¹ Yesu warekiya watuka mw'irameso weirengi; esantumwa sae samubhungura n'imushea ebhwimbe bhwando irameso. ² Eina w'asubhiy'ebho n'iwerengi: ntimusunga mbi bhiti? ni bhwerengi m'oreira: hatasiiyo anga n'ikoi habhasirwa na rimpe, ntyakakurwa.

³ Warekiya wamatariye habhasirwa erou rw'e Mizeituni, esantumwa sae sa mubhungura n'imwere: tushishe, e bhinwa e bhiti mbi byasebhererayo mu kini kiranga? nanki nge kengeko k'eriya rabhe? n'engendero y'echuo?

⁴ Yesu wasubya n'ierebho: mukohyanga, ang'ihuswa na mwea: ⁵ Bhushwa mbu bhingi bhaseya m'orina rani n'iebha mbu: ani ngi Kirisito; bhasehusayo bheya bhingi ⁶ Mw'orukirayo myasi ya bhita na bhihuhumo bhya bhita; mukohyanga, kiro musubhaha, Bhushwa mbu imbi bhinwa bya bhereri; eina ntinti nesi ng'engendero y'e chuo. ⁷ Bhushwa mbu chuo chakwani na kimpe chuo, na bhubhake bwakwani na bhumpe bhubhake; kw'abhi rwaka na turingiri m'ochuo ekiti. ⁸ Eina e binw'ambi bhiti bhisebhayo nti ng'entangiro y'ebhwae imbu bhusiyayo mo chuo.

⁹ Musongererwayo n'isingwa bhinwa bhya bhushukishuki, n'inubhiwa, n'ikonorwa, n'ishurwa n'ibawa n'echuo kiti bhushwa ho n'erina rani. ¹⁰ N'acha chasingwayo bhingi bhasitara, n'isongerane, n'ibhaana. ¹¹ Bhatahwa bhingi bha manko bhaasimanayo mw'ihusa bheya bhingi. ¹² E bhubhi bhuserirayo, n'enchimi mo bheya isebhundukeyo nkeke. ¹³ Eina ingu wahimi n'iya hende e bhiti mbi ngw'arami. ¹⁴ N'e mwasi ngu wakonda w'e bhubhake waturwayo e kuti, ibhesa nti nge kariho mo chuo ekiti; nampo kw'engendero nti y'eya.

¹⁵ Na mukiyayo musunga e bhubhi mbu bhw'ebhwanga na Daniel e mutahwa, bwa kambe mw'irameso, nti mukohya. ¹⁶ Nambi e bhakumanwayo ku Yudea bhabhekeyo m'osangu; ¹⁷ Nangu wakumanwi h'amambio n'enumba utasikiyo tu kasonda e bhikayi bhiri m'omwe; ¹⁸ N'angu usebhayo nt'uri ekw'ishwa utakurukiyo tu kasonda enchangi yae. ¹⁹ Bhonso k'uri mbi e bhakure, n'ambi ebhakumanwayo n'e bhitamba mbuka ind'otu. ²⁰ Musimikanga mo mahamo kongo eribheka r'inu r'itabhingi mu matu ekeme, ari m'otu rw'einga; ²¹ Bhushwa mbu e minubho y'abayo mingi imbu e bhutangasungwangayo itukure chuo charonjiwa iya na r'un'otu, na itanga bhesi tu bhumbo n'otu ruma. ²² Amukiya nt'iakerwa mo ingo matu, kongo kutamubha anga n'uma ngu woshukari, eina ematungo abha yo mihi mw'iramya mbi e bharondorwa.

²³ Mukiyayo mumashishiwa mbu: mukayi kirisito ngi uno ari nge uwo; kiro musimira. ²⁴ Bhushwa mbu bhingi b'ekubhiyeyo indo rina ra kirisito mw'isonda ihusa e bheya; na bhampe b'ebhindura bhatahwa bha mpuse, n'ironja tushingishiro na bhishisharo by'ihusaho e bheya, ramukochekange na bharondorwa. ²⁵ Mukohyanga, n'amakinda ibhutonde. ²⁶ Na mumashishiwa mbu nge uo uri mo bweru ang'isaa ari uri kumunda e numba, ang'isimira. ²⁷ Bhushwa mbw'imbu ebwetang'ekimpenya, chasaire kunand'echuo n'ieta kumbo nacho, ngi bhumbo ebweyi e mwana w'emweya. ²⁸ Bhushwa mbw'impi hari e ntundwe ngi hasetumanayo esankori.

