¹ Yesu warekiya wamakind' yanure ebinwa bhitimbi, webha n' ebhemisa bhae: ² Bhanu musi mbu e Pasaka isebhesa kuruma na matu abhi, n' e Mwan' emwea usesibhurwa mw' erierwa mor' iyango.

³ Nampo ebhakungu n' e bhakungu bhebhea bhakumanana mo rushu rw' emukungu mukiri wabhikirwa mbu Kayafa; ⁴ Na bhasimirana mo 'nse y' eretinge Yesu mu mpuse, n' emushura. ⁵ Eina bheba: kiro rw' abhes' erotu rukiri, kongo kutabhesingi changa mo bhea.

⁶ Imbw' abhesanga bhuri Yesu ku Betania, mo numba ya Simoni e mubhembi, ⁷ Momina uma weya kwihi nae, nt' ukwengi echupa ra mafuta, ririsere rungo rwa bhusi bhukiri; na, warekia iy' orisange, wariter' erungo hambasiro n' emunt' wae. ⁸ E bhemisa bhae mor' esunga ncho, bhayongwa, na bhebha: Rarengekana bhuni er' eriminya ndi? ⁹ Bhamuchuyang' erungo rw' ebhusy' asuma ndu, n' enink' e bhasene e bhehe mbyo;

¹⁰ Yesu wabhesa nt' wamasunga bho, w' erebho: Inki chasingwa mw' ek' emomina ngu? Wamakora chakonda kury' ani; ¹¹ Bhushwa, e matu ati bhanu muri n' e bhasene, eina nti bhanu murikire n' ani ematu ati. ¹² Mor' inditer' erungo runo mo muby' ani wamaronjaro mor' esinda r' ani. ¹³ Nabhw' ire cho mor' eira, ekuti kwaturw' emwasi wakonda mo chuo kiti, bhanuri hotu esubhukiya uno momina e chamakora we.

¹⁴ Nampo, uma mor' ekumi n' ebhabhi 'mbu ngi Yuda Iskariote, wenda kuri e bha she bhakungu; ¹⁵ Na w'ebha: Inki 'kihunang' imbese bhanu, namabhusibhure we? Na bhamutua byunda makumi ashatu bya bhehe. ¹⁶ Etukir' entambi njo, wabuch' isondekanya ntambi yarengekana mor' isibhura Yesu.

¹⁷ Er' otu rwaroso rw' etumbonsa tusira ntero, e bhemisa bhashisha Yesu: ongo 'hunange kuni ngi kukuronjii bate e kibhimbi ch' e Pasaka?

¹⁸ Wasubhya: Mw' endi mor' obhungu kwa mwey' uma na mumushishanga: Mukota webha: E ntamby' ani y' eya, n' seronjie mo mwabe ekibimbi ch' e pasaka hima n' ebhemisa bhani. ¹⁹ E bhemisa bharonja bhuri mbu bwakianga Yesu w' erebho, bhatunganyany' e kibhimbi ch' e Pasaka.

²⁰ Er' iyorioro rakiya r'eya, wabhesa nt' urisange hima n' erekumi n' ebhabhi. ²¹ Bharekiya bharisange, webha: Nabw' ire cho mor' eira, uma mubhanu wasenisibhura.

²² Bhabhesa na bhonso nguru, na kinsi uma wabhuch' emushisha: Mbeti ani Enyerekuritu?

²³ Wasubya: Ing' wakuhich' emine hima n' ani mo ntengi iwe ng' wasenisibhura. ²⁴ E mwan'e mwea w'eire, e tukana n' ebwatiranyiwa cho ekuri we. Eina bhonso kuri e mweya ngu wasingw'e mwan'e mwea wasiburwa. Ramurenge kanange mu 'ngo mwea utamubhutwange. ²⁵ Yuda, ing' wasemusibhura, wating'e kinwa w' ebha: Mbeni nty' ani e Mukotya? Yesu wamusako: Umebha cho.

²⁶ Bharekiya bharisange, Yesu wating' ekambonsa; na kuruma n' erikasanyie, wanoa ko, n' eninka ebhemisa webha: Mwangirire, murise, euno ng' emuby' ani. ²⁷ Kuruma wating' erosara; na warekiya wamakasanyie, waninka bhoro, webha: Mw' omu ro bhanu bhati; ²⁸ Bhushwa eino nchama 'ni, enchama y' endani, ngy' aritabha bhushwa na bhingi, mor' itunj' ebhibhi. ²⁹ Nab' wire cho, nt' omuyo tu etuka rinotu bhino byuma by' emusabhibhu, iya mor' otu ndo rusomoyo ani rishasha hima n' inu mo bhubhake bwa Tita.

