¹ Tamin'izay fotoa zay, Heroda mpanapaky nahaja gny vaovao mikasiky gnan'i Jesosy. ² Hoy ie tamin-drozy mpanompony hoe: “I Jaona mpanao batisa izay; nitsanga tamin'ny maty ie. Noho izay la miasa ao aminy reo hery reo.”

³ Fa Heroda nisambotsy gnan'i Jaona, namehy gnazy, sady nandefa gnazy tagny an-tragno maiky noho i Herodiasy, valin'i Filipo rahalahiny. ⁴ Fa hoy Jaona tagnaminy hoe: “Tsy ara-dalagna ho gnanao gny mana gnazy ho valinao.” ⁵ Nagniry gny hamono gnazy Heroda, nefa natahotsy reo vahoaky ie, fotony nirambesin-drozy manahaky gny mpaminany ie.

⁶ Fa lafa avy gny fitsingeregnan'ny andro nahaterahan'i Heroda, la nandily teo agnivon'ireo vahiny nasany gny anaky ampelan'i Herodiasy ka nahafinaritsy gnan'i Heroda. ⁷ Ho setrin'izay, la nampanantena tamin'ny fiaigna ie gny hagnomea ze hangatahiny na ino na ino. ⁸ Lafa avy nitoroan'ny reniny mariky, la hoy ie hoe: “Omeo gnahy eto, agnabon'ny finga, gny lohan'i Jaona mpanao Batisa.” ⁹ Nalahelo mare nohon'ny fangatahany gny mpanjaka, nefa nohon'ny voaliny voho noho reo iaby nisakafo niaraky tagnaminy, la nagnomea baiko ie fa tokony ho vita izay. ¹⁰ Nagniraky ka nanapaky gny lohan'i Jaona tao an-tragno maiky ie. ¹¹ Bakeo nandesy tamin'ny finga gny lohany sady nomeny gny aja ampela sady nandesiny teo amin'ny reniny izay. ¹² Bakeo la avy reo mpianany, nangalaky gny faty, sady nandevy izay. Tafaran'izay, la nadeha rozy sady nagnambara tamin'i Jesosy. ¹³ Sady lafa nahaja izay Jesosy, la niala teo tamina sambokely raiky ie hagnagny aminy toera mitoka raiky. Lafa nahaja izay reo vahoaky, la nagnaraky Gnazy an-tomboky avy tagny amin'ireo tana bevata. ¹⁴ Bakeo Jesosy nagneo agnatrehan-drozy sady nahajery reo vahoaky maro be. Nalahelo gnan-drozy Ie sady nahasitra gny aretin-drozy.

¹⁵ Lafa avy gny hariva, la nagneo aminy reo mpianatsy sady nivola hoe: “Toy la toera tsy misy, sady fa tapitsy sahady gny andro. Alefaso reo vahoaky, mba hahafahan-drozy mandeha agny amin'ireo tana sady hivily hany ho gnan'ny vatan-drozy.”

¹⁶ Fa Jesosy nivola gnan-drozy hoe: “Tsy mila mandeha lavitsy rozy. Omenareo raha hohaniny rozy.”

¹⁷ Hoy rozy tagnaminy hoe: “Mofo dimy voho fia roe avao ro hanagnanay eto.”

¹⁸ Hoy Jesosy hoe: “Andeso atoy agnamiko izay.” ¹⁹ Bakeo Jesosy nibaiko reo vahoaky mba hipetraky eo amin'ny kidrezy. Nalany reo mofo dimy voho fia roe. Niandrandra tagny an-dagnitsy, la nisaotsy Ie sady nanapaky reo mofo ka nomeny reo mpianatsy, sady reo mpianatsy nagnome izay ho gnan'ireo vahoaky. ²⁰ Nihina iaby rozy sady voky. Bakeo la navorin-drozy gny sisan'ireo poti-tsakafo ka nahafeno roambinifolo haro. ²¹ Teo amin'ny dimy arivo johary teo reo nihina, ankoatsy reo aja amin'ampela.

²² Avy hatragny la nampandehaniny magneo amin'ny sambokely sady handeha hialoha Gnazy ho egny ampita reo mpianany, laha mbo nandefa reo vahoaky Ie. ²³ Tafaran'ny nandefasany reo vahoaky, la nandeha niakatsy tegny an-tedrombohitsy raiky Ie mba hivavaky. Lafa avy gny hariva, la i raiky avao teo. ²⁴ Sady gny sambo la fa nanjary lavitsy gny tanety, natopatopan'ny onja, fotony nitsioky nanohitsy gnazy reo gny tsioky. ²⁵ Tamin'ny fiambena fahefatsy gny haliky la namonjy gnan-drozy Jesosy, nandeha tegny agnabo ranomasy. ²⁶ Lafa nahajery Gnazy nandeha tegny agnabo ranomasy reo mpianatsy, la najary natahotsy ka nivola hoe: “Lolo io,” sady la nihiakiaky tamin-tahotsy rozy. ²⁷ Fa Jesosy nivola tamin-drozy avy hatrany hoe: “Mahereza! Zaho toy! ka matahotsy.”

²⁸ Namaly Gnazy Petera ka nanao hoe: “Tompo, laha Iha io, la atavo mamonjy Gnanao egny ambonin'ny rano aho.”

²⁹ Hoy Jesosy hoe: “Mamonjea” Ka la niala bakao amin'ny sambokely Petera sady nandeha teo agnabo rano mba hamonjy gnan'i Jesosy. ³⁰ Fa lafa nahajery gny tsioky Petera, la najary natahotsy. Laha fa nanomboky nilentiky ie, la nikoraky mare ie sady nivola hoe: “Tompo, vonjeo aho!”

³¹ La avy Jesosy la nagnampatsy gny tagnany, nitandraky gnan'i Petera, sady nivola tagnaminy hoe: “Iha ry kely finoa, fa magnino iha ro nisalasa?” ³² Bakeo Jesosy voho Petera nandeha nitandraky gny sambokely, niegny nitsioky gny tsioky.

³³ Bakeo reo mpianatsy tao agnaty sambokely nandrengy gnan'i Jesosy sady nivola hoe: “Iha to ro anakan-Dranagnahary.”

³⁴ Lafa avy niampita rozy, la avy tegny an-tanety tao Genesareta. ³⁵ Lafa nahay gnan'i Jesosy reo johary tao amin'izay toera zay, la nandefa hafatsy tegny amin'ny faritsy magnodidy iaby, sady nandesin-drozy teo Agnaminy ze olo narary iaby.

³⁶ Nangataky Tagnaminy rozy mba hahafahan-drozy mikasiky gny sisin'akanjony avao, sady maro reo nikasiky izay ka tsy nagnahy.