²⁹ Eina e minubho iti nji yakiyayo yasira, emwishi warimayo n'emweri utasheiyo na chaka n'esankekeni saahukayo ituka ekw'iyo, n'emaa ekwiyo aserubhuranayo. ³⁰ N'ekengeko k'emwana w'emweya kasungwayo e kwiyo n'ebheya bhaariranyaayo m'obyuo e bhiti, n'isunga mbu e bw'iyange mwana w'emweya mo chanya na maa, hima na bhusime bwingi. ³¹ Nae watumayo esa ngashani sae n'ibhuha mo'tuhanda n'ikumanyanya e bharondorwa bhae ituka nku ekuti kuri bho mo mbingu.

³² Ngi bhumbo, mw'ihana nga m'ungo mushumo w'angu muti: ukiyanga e ntabhi y'amarasura, n'emasani amatitibhuka, musibhanga mbu emange nti iye arikire kwihi. ³³ Na bhanu ngi bhumbo, mukiyayo musunga mbi bhinwa, musibhanga mbu iyeurih'orubhu. ³⁴ N'ibhwere ngi mor'eira, kino kiranga kiteeti nambi bhinwa nti bhyamasungwa. ³⁵ E mbingu n'echuo bhisetayo; eina e bhinwa bhyani bhiteetiyo.

³⁶ Munkati n'inu kusirang'usi er'otu n'ekashangi, nti ari esangashani sirikire ekwiyo, ari e Mwana ntusi nd'otu, eina Tita w'esine. ³⁷ Imbu ewabhesanga echuo mo matua Noa, ngi bhwabhesayo cho wakiyayo wasonda ikuruka emwana w'emweya. ³⁸ Bhushwa mbu mungo matu, kubhusondori n'embura e bheya bhashim' erisa n' iyomo, bhabhinga n'ibhingwa, iya n'erotu ndo rw'akiyanga Noa wakime mo bhwato. ³⁹ Nti nti kuri anga n'uma usi mbu ebw'iyanga njo mbura n'emina ebhati; ngi bhumbo bhwabhesayo byo m'orisond'iya e mwana w'emweya. ⁴⁰ Mungo matu, bheya bhabhi bhakumanwi n'ambi bhinwa nti bhari ekwishwa, uma ngw'eireyo n'ompe wasiyayo. ⁴¹ Bhomina bhabhi bhabhesayo nti bhaoorange nchano uma ngw'eireyo n'ompe waasiyayo. ⁴² Mukohyanga, bhushwa mutunga sibha erot'undo rw'eyayo Nyerekurinu. ⁴³ Muteererenga kino kinwa, mine e numba wamusibhange e ntambi y'amiya emwibhi wamurikange nti wakohwa mwiranga njo numba itabhihingi. ⁴⁴ Na ngi bhumbo, murikanga nti mukohya, bhushwa mbu mu ntambi nji nt'isi bhanu ng'iiyao mo mwana w'e mweya.

⁴⁵ Eo kwe, ininji ntumwa y'akonda n'isengeha wasiyererwanga e numba na Nyerekurwabho mw'irangayo n'itekembi bhana bhamo bhiyo mu ntambi y'eririsa? ⁴⁶ Watatwe'ngu mukori ewakumanwa na Nyerekurwabho, nti ukorange e murimo waresiererwae. ⁴⁷ N'ibwerengi cho mor'eira, ingo mweya waninkwa uhembo n'imuronja wabhe w'e bhusoki bhwae bhuti. ⁴⁸ Eina entumwa nji y'ema ibhesanga nti y'ebhange mo mutima wae mbu: Nyerekurwitu n; esi uteyi, wamasiya nguru; ⁴⁹ N'ibhucha ihumbaka ehbhakori bhae, n'ira n'iomo hima n' ebhatamiri; ⁵⁰ Nyerekurwabho w'iyayo er'otu n'entambi 'nji nt'iisiwe. ⁵¹ Wamushushurayo, n'imutereka hima n'ebhakongobhanya: nahangi hasebhuchie yo bho iriranyaa n'ikukuta emeno.