باب ۱۵
1
۱۔ تد یروشلیم توں فریسیاں اتے فقیہاں نے یسوع کول آن کے آکھیا۔
2
۲۔ تیرے چیلے وڈیریاں دی روایت کیؤں نئیں منَدے۔ کیؤں جو اوہ روٹی کھاؤن ویلے ہتھ نئیں دھؤندے۔
3
۳۔ پر اوہنے اوہناں نوں جواب وچ آکھیا پئی فیر تسیں کیؤں اپنی روایت نال رب دا حکم نئیں منَدے؟ کیؤں جو رب نے آکھیا اے پئی۔
4
۴۔ توں اپنے پیؤ اتے اپنی ماں دی عزت کر۔ اتے جہڑا وی پیؤ یاں ماں نوں مندا آکھے، اوہ ضرور جانوں ماریا جاوے۔
5
۵۔ پر تسیں آکھدے اوپئی جہڑا وی پیؤ یاں ماں نوں آکھے پئی میری جہڑی شئے توں تینوں نفع ہو سکدا سی، اوہ رب دی نذر ہو گئی اے۔
6
۶۔ تاں اوہ اپنے پیؤ یاں ماں دی عزت ناں کرے۔ مُکدی گل ایھ پئی تسیں اپنی روایت پاروں رب دے حکم نون جھوٹا کر دیندے او۔
7
۷۔ اے رِیاکارو! یسعیاہ نے تہاڈے بارے نبوّت کر کے کِنا چنگا آکھیا پئی۔
8
۸۔ ایھ قوم بُلھاں نال تاں میری وڈیائی کردی اے۔ پر ایہناں دا دل میتھوں دور اے۔
9
۹۔ مُکدی گل ایھ پئی ایھ بے فیدا میری عبادت کردے نیں۔ کیؤں جو بندیاں دے حکماں دی سِیکھ دیندے نیں۔
10
۱۰۔ تد اوہنے جتھے نوں اپنے کول سد کے آکھیا پئی سُنو اتے سمجھو۔
11
۱۱۔ جہڑی شئے مُنھ وچ جاؤندی اے، اوہ بندے نوں ناپاک نئیں کردی۔ سگوں جہڑی مُنھ وچوں نِکلدی اے، اوہوئی بندے نوں ناپاک کردی اے۔
12
۱۲۔ تد چیلیاں نے کول آن کے اوہنوں آکھیا؛ کیہ توں جانَدا ایں پئی فریسیاں نے ایھ گل سُن کے ٹھیڈا کھاہدا اے؟
13
۱۳۔ پر اوہنے جواب دِتا؛ جہڑا بُوٹا میرے اسمانی باپ نے نئیں لایا، اوہ جڑوں پُٹیا جاوے گا۔
14
۱۴۔ اوہناں نوں جاؤن دیؤ۔ اوہ انھے انھیاں دے آگُو نیں۔ اتے جیکر انھا انھے دی اگوائی کرے، تاں دونویں کھڈے وچ ڈِگن گے۔
15
۱۵۔ فیر پطرس نے آکھیا پئی ایھ مثال سانوں سمجھا دے۔
16
۱۶۔ تاں اوہنے آکھیا پئی کیہ تسیں وی ہُن تیکر نا سمجھ او؟
17
۱۷۔ کیہ تسیں نئیں سمجھدے؟ پئی جو کجھ مُنھ وچ جاؤندا اے، اوہ ڈِھڈ وچ جاؤندا اتے ہگن نال نِکل جاؤندا اے۔
18
۱۸۔ پر جہڑیاں گلاں مُنھ وچوں نِکلدیاں نیں، اوہ دل وچوں نِکلدیاں نیں۔ اتے اوہوئی بندے نوں ناپاک کردِیاں نیں۔
19
۱۹۔ کیؤں جو بھیڑے متے مُنھ وچوں نِکلدے نیں۔ مطلب خون خرابے، زِنا کاریاں، بدکارِیاں، چورِیاں، جھوٹیاں گواہیاں، کُفر۔
20
۲۰ ایہوئی گلاں نیں، جہڑیاں بندے نوں ناپاک کردیاں نیں۔ پر بنا ہتھ دھوئے کھاؤنا انسان نوں ناپاک نئیں کردا۔
21
۲۱۔ اتے یسوع اوتھوں روانا ہو کے صور اتے صیدا دے علاقے وچ گیا۔
22
۲۲۔ اتے ویکھو! اِک کنعانی بی بی، جہڑی اوس دیس دی سی، اُچی آکھن لگی پئی اے مالک! داؤد دے پُتر! میرے اُتے رحم کر۔ میری دھی نوں اِک بد روح ڈاھڈا ستاؤندی اے۔
