¹ Tamin'io andro io Jesosy nandeha niboaky gny tragno voho nipetraky teo amoron'ny ranomasina. ² Nisy vahoaky maro nivory nagnididy Gnazy, ka la nilitsy tao an-tsambo kely Ie voho nipetraky tao amin'io, laha nitsanga teo amoron-dranomasina koa gny vahoaky iaby. ³ Bakeo Jesosy nilaza raha maro tamin-drozy tamin'ny alalan'ny fagnora. Hoy Ie hoe: “Ingo, nisy mpamboly raiky nandeha niboaky hamafy voa. ⁴ Laha ie namafy gnan'igny, la nisy voa sasany latsaky tegny amoron-dala, voho tamy reo voro ka nadrapaky reo. ⁵ Reo voa hafa ndraiky la latsaky tegny amin'ny tany be vato, zay tsy nahazoan'ireo nofon-tany soa. Avy hatragny la nitiry reo fotony tsy laliky gny tany. ⁶ Fa lafa niposaky gny masoandro, la maiky reo fotony tsy nisy fakany, voho la nalazo. ⁷ Nilatsiky teo amin'ny fatiky reo voa hafa. nitiry reo fatiky voho nangenja gnan-drozy. ⁸ Reo voa hafa nilatsiky tamin'ny tany soa voho namoa voany, gny sasany abo zato heny, gny sasany enim-polo, voho gny sasany telo polo. ⁹ Zay manan-tsofy ao ie hijanjy.”

¹⁰ Voho namonjy gny mpianany ka nanao taminy hoe: “Nagnino Iha ro miresaky amin'ireo vahoaky ami'ny alalan'ny fagnohara?”

¹¹ Namaly Jesosy voho niresaky gnan-drozy hoe: “Nareo ro namea tombony hahay reo raha mietakin'ny fanjakan'ny lanitsy, fa ho gnan-drozy la tsy nameoa gnan'io. ¹² Fotony ndra ia ia mana, la ho be tokoa aza ro hamea. Fa ndra ia ia koa tsy mana, na zay hanagnany aza hala aminy. ¹³ Io ro antony hiresahako amin-drozy amin'ny alalan'ny fagnohara: Ndra la manenty aza rozy, la tsy mahajery; voho ndra la mijanjy aza rozy, la tsy mahare na mahazo. ¹⁴ Amin-drozy gny faminanian'Isaia ro tanteraky, zay milaza hoe: “Lafa mijanjy la hahare nareo fa zao tsy hahazo mihitsy; lafa manenty la hahajery nareo, fa zao tsy hahatakatsy.

¹⁵ Fa lasa donto gny fony toy vahoaky toy, voho mafy sofy rozy, voho nakipin-drozy gny fijeriny, mba tsy hahajery amin'ny mason-drozy, na hahajanjy amin'ny sofin-drozy, na hahazo amin'ny fon-drozy, ka hibebaky ndraiky rozy, voho hagnasitsana gnan-drozy Aho.

¹⁶ Fa sambatsy gny fijerinareo, fotony mahita, voho gny sofinareo, fotony mahajanjy. ¹⁷ Resahako marina aminareo fa mpaminany voho olo-to maro ro nagniry gny hahajery reo raha zay jerinareo, kanefa tsy nahajery gnan'ireo. Nagniry gny hahare reo raha zay renareo rozy, kanefa tsy nahare gnan'ireo.

¹⁸ Ka mijanjigna voho gny fagnohara gny amin'ny mpamboly raiky zay namafy gny voany. ¹⁹ Lafa misy mahare gny safan'ny fanjaka kanefa tsy mahazo gnan'io, la avy gny raty voho magnombotsy zay nafafy tao am-pony, Io gny voa nafafy tegny amoron-dala. ²⁰ Gny nafafy tegny amin'ny tany be vato la gny olo zay mahare gny safa voho avy hatragny la mandramby gnazy am-pazotoa, ²¹ fa zao tsy mbo miorim-paka ao agnatiny ie voho la maharitsy tselatsela avao. Lafa avy gny fahoria na gny fagnenjana nohon'ny amin'ny teny, la malaky tafintohy ie. ²² Gny nafafy tegny amin'ny fatiky, io la gny olo zay mahare gny safa, fa zao gny fiahian'izao tontolo zao voho gny fitaky gny hanagna ro mangeja gny safa, voho la lasa tsy mamoa ie. ²³ Gny nafafy teo amin'ny tany soa, io ro olo zay mahajanjy gny safa voho mahazo gnan'io. Mamoa voankazo ie voho mahatonga voa raiky, hagnome abo zato heny mandilatsy zay nambole, gny sasany enim-polo, gny sasany avo telo heny.”

²⁴ Naneho fagnora raiky hafa tamin-drozy Jesosy. Hoy Gnataony hoe: “Gny fanjakan'ny lanitsy la manahaky gny johary raiky zay namafy voa soa tao amin'ny sahany. ²⁵ Fa laha niroro igny gn'olo, la avy gny fahavalony voho namafy voan-tsimparifary avao koa tao amin'ireo vary voho nandeha. ²⁶ Lafa nitiry reo vary voho bakeo namokatsy reo voany, la nipoitsy avao koa reo voan-tsiparifary. ²⁷ Avy reo mpanompon'ny tompo-tany voho niresaky taminy hoe: “Tompoko, tsy namafy voa soa tao amin'ny sahanao va iha? Nagnino ie amizao ro misy voan-tsiparifary?

²⁸ Hoy ie tamin-drozy hoe: “Nisy fahavalo nanao gnan'izao. Hoy reo mpanompo taminy hoe: “Ka tianao va gny handehananay magnombotsy gnan-drozy?”

²⁹ Gny tompon-tany niresaky hoe: “Tsia. Fotony laha magnombotsy reo tsifarifary nareo, la mety hagnombotsy gny fakan'ireo vary miaraky amin'ireo koa. ³⁰ Engao hiaraky hitiry rozy roe hatramin'ny fijinja. Amin'ny fotoa-pijinja la hiresay amin'ny mpijinja aho hoe: “Alao aloha reo akata raty voho fehezo ho fatora maromaro mba hagnoroa gnan-drozy, fa avorio ao amin'ny fipetraham-bokatso koa reo vary.”

³¹ Bakeo Jesosy naneho fagnora raiky hafa tamin-drozy. Hoy Gnataony hoe: “Gny fanjakan'ny lanitsy la manahaky gny voatsinapy zay nalan'ny johary raiky voho nafafiny teo amin'ny baibony. ³² Io voa io tokoa ro voa kely mare