¹ ۱۔ اتے فریسی اتے صدوقی آزماؤن جوگی کول آئے اتے منت کیتی پئی سانوں اسمان توں کوئی نشانی وکھا۔

² ۲۔ پر اوہنے جواب وچ اوہناں نوں آکھیا؛ تسیں سورج ڈُبن ویلے آکھدے او پئی بدل نئیں آؤنا۔ کیؤں جو اسمان لال اے۔ ³ ۳۔ اتے سویرے ایھ آخھدے او پئی اج نھیری نئیں وگے گی۔ کیؤں جو اسمان لال اتے دُھندیالا اے۔ تسیں اسمان دی شکل ویکھ کے ویروے کڈھدے اتے جانَدے او پر ویلے اتے نشانیاں نئیں جان سکدے؟ ⁴ ۴۔ ایھ بھیڑی اتے بدکار پِیڑھی نشانی منگدی اے۔ اتے یوناہ نبی دے نشان باہجھوں کوئی ہؤر نشان ایہنوں نئیں جاوے گا۔ اتے اوہ اوہناں نوں چھڈ کے چلا گیا۔

⁵ ۵۔ اتے چیلے پار جاؤندے ویلے نال روٹی لینا بھُل گئے سن۔ ⁶ ۶۔ تد یسوع نے اوہناں نوں آکھیا؛ خبردار! فریسیاں اتے صدوقیاں دے خمیر تھو بچو۔

⁷ ۷۔ اتے اوہ آپو وچ آڈھن لگے پئی اسیں روٹی نئیں لئیائے۔

⁸ ۸۔ مُکدی گل ایھ پئی یسوع نے ایھ جانَدے ہوئے آکھیا پئی اے گھٹ ایمان والیو! تسیں آپو وچ کیؤں آدھا لاؤندے او پئی روٹی نئیں؟ ⁹ ۹۔ کیہ اجے تیکر نئیں سمجھے؟ اتے اوہناں پنج ہزاراں جوگی پنج روٹیاں تہانوں چیتے نئیں؟ اتے ناں ای ایھ پئی تسیں کِنیاں ٹوکریاں چُکیاں؟ ¹⁰ ۱۰۔ اتے ناں ای اوہناں چار ہزاراں دِیاں ست روٹیاں؟ اتے ناں ایھ پئی تسیں کِنے ٹوکرے چُکے؟ ¹¹ ۱۱۔ کِس پاروں تسیں ایھ نئیں سمجھدے؟ پئی میں تہانوں روٹی بارے نئیں آکھیا پئی تسیں فریسیاں اتے صدوقیاں دے خمیر توں خبردار رہؤ۔ ¹² ۱۲۔ تد اوہ سمجھ گئے پئی اوہنے روٹی دے خمیر توں نئیں سگوں فریسیاں اتے صدوقیاں دی تعلیم توں خبردار رہن نوں آکھیا اے۔

¹³ ۱۳۔ جد یسوع قیصریہ فلپی دے علاقے وچ آیا تاں اوہنے اپنے چیلیاں توں پُچھیا پئی لوک ابنِ انسان نوں کیہ آآخھدے نیں؟

¹⁴ ۱۴۔ اوہناں آکھیا پئی کجھ تاں یوحنا بپتسما دین والا آکھدے نیں۔ کجھ ایلیاہ، کجھ یرمیاہ یاں نبیاں وچوں کوئی۔

¹⁵ ۱۵۔ اوہنے اوہناں نوں آکھیا۔ پر تسیں مینوں کیہ آکھدے او؟

¹⁶ ۱۶۔ شمعون پطرس نے جواب وچ آکھیا پئی توں جیؤندے رب دا پُتر مسیح ایں۔

¹⁷ ۱۷۔ تاں یسوع نے جواب وچ اوہنوں آکھیا؛ دھن ایں توں یوناہ دے پُتر شمعون! کیؤں جو ایھ گل جُسے اتے لہؤ نے نئیں سگوں میرے باپ نے، جہڑا اسمان اُتے اے، تیرے دل وچ پائی۔ ¹⁸ ۱۸۔ اتے میں تینوں آکھدا ہاں پئی توں کیفا ایں، اتے میں ایس پتھر اُتے اپنی کلیسیاء بناواں گا۔ اتے دھرتی دی ڈُونگیائی دے بُوہے ایہدے اُتے وس نئیں پا سکن گے۔ ¹⁹ ۱۹۔ اتے میں اسمان دی بادشاہی دی کُنجیاں تینوں دیواں گا۔ اتے جو کجھ توں دھرتی اُتے بنھیں گا، اوہ اسمان اُتے بَجھ جاوے گا۔ اتے جو کجھ توں دھرتی اُتے کھولیں گا، اوہ اسمان اُتے کھُلیا رہوے گا۔ ²⁰ ۲۰۔ تد اوہنے چیلیاں نوں حکم دِتا پئی کِسے نوں نئیں دسنا پئی میں مسیح ہاں۔

²¹ ۲۱۔ اوس ویلے توں یسوع اپنے چیلیاں نوں دسن لگا؛ ضرور اے پئی میں یروشلیم نوں جاواں اتے وڈیریاں اتے سردار کاہناں اتے فقیہاں دے ہتھوں ڈاھڈا دُکھ چُکاں اتے جانوں ماریا جاواں۔ اتے تِیجے دیہاڑے جیؤ پواں۔ ²² ۲۲۔ ایس گل اُتے پطرس اوہنوں وکھ لیجاکے رِنج ہؤن لگا اتے آکھیا؛ اے مالک! توں جیؤندا رہوَیں۔ ایھ سبھو کجھ تیرے نال ناں ہووے۔

²³ ۲۳۔ اوہنے مُڑ کے پطرس نوں آکھیا؛ اے شیطان! میرے اگوں دور ہو۔ توں میرے جوگی ٹھیڈے دا سبب ایں۔ کیؤں جو توں رب دِیاں گلاں دا نئیں سگوں بندیاں دِیاں گلاں دا وچار کرنا ایں۔

²⁴ ۲۴۔ تد یسوع نے اپنے چیلیاں نوں آکھیا جیکر کوئی میرے مگرِیں آؤنا چاہؤے تاں اوہ اپنی خودی دا انکار کرے۔ اتے اپنی سُولی چُکے اتے میرے مگرِیں ٹُر پؤے۔ ²⁵ ۲۵۔ کیؤں جو جہڑا وی اپنی جان بچاؤنا چاہؤندا اے اوہ اوہنوں گئواوے گا۔ اتے جہڑا وی میرے جوگی اپنی جان گئواوے گا، اوہنوں بچاوے گا۔ ²⁶ ۲۶۔ کیؤں جو بندے نوں کیہ فیدا اے، جیکر اوہ کُل جَگ کما لئوے۔ پر اپنی جان دا نقصان چُکے۔ یاں بندا اپنی جان دے بدلے کیہ دے سکدا اے؟ ²⁷ ۲۷۔ کیؤں جو ابنِ انسان اپنے باپ دے جلال وچ فرشتیاں نال آوے گا۔ اتے تد ہر اِک نوں اوہدے کماں دے موافق بدلہ دیوے گا۔ ²⁸ ۲۸۔ میں تہانوں سچی آکھدا ہاں پئی جہڑے ایتھے کھلوتے نیں، اوہناں وچوں کجھ اجیہے نیں پئی جدوں تیکر ابنِ انسان نوں اپنی بادشاہی وچ آؤندے ناں ویکھ لین، موت دا مزہ نئیں چکھن گے۔