا میرا گُناہ کرے تاں میں اوہنوں معاف کراں؟ کیہ ست وار؟

²² ۲۲۔ یسوع نے اوہنوں آکھیا پئی میں تینوں ایہہ نئیں آکھدا پئی ست وار۔ سگوں ست وار دے وی ستّر وار تیکر معاف کر۔ ²³ ۲۳۔ ایس لئی اسمان دی بادشاہی اوس بادشاہ وانگ اے، جنھے اپنے نؤکراں کولوں حساب لینا سی۔ ²⁴ ۲۴۔ تاں جدوں اوہ حساب لئین لگا تاں اوہدے اگے دس ہزار قنطاراں دا قرضئی پیش کیتا گیا۔ ²⁵ ۲۵۔ اتے اوہدے کول ادا کرن لئی کجھ وی نئیں سی۔ ایس لئی اوہنے حکم کیتا پئی ایہنوں اتے ایہدی ووہٹی اتے بالاں اتے ایہدا سبھ کجھ ویچ کے قرض وصولی کیتی جاوے۔ ²⁶ ۲۶۔ پر اوس نؤکر نے ڈِگ کے منت کیتی اتے آکھیا پئی میرے ولوں ٹھنڈ رکھ۔ اتے میں سبھ قرضا موڑ دیواں گا۔ ²⁷ ۲۷۔ مالک نے ترس کھا کے اوہنوں چھڈ دِتا اتے اوہدا قرض وی معاف کر دِتا۔ ²⁸ ۲۸۔ پر جدوں اوہ نؤکر باھر نِکلیا۔ تاں اوہدے سنگی نؤکراں وچوں اِک اوہنوں مِلیا، جنھے اگوں اوہدا کوئی اِک سو دِینار قرض دینا سی۔ اوہنے اوہنوں پھڑیا اتے اوہدا گلا گھُٹ کے آکھیا پئی مینوں میرا حساب دے۔

²⁹ ۲۹۔ تد اوہدے سنگی نؤکر نے ڈِگ کے اوہدی منت کیتی اتے آکھیا پئی میرے ولوں ٹھنڈ رکھ۔ میں تینوں سبھ قرضا مَوڑ دیواں گا۔ ³⁰ ۳۰۔ پر اوہ نا منیا۔ سگوں لئجا کے اوہنوں جیلے بند کرا دِتا۔ ³¹ ۳۱۔ اوہدے سنگی نؤکراں نے ایہہ سبھ ویکھیا اتے رِنج ہَوئے۔ اتے آن کے مالک نوں سبھ کجھ دس دِتا۔

³² ۳۲۔ تد مالک نے اوہنوں سدایااتے آکھیا پئی تُوں بوہت شریر ایں۔ میں تینوں ایس لئی قرضا چھڈیا کیؤں جو توں میری منت کیتی۔ ³³ ۳۳۔ تاں کیہ تینوں روا نئیں سی پئی جیویں میں تیرے اُتے رحم کیتا، توں وی اپنے سنگی اُتے رحم کردا؟ ³⁴ ۳۴۔ اتے مالک نے غصے ہو کے اوہنوں جلّاداں دے حوالے کیتا۔ تد تیک پئی سبھ قرضا موڑ نی دیوے۔ ³⁵ ۳۵۔ میرا اسمانی باپ وی تہاڈے نال اِنج ای کرے گا۔ جیکر تہاڈے وچوں ہر کوئی اپنے بھرا نوں دِلوں معاف نا کر دیوے۔