¹ Bharekiya bhasondiya ku Yerusaremu iya ku Betifage, mor'ou rw' eminseituni, Yesu watuma bhemisa bhabhi. ² Werebho mwendi munkati ne rubhungu ruri habhusondori. hiha mukumanaho mpunda ya minwa. n'e chana chae hamushi, mwobhore bhyo mund'ishi'bho. ³ Kwa mabinduke mwea wabhushisha musubye Nyerekurwitu waraa kuri bho.

⁴ Hiha hiha bhibya byabhesanga kongo, e bhinwa bhyabhererera iemisanya nambo webhange mutahwa: webha bhuno. ⁵ Ebha, n'e kikumi cha ku Sayuni sunga e mubhake wabhe weya. Murongu, nawe wariarwa na mpunda n'e nchana ch'e mpunda.

⁶ E bhemisa bhenda bhakora imbu bhwerirwanga bho. ⁷ Bhiya n'e mpunda n'e nchana chae, bhariya e miambaro yabho hambasiro ne myiongo warika hambasiro nabo. ⁸ Ne kikembe che bheya bhariya e miambaro yabho mu munse, na bhampe bhakera ntabhi sa miti bhariato mu munse. ⁹ Imbi'abhesenga bhasondora, nambi abhesenga bhamwemisa Yesu bhasimba hosana! Utatwe musike wa Daudi. mukomenwa weya mo rina ra Mukota! hosana! ekwiyo mu mbingu.

¹⁰ Warekiya wakime ku Yerusaremu e rubhungu eruthi rwatenga, bhebha ingu ngi nye?

¹¹ E kikembe kiti chasubhya. ingu mutahwa, Yesu watuka ku Nazareti ya ku Ngariraya.

¹² Yesu wakime murirameso ra ongo wahense bhati, abhesenga bhachuyange ekumunda nerirameso. Wendure ematanda ambi bhabhunduranyange esambai ne bhutanda wambi e bhachuyange mironge. ¹³ Werebho: charetiranyiwa erirameso rani rabhinduke numba ya mahemo. Ina mumakindi ibunduraro okunda rwa babi.

¹⁴ Ebhihumihumi ne bhirema bheya kuriwe, murirameso, waramy'abho.

¹⁵ Ina ebha shebhakungu bha Ongo, n'ebhatiri bhe mitiro bharekiya bhasunga ebhishisharo imbi bhikorange we ne bhana nti bhebhange murirameso hosana mwana wa Daudi.

¹⁶ Bhamushisha ntorukira mbi bye bwange? warisiya, Yesu werebho, nti murisisirisa e mitiro; e bhana e bhitamba-mbuka nambo ebhari mubhukubha umorukira eritatirisa rabho?

¹⁷ Wasiyabho watuka mu rubhungu wenda ku Bhetania wikinde nako.

¹⁸ Mukomakoma wakuruketu murubhungu worukira rwaka. ¹⁹ Wasunga muti e kumushi nense, wenda kakae muo, utasungimo kikai ina wasungaho e masani. wereo: kutabhindukingiyo bhyuma kukwabe, itukire runotu ne matuati, e muti wakama.

²⁰ E bhemisa bharikiya bhamasunga e muti wamakama bhisarima nguru bhebha bhushwa nki ngyamasingwa e muti wakama?

²¹ Yesu wasubhya werebho; iira ni wirengi, mumubhindukengi nisimira risira bhobha mumukora twengeko nti bhushwa ho e mutingu ina mumwire 'rou, tuka enda murumpo haro ni' itawa munyasa na chamubhesange bhubho. ²² Ne bhikai bhiti bhyahema bhanu munkati ne mahemo, mumasimira, nti muninkwa byo.

²³ Yesu wenda muri rameso, warikiya uhanange, e bhashebhakungu bh'e r'irameso n'e bhakungu bhe bhea, bhiya ku kwae mu irukira e mahano, bhamushisha bhukangwe 'nki ngi bhukorange ongo mu 'mbi bhikai, inye ngwakuninka bho?

