¹ Sady lafa nahavita reo safa reo Jesosy, niala tagny Galilia Ie, voho nagnagny amin'ny farits'i Jodia zay tany andafin'ny reniranon'ny Jordana. ² Vahoaky maro ro nagnaraky Gnazy, ka nagnasitsana gnan-drozy tagny Ie.

³ Namonjy Gnazy reo Fariseo, nitsapa Gnazy, niresaky taminy hoe: “Ara-dalagna ho gnan'ny johary va gny misaraky amin'ny valiny noho zay mety ho antony iaby?”

⁴ Jesosy namaly voho niresaky hoe: “Tsy nivakinareo va fa Ie zay nanao gnan-drozy tamin'ny voalohany la nanao gnan-drozy ho lahy voho vavy? ⁵ Ie zay nanao gnan-drozy la niresaky avao koa hoe: “Fa nohon'io antony io la hagnenga gny rainy voho gny reniny gny johary ka hikamba amin'ny valiny, voho ho lasa nofo raiky rozy roe? ⁶ Ka tsy ho roe sasy rozy, fa nofo raiky. Ka zay natambatsin-Dranagnahary, ao tsy hisy hagnasaraky.”

⁷ Hoy rozy taminy hoe: “nagnino io Mosesy ro mandidy gnanay hagnome taratasy fagnamarinam-pisaraha voho bakeo hampoly gnazy?”

⁸ Hoy Ie tamin-drozy: “Fa gny hamafisam-ponareo ro namelan'i Mosesy gnanareo hisaraky amin'ny valinareo, fa tamin'ny voalohany la tsy io ro fomba. ⁹ Resahako gnanareo, na ia ia misaraky amin'ny valiny, afa-tsy nohon'ny fijangajanga, ka manambaly hafa, la magnitsakitsa-baly; voho johary manambaly ampela zay fa nisara-baly la mijangajanga.”

¹⁰ Reo mpianatsy niresaky tamin'i Jesosy hoe: “Laha io ro toetran'ny johary amin'ny valiny, la tsy soa gny manam-baly.”

¹¹ Fa Jesosy niresaky tamin-drozy hoe: “Tsy gn'olo iaby ro afaky magnenky gnan'io fampiara io, fa reo zay nenga hagnenky gnan'io avao. ¹² Fa misy reo ionoka zay fa manahaky gnan'io hatragny an-tron-drenin-drozy, voho misy reo ionoka zay nataon'olombelo, voho misy reo ho ionoka noho gny fanjakan'ny lanitsa. Ie zay afaky mandramby gnan'io fampinara io ao ie handramby gnan'io.”

¹³ Bakeo nisy aja maliky sasantsasany nandesy taminy teo mba hametrahany tagna amin-drozy ka hivavaky, fa niresaky mare gnan-drozy reo mpianatsy. ¹⁴ Fa hoy Jesosy hoe: “Engao gny aja maliniky, voho ka rara rozy hamonjy Gnahy, fotony gny fanjakan'ny lanitsy la gnan'ny manahaky gnan-drozy.” ¹⁵ Napetrany teo amin'ireo aja gny tagnany, voho bakeo niala teo Ie.

¹⁶ Ingo, nisy johary namonjy gnan'i Jesosy voho niresaky hoe: “Mpampianatsa, ino ro raha soa tsy maintsy ataoko mba hahazoako gny fiaigna mandrakizay?”

¹⁷ Jesosy niresaky taminy hoe: “Nagnino iha ro magnontany mahakasiky zay soa amiko atoy? Raiky avao ro soa, fa laha te-hilitsy agny amin'ny fiaigna iha la tandremo reo lily.”

¹⁸ Hoy gny johary taminy hoe: “Lily ino?” La hoy Jesosy hoe: “Ka mamono olo, ka mamono olo, ka mijangajanga, ka mangalatsy, ka mety atao vavolombelo diso, ¹⁹ hajao gny babanao voho gny reninao, voho tiavo gny mpiara-belo aminao manahaky gny vatanao.”

²⁰ Zay zatovo niresaky taminy hoe: “Fa narahiko iaby reo. Ino ro mbo ilako?”

²¹ Jesosy niresaky taminy hoe: “Laha magniry gny ho avy lafatsa iha, la mandehana, avilio zay agnanao, voho ameo gny mahantra, ka hanana hanagna agny an-dagnitsy iha; voho avia, magnaraha Ahy.” ²² fa lafa nahajajy zay niresahan'i Jesosy gny zatovo, la niala tamin'alahelo ie, fotony nana fanagna maro.

²³ Hoy Jesosy tamin'ireo mpianatsy hoe: “Resahako marina aminareo, sarotsy ho gnan'ny mpanandraha gny hilitsy gny fanjakan'ny lanitsy. ²⁴ Sady mbo resahako aminareo ndraiky, mora tokoa ho gnan'ny rameva gny militsy amin'ny vodim-pitsebiky toy gny hiliran'ny mpanandraha ao amin'ny fanjakan-Dranagnahary.”

²⁵ Lafa nahajanjy gnan'io reo mpianatsy, la tena tandregna tokoa ka niresaky hoe: “Ia ary ro afaky ho vonje?”

²⁶ Nanenty gnan-drozy Jesosy voho niresaky hoe: “Aminy gn'olo la tsy hay atao io, fa amin-Dranagnahary gny raha iaby la azo atao.”

²⁷ Bakeo Petera namaly voho niresaky hoe: “Ingo, nenganay gny raha iaby voho nagnaraky Gnanao rahay.

²⁸ Jesosy niresaky gnan-drozy: “Resahako marina aminareo, amin'ny vanim-potoa vaovao lafa mipetraky eo amin'ny seza fiandrianan'ny vononahitsy gny Anak'olo, la hipetraky eo amin'ny seza fiandriana foloroamby avao koa nareo zay nagnaraky Gnahy, hitsara reo foko folo roambin'Israely. ²⁹ Gn'olo iaby zay nagnenga tragno, rahalahy, anabavy, ray, reny, anaky, na tany noho gny agnarako, la handramby zato avo heny voho handova fiaigna mandrakizay.

³⁰ Fa maro reo zay voalohany ho lasa farany, voho gny farany ho voalohany.