³⁰ Bharekia bhamakind' esimba esandumbo, bh'enda mor' ou rw'e mizeituni

³¹ Nampo Yesu w'erebho: ns' ebhesa kuri bhanu bhati muno mutu nsomombo y' ehuka; bhushwa charetiranyiwa: ns' ehumb' emurabgy' e samburi, n'e samburi mor' eimba sisensansabhana. ³² Eina nisekiya namakind' efuka, ns' ebhusondore ku Gariraya.

³³ Petero wating' ekinwa, wamw'ire: Entambi 'sebhesa ongo nsomombo y' ehuka, utubhesiyo kuri ani.

³⁴ Yesu wamw'ire: Nakw'ire chomor' eira, muno mutu nakubha, bhusondory' enshongore ibhikire ukunituna ngendw' ishatu.

³⁵ Petero wamusako: Nakiro ikwa hima nabhe, n' takutuni. N' e bhemisa bhati bhebha mbo.

³⁶ Habhasirwa mpo Yesu wenda nabho mu bhuari bwabhikirwa mbu Gesthsemane, na washish' e bhemisa: murike hano mo ntambi n' eshika n' inu mw' ihema. ³⁷ Watinge hima nae Petero n'ebhana babi ba Sebhedayo, na wabhuch' ishea bhonso n' isheshemukwa. ³⁸ Washisha kwe bho: E mutima 'ni uri bhonso iya moero rw' ikwa; musie hano na mukereshe hima n' ani. ³⁹ Warekiya wamaronja nkaramika sikeke kubhusondori, wasund' embaso ekwansi, n'ihema bhuno: Tita 'ni, kuti rakocheka, erosara runo rw' ete kore n' ani! Eina nty' ebhuhunangy' ani, ina ebwahuna ongo. ⁴⁰ Na weya kuri esantumwa, wakumana bho nti barere, w'ere Petero: nti mukukoch' ikeresha ntambi nima hima n' ani! ⁴¹ Mukereshe na muheme, kongo mutwendukingi mu mwereko; e mutima warengekana, eina e mubhi uri na bhutetera.

⁴² W'etunda r'engendo sibhi, na wahema bhuno: E tita 'ni, kuti rakocheka, erosara runo rw'ete kore nt'omungiro, erisasa r'abhe r'ibhesi!

⁴³ Wakuruka, wakumana tu bho nti bharere; bhushwa e meso abho nty' amaritoha. ⁴⁴ Wasia bho, na w' etunda, wahema r'esangendo ishatu, nt'ukurukengi bhibhya bhibhya bhinwa. ⁴⁵ Kuruma w'enda kuri e bhemisa bhae, n'iyere bho: Mw' endi ke toro, na muruhuke! Sung' entambi yabha kwihi, n; e mwan' enwea wamasiburwa mo mine y'ebhabhi. ⁴⁶ Musimane, twendi, sunga, ingu wanisibhura uri kwihi.

⁴⁷ Warekiya w'ebhange hotu, Yuda, uma mor' ekumi n'ebhabhi, w'iya, hima nae kikembe kikiri bhishambikira myere na nkoma, bhatumwa n'e bhakungu bhakakare n'e bhakungu bh'ebhea. ⁴⁸ Ing'wasemusibhura wabhesanga nt' wakuninka bho ekengeko kano" Ing' wasemumusa 'ni ebhunu, ng' iwe, mu mutingenga. ⁴⁹ Kakeke, w'iya kwihi na Yesu, w'ebha: Nakukey' Emuta! Na wamumumus' ebhunu.

