¹ Warekiya, ntambi nima Yesu wakinda ihana ebhafuku bhae ikumi na bhabhi, watuka nko, ihana nabho musambungu sabho,

² Yohana warekia, wamerukira e mwasi wa Yesu kumunda engori, e mikorere ya Yesu watuma e bhafuku bhae, ³ Bhamushisha, ongo nge ungu tworukiranga umbwa seyayo ari kuri umpe kuruma nabhe?

⁴ Yesu washisha bho: mwendi kashisha Yohana e bhinwa bhyasunga bhanu ne bhyerukira bhanu. ⁵ E bhihumihumi bhabhucha ikae rabho, e bhirema bhabhucha ienda, n'ebhabhembi bharamiwange, e bhariribe e bhatwitwi bhabhucha iyorukira, ne bhakwa bhati bhafukange, ne bhase ne bhe mitima Tita wahanabho e bhinwa bhy'ekaramo kemutima. ⁶ Wakasanirwe ingu usira mbu wasensubhuke.

⁷ Bhano bharikiya bhamenda rabho, Yesu wabhucha ishisha e nkumanano mu bhinwa bya Yohana, Mukutukanga iyenda mo bhweeru, kasunga nki? e bhisu bhyatenga moriyuhu? ⁸ Mutukanga kasunga inki? kasunga mwea wambara nchangi sakonda. E bhambara nchangi sakonda bharikanga mo manumba e bhabhake. ⁹ Inki ngyakusingwanga mutuka? kasunga e mutahwa? iira na bhushisha, e mukakare irenga e mutahwa ungo worukirange bhanu e mwasi wae nge mukakare habhasirwa ne bhati, ¹⁰ Ungu watiranyiwa e mitiro kwiyo nae, natuma e ntumwa kubhusondori nabhe, ungo watunganyayo ense yabhe kubhusondori nabhe.

¹¹ Bhanu 'mbi mubhutwa n'e bhomina, kusira warenga Yohana murubhiki: Iina ingu mwanunke mo rushu rw'e kwiyo, iwe mukakara mu bhwaami bhwa mumbingu, ¹² Etukire e matu a Yohana murubhiki, iya run'otu, e bhubhake bwa mo mbingu warindire bwasuma ishee, n'e bhea bhankangwe nguru, imbo ngi bhakochange bho. ¹³ Bhushwa e bhatahwa bhati ne myomba e bhati bharonja bhutahwa iya kuri Yohana. ¹⁴ Kubha musondi imuteerera, iwe ngi Eria, nge wameyanga, ¹⁵ Ungu uri n'emate er'iyorukira, worukire.

¹⁶ E rubhuto runo narengekanyaro nanki e bhaana bharika ha soko, bhabhikirange bhabhime mwiye, ¹⁷ Twakubhubhikiranga mu kahanda nti mukusimira, bhate twakurenga na bhunu nti mukure. ¹⁸ Yohana wiyanga, iwe nt' usir'isa na nti waromo bhamuninka rina mbu iwe uri na mushumbu, ¹⁹ Mwana we mwea weyanga, urisange n'iomo nabho bhabhucha iyebha mukai e murohoroho momori na miira w'ebhakongobhanya w'emisanyange na bhisa e bhubhi na w'ebhea bh'ema e mwinyihiro washeangae munkati e riira rae murimo wae wasungwa.

²⁰ Himpo wabhucha ikeme insi mbungu kwetanga we mo murimo na tushingishiro wae nguru bhyaronjiwa bhusha nti bhasimiranga e bhinwa bhyae, ²¹ Nabhukwire isasi, bhanu bisa Korasini, nabhukwire isasi bhanu bhisa Kubhetsaida, bhusha e wasuma wamuronjiwange ku Tiro na ku Sidona, kongo murimo uno wamakorwa kumunda ninu bhamushururange e bhubhi bhwabho, bhamumbarange makunia na kw'esingo mote. ²² Ngyasingwa nabhw'ire cho; e r'otu rw'e r'ubhansa, kwaanubhiwayo r'ikeke. ku Tito na ku Sidona e rotu rwa rubhansa. ²³ Ongo Kapernaumu, uutarishiwayo ko kwiyo, ukuhichiwayo e kw'erunga, bhusha etushingishiro twamaronjiwa kumunda nabhe, twamuronjiwange ku Sodoma kwamubhesange ho iya runotu. ²⁴ Ngyasingwa nabhushisha cho: er'otu rw'er'ubhansa ku Sodoma kwanubhiwayo r' ikeke ikurenga.

²⁵ Etambi njo Yesu webha, nakutata e Tita, mukota we kwiyo n'ekwansi, bhusha ubhisanga e bhinwa bino kuri e bhatesa na bhisa e bhwenge, na ushea bhyo mu bhana bhakeke. ²⁶ Eira, eTita, nakutata, bhusha bhuno ngwashimanga ongo cho.

²⁷ E bhikai bhiti narisheiwa bhyo na Tita, na kusira mwea usi e mwana kuti nti Tita na, kusira mwea usi tita, kuti nty'emwana na mu kinsi ngw'asheiwa cho n'e mwana. ²⁸ Mw'eye kuri ani, bhanu bhati 'mbi munubhange na miriyo nji yaritoha na nsebhuruhucha. ²⁹ Muriye e bhwenge winu kuri ani, muhanwe naani bhusha ani murongu, impo mukusunga ngoa mo mitima yinu, ³⁰ Iina, e mutima 'ni washuurukara ne muriyo waani wohoha.