¹ Yesu webha n'ebhea hima n' esantumwa sae. ² E bhandiki n'e bhafarisato bharikire mo fasi ya Musa: ³ E bhiti mbi bhyabwere bho, musimiranga n'ibhereresha byo, eina mwereri ikora mbu e bhukorange bho, bhusha mbu bhebhange ho na nti nti bhatingirira anga na kinwa kima. ⁴ Nanki, bhasi ho irongere bhampe miriyo yaritohyaa n'iriyeshayobho, mo bhituri eina bhasine bhatamereka eturana muyo mo mirimba yabho bhesine. ⁵ E bhikorange bho bhiti nt'isonda ho mbu bhasungwe n'itatwa, n'ikeiwa n'ebheya mosanteko, n'ishea emiringa n'emyambare yabho. ⁶ Nti bhari e kubhusondori n'enteko, ⁷ Bhashima ikeiwa mo santeko, n'e bhikirwa bhaongomana. ⁸ Eina bhanu, nabhutonde, angi'ibha nango mucho, w'ibhikirwa muhani, bhushwa mbu bhanu muri na muhani uma na bhanu bhati bhato'bhae. ⁹ Hano hansi nti hari anga n'uma wamasha bhanu munchi kirira cho'so winu irenga'ngu euri ekwiyo. ¹⁰ Musondanga ibhikirwa mbu na bhanu bhasimaniri, bhushwa mbu turi n'uma ho munchi kirira ngi Kirisito. ¹¹ E mukakare mu bhanu ng'usebha e mukori winu. ¹² Ingu wasonda kw'itarisha e kwiyo wasehichiwayo e kwansi, n'angu wehichi ng'watarishiwayo e kwiyo.

¹³ Bhonso kuri bhanu mbi e bhandiki n'ebhafarisayo b'empunse, bhushwa mukisa mbw'ebheya bhatakimingi mo bhubhake bhw'ekwiyo, bhushwa mbu na bhanu mumafundwa ikime mubho, mufundw'isiyere'mbi ebhasondange ikime. ¹⁴ Bhonso kuri bhanu mbi b'andiki n'ebhafarisayo bhashempuse bhushwa n'erire mo manumba e bhashumbakari n'ishea mahemo mare-mare, musibhanga mbu muhumbwayo tushushu twasuma nguru.

¹⁵ Bhonso kuri bhanu mbi ebhandiki n'e bhafarisayo bh'empuse! bhushwa bhanu mutimbange esandusi n'itamba mo chuo inku na nku mw'isonda ihusa e bheya n'ibhindura bho mungi manko inu, nangu usebhinduka nti mumuronjo mweya w'ekwerunga mbiso sibhi ibhurenga.

¹⁶ Bhonso kuri bhanu mbi bhasondori, bhihumihumi e bhebhange mbu: e mweya wamahere h'irameso, nti ntwabhisha, eina ngu wahere mundo rina re noro ya mw'irameso, ingo nti wamikundika mw'ikoti. ¹⁷ Bhanu mbi bhirunge bhihumihumi: kini ngi kikiri munkati e noro n'erirameso ndi eramashuurura njo noro? ¹⁸ E mweya wamasere mor'irango ngwebhange bhanu, nti tiwabhisha, eina ngu usesere mor'irango n'er'ohembo ruri hambasiro erirango, ingo ntwamikundika emuri h'ikoti wesine. ¹⁹ Bhihumihumi: kini ngi kikiri munkati e muturo n'erirango ndi r'ishuururang'er'ohembo. ²⁰ Ngi bhumbo emweya wamasere mor'irango, ntwamasere na mumbyo e bhiti bhiri hambasiro. ²¹ Ingu wasere mor' irameso, ntwamasere na mu 'ngu uri kumunda. ²² Nangu wasere embingu, nt'userengi mo rina rekitumbi che bhubhake bwa Ongo, hima nang'warika mucho.

²³ Bhonso kuri bhanu bhandiki n'ebhafarisayo b'empuse! bhushwa mbu bhanu mutuanyange enima y'er'ekumi y'emunsere, y'ensoo na y' emusobyo ebyaraisha ebyamukorwange: by'emyomba, er'eira, e bhonso, n'e bhutunganane (n'isonya byo n'ebhimpe) nti timusiya mbi bhimpe. ²⁴ Bhanu bhasondori bhihunihumi!, musonda etura eminsari eina mumina kintenga muna mpunda.

²⁵ Bhonso kuri bhanu bhandiki n'ebhafarisayo bh'empuse! bhushwa mbu mumashuurura hambasiro erosara n'etengi, eina kumunda kurisere bhunyai na karawa. ²⁶ Ongo ngu mufarisayo kihumihumi tangira ishuurura kasa kumunda n'erusara n'entinge, kongo e kubhutara kwasungwa nti kwakonda.

²⁷ Bhonso kuri bhanu e bhandiki n'e bhafarisayo bh'empuse! bhushwa bhanu mususene na masinda asanange mw'ishea e bhongo bhwao, eina kai kumunda nti mubherirwe makuwa 'mbi e bhakwire n'e byemema. ²⁸ Ngi bhumbo ebhusungwange bhanu mo makako e bheya, kai kumunda n'inu nti kurisere mpuse na mikonsi mingi.

²⁹ Bhonso kuri bhanu mbi bhandiki n'ebhafarisayo b'empuse! bhushwa mbu bhanu mwimbange emasinda esansori n'itondango masinda e bhatahwa. ³⁰ N'iebha: twamubhesange munchi kiranga cha bhatita, tutamusonanange n'abho mw'ikubhura'nji nchama y'ebatahwa. ³¹ Musera mbu bhanu bhesine mbu bhanu bhana bhambi e bhayanga mbo bhatahwa. ³² Murumisha njo ngerero ya bhaso. ³³ Bhanu nsoka, bhanu bhana bha nsoka, bhuni ngw'aramayo bhanu erubhansa rw'ekwerunga? ³⁴ Nacha ngi chasingwa n'abhutumire bhatahwa, na bheya bhe bhwenge, na bhandiki, nisi mbu mukuya bhima mubho n'ihanika bho, na bhampe b'abho mukunubhya bho obhungu mw' obhungu. ³⁵ Mw'erieshiwa emiriyo ya'nji nchama yakubhuranga bho mukino chuo, anga bhubhi bhuti, ibhuchie etukire Abeli, murongu, nanji nchama ya sakaria, musike wa Barakia, ingu wayanga bhanu munkati er'irameso na h'irango. ³⁶ N'ibhwerengi cho mor'eira, e bhinwa mbi bhyaakurukeyo r'uno obhuto.

³⁷ Yerusaremu, Yerusaremu, ongo ngu uyange 'bhatahwa n'irekeraa makoi mumbi e bhatumwange kuri ongo kakutonde! na miya kuri ongo mbiso singa mw'isonda e kumany' e bhana bh'abhe hima, imbu bhukiyanga muna nkoko wasonya e bhyana bhyae, n'ibhisabhyo mo bhyubhi bhyae, eina bhanu nti mwana bhumbo. ³⁸ Musunganga mbu bhwakiy' enumba y'inu y'asiya munu. ³⁹ Bhushwa nibhwirengi cho, mutusungi tu, iya m'orot'undo rw'ebhayo bhanu mbu: ikasanirwa kuri ngu w'eya mo rina ra Nyerekuritu.