⁵⁰ Yesu w'amwire: e mirani, e chakwe' eya karonja ongo, ronja cho. Nampo, imbo bhea bh'eya bhamwira mo mine, n'emutinge. ⁵¹ Nasunga, uma mo bhabhesanga hima na Yesu wasimany' emine, n'itomor' erobhasi rw'ae; wasunda ro e mukori w'emukungu mukakare, n'imuker' ekote. ⁵² Nampo Yesu wamw'ire: kuruch' erobhasi rw'abhe 'harikanga ro; bhushwa e bhati 'mbi bhasubhir' obhasi bhasekwayo n' obhasi. ⁵³ Ong' wanikirange 'mbu n'tamuhema Tita, wambese mu kano kashangi kikembe cha ngashani bhabhi bhabhi ekumi na bhabhi? ⁵⁴ E bhuni kwe ng'wabererera e mitiro, etukana nayo rakomenwa bhibhesi bhuno?

⁵⁵ Mu'njo ntambi, Yesu webha n' enkumanano: mukweya, bhuri kuruma na mwea wema, hima na nkoma mor' entinge. Nakubesanga kinsi otu hima n'inu, mw' ihana mo marameso, na nti murikantinge. h ⁵⁶ Eina ebhiti mbi by' eya kongo emitiro y' e bhatahwa yabhererera. Nampo, e bhemisa bhati bhamusia n'ibheka.

⁵⁷ E bhatingenga Yesu bhamurisha kw' emukungu mukakare Kayafa, impo habhesanga hakukumanan' e bhakungu. ⁵⁸ Petero wamwemisa kore kore iya mor' ushu rw' emukungu mukakare, wakime mo, n'erika hima n'e bhakori, mw' ikae bhuni ng' wasira byo.

⁵⁹ E bhashe bhakungu hima n' erushu ruti bhasonda turiho twa manko kuri Yesu, twakomenw' emushurisha. ⁶⁰ Eina tutashekani, n' akiro 'mbu herishanga turiho twa bhushukishuki. Kwende, heya bhabhi mu bho bhebha: ⁶¹ Euno wakw' ebhanga: 'mbu namukakur' erirameso ra Ongo, n'eimba turo mu matu ashatu.

⁶² Emukungu mukakare wasimana n'imw'ire: Nt' usako kikai? Inki ngi ch'ebha 'mbi bhea kuri ongo? ⁶³ Yesu wakobha n' e mukungu mukakare, wamw'ire: Nakusere, kuri e Ongo 'ng'uriho, utushishe kuti ongo ngi Kirisitu, Musike wa Ongo.

⁶⁴ Yesu wamusako: Umebha cho: Etukampo, nabw'ire, mukusung' emwan' emwea kano kashangi warika mo kwabhume kw'ebunkangwe bwa Ongo, na weyange mor' otundo rw' e mbingu.

⁶⁵ Nampo e mukungu mukakare wabheraa esa nchangi sae, webha: Wamakamba! Turi tu na murao 'nki wa turiho? Sunga, mutuk' iyorukire er' okambo rw'ae. Rwasusa bhuni 'kuri bhanu? ⁶⁶ Bhamusako: Wakomenw' ikwa. ⁶⁷ Himpo hambasiro, bhamuture 'nte mo mbaso, bhamusundaka mangumi na bhihi, bhebah: ⁶⁸ Kirisitu, ronja bhutahwa, tw'eri inyengi wamakuhumba.

⁶⁹ Himpo, Petero wabhesanga nt'warik' ekwansi hambuka kumund' erushu. Mukori uma momina wiya kwihi nae, n'emw'ire: Na ongo hotu akosa ongo 'ri hima na Yesu e mugariraya.

⁷⁰ Eina wamutuna busondori bw'ebhati, w'eba: Nti nisi ekihunang' iebha ongo.

⁷¹ Imb'wabesanga bw'endange we ekumuyango, umpe mukori momina wamusunga, weba mu 'mbi bhabhesanga mpo; e uno atuka urikire hima na Yesu wa ku Nasareti.

⁷² Wamutuna tu, n'isere: nti nisi e mwea ngo.

⁷³ Kuruma kakeke, imby' abhesanga bhari mpo, bharekiya b'eya kwihi, b'ebha kuri Petero: Eira, ongo 'ri hotu wa mo bhea mbo, bhushwa er'iyebha rabhe ra'shea.

⁷⁴ Wabhucha kw' etuna nguru n'isere: nti nisi uno mwea. kakeke e nshongere yabhikira.

⁷⁵ Na Petero w'esubhukiya n'ekinwa ch'ebhanga Yesu: Bhusondori enshongore ibhikire ukubhesa nt' umanituna meta' ashatu. Na mor'isaa, ware na bwae.