²⁴ Yesu wasubya, werebho, nabhushisha kinwa kima, na bhanu muni subhiye nani nti ngi nsebwire mu maa 'nki ngyakorange nani. ²⁵ Erubhikwa ra Yohana rasaa kuni? ratuka mu mbingu: ari ratuka mu bheya? Ina bhabhinduke na bhuhaka munkati na'bho, bhebha: twamebha mbu watuka mu mbingu watusubhiye bhushwa nki nti mukunisimira? ²⁶ Na twameba mbu watuka mubheya twusubhaha e kikembe, bhushwa e bhati bhasungange Yohana nti mutahwa. ²⁷ Bhasubhiye Yesu bhabhe; nti tosi; nae werebho: n'ani ntinabwire mubhunkangwe nki ngi bhukorange mw'ani.

²⁸ Musunga bhuni? mwea uma wabhinduke nturikire na bhana bhabhi; wenda, kuri ingu emusondori, wamwire emwana ni wendi kahinga mo rishwa re misabhibhu runotu.

²⁹ Wasubhya mbu natina: kuruma wihakanya niende kwishwa kakora.

³⁰ Wenda kuri wemetabhi wamwire bhubho bhubho hotu bhuri mubhere wasubhya niyebha nsendako e Nyerekuritu ina ntwenda ko. ³¹ Inye munkati ne bhana bhabhi ngwasubhyanga mo murenge wishe? bhasubya e waroso, Yesu w'irebho eira ni werengi e bhakongori ne bhasingirani bhakimi mo bhubhake bhwa Ongo bhusondori ninu. ³² Bhushwa Yohana wiya kuri bhanu munse ye riira na nti mumusimira, ina ebhakongori ne bhasingirani bhamusimira na bhanu mu musunga ntimurisia emusimira. n'etunganyanya. e bhubhi bhwinu.

³³ Murukire umpe mushinga; kwabhinduke mwea uma turi na numba weka murishwa re misabhibhu watimbyaro na miti watima heriane emirime yae, wimba emuhafu nitarishako, ruubha; Wenda mukimpe chuo. ³⁴ N'ematu emirime muriserayo. Wasonja ebhafuku bhae, bhenda kuri ebhahingi, karinge emirime. ³⁵ E bhahingi bharingae bhafuku, bhahumba uma ne umpe bhamuya ne umpe bhamurikitanya ni murusaka makoi. ³⁶ Watinge bhampe bhafuku bhingi irenga e bhasondori, bakore tubho kichakicha. ³⁷ Mwikindanya wariyatuko e mwanae ni ebha; bhasemuninka usubhaho.

³⁸ Ina e bhahingi bharekia bhasunge mwana bhashishanya ingu mukomenwa mwiye tumuye tubhanye ne mwandu wae. ³⁹ Bhamutinge, bhamutaa ekumushi nerishwa, ni muya. ⁴⁰ Ina shemine rishwa wakiyayo wiya wakoreyo bhahingi kiri bhuni?

⁴¹ Bhamusubhiye washiriayo e bheya bhati e bhema niriya bhampe bhahingi mu rishwa re misabihu, e bharishayo e mirime mu matu ayo.

⁴² Yesu werebho: bhanu nti murisisirisa emitiro, erikoi eratinwanga ne bhimbi nge ramabhinduke e muntwe we muhafu.

⁴³ Bhushwa ne kinwa kino ni werengi bhanu e wami bwa Ongo watunjiwa kuri bhanu, na rumpe uwanda ngi rwanikwa bho, indu rwabhute ebyuma bye wami. ⁴⁴ Ingu wasuruke hambariro ir'ikoi wanechaa-nechaa, nangu Wasurukirwa na 'ro, ramubhunguraayo.

⁴⁵ Mu ntambi bhashebhakungu bherirameso ra Ongo, Ne bhafarisayo bharekiya mbu bhorukire e mishumo yae bhasibhirira mbu webhange bhushwa nabho. ⁴⁶ Bhasondekanya imutinge ina bhasubhaha ekikembe, bhushwa chasunganga nti mutahwa.