23
۲۳۔ پر اوہنے اوہنوں کجھ جواب ناں دِتا۔ تد اوہدے چیلیاں نے کول آن کے اوہدی منت کیتی اتے آکھیا پئی ایہنو گھل دے۔ کیؤں جو اوہ ساڈے مگرِیں چیکدی پئی اے۔
24
۲۴۔ اوہنے جواب وچ آکھیا پئی میں اسرائیل دے گھر دِیاں گواچیاں بھیڈاں دے سوا ہؤر کِسے جوگی نئیں گھلیا گیا۔
25
۲۵۔ پر اوہ آئی اتے سِر نؤا کے آکھیا۔ اے مالک! میری مدد کر۔
26
۲۶۔ اوہنے جواب وچ آ کھیا پئی بالاں دی روٹی لے کے کتُوریاں اگے سُٹنا چنگا نئیں۔
27
۲۷۔ تاں اوہنے آکھیا۔ سچ اے۔ اے مالک! کیؤں جو کتُورے وی اوہناں ٹکڑیاں وچوں ای کھاؤندے نیں، جہڑے اوہناں دے مالکاں دی میز توں ڈِگدے نیں۔
28
۲۸۔ ایس گل اُتے یسوع جواب وچ آکھیا۔ اے بی بی! تیرا ایمان وڈا اے۔ جیویں توں چاہؤندی ایں، تیرے جوگی اونویں ای ہووے۔ اتے اوسے ای گھڑی اوہدی دھی نوں چنگیائی مِل گئی۔
29
۲۹۔ تد یسوع اوتھوں روانا ہویا۔ اتے گلیل دی جھیل دے نیڑے اپڑیا۔ اتے اِک پہاڑ اُتے چڑھ کے اوتھے ای بیھ گیا۔
30
۳۰۔ اتے وڈے وڈے جتھے اوہدے کول آئے، جنھاں دے نال لنگڑے، ٹُنڈے، انھے، گونگے اتے بتھیرے ہؤر سن، اتے اوہناں نے اوہناں نوں اوہدے پیراں کول پا دِتا۔ اتے اوہنے اوہناں نوں چنگیائی بخشی۔
31
۳۱۔ ایتھوں تیک پئی جتھے نے حیران ہو کے ویکھیا پئی گونگے کُوندے، ٹنڈے چنگے ہُندے، لنگڑے ٹُردے، اتے انھے ویکھدے نیں۔ اتے اوہناں نے اسرائیل دے رب دی وڈیائی کیتی۔
32
۳۲۔ تد یسوع نے اپنے چیلیاں نوں کول سد کے آکھیا پئی مینوں جتھے اُتے ترس آؤندا اے۔ کیؤں جو تِن دیہاڑے توں میرے نال نیں اتے اوہناں دے کول کجھ کھاؤن نوں وی نئیں۔ اتے میں نئیں چاہؤندا پئی اوہناں نوں بھُکھا گھل دیواں۔ تانجو اِنج ناں ہوے پئی اوہ راہ وچ ای ڈِگ پین۔
33
۳۳۔ اتے چیلیاں نے اوہنوں آکھیاپئی جنگل وچ اسیں اینِیاں روٹیاں کِتھوں لئیائیے پئی اینے لوک رج جاؤن؟
34
۳۴۔ تد یسوع نے اوہناں نوں آکھیا پئی تہاڈے کول کِنیاں روٹیاں نیں؟ اوہناں دسیا پئی ست۔ اتے کجھ نِکیاں مچھیاں نیں۔
35
۳۵۔ تد اوہنے جتھے نوں بھوئیں بیھن دا حکم دِتا۔
36
۳۶۔ اتے اوہناں ست روٹیاں اتے مچھیاں نو لَے کے شکر کیتا۔ اتے پنھ پنھ کے چیلیاں نوں پھڑاؤندا گیا۔ اتے چیلے جتھے وچ ونڈدے گئے۔
37
۳۷۔ اتے سبھے کھا کے رج گئے۔ اتے اوہناں نے بچے ہوئے ٹکڑیاں دے ست ٹوکرے چُکے۔
38
۳۸۔ اتے بیبیاں اتے بالاں توں وکھ کھاؤن والے کوئی چار ہزار دے نیڑے بندے سن۔
39
۳۹۔ اتے جتھے نوں گھل کے اوہ بیڑی اُتے چڑھیا اتے مجدون دے علاقے وچ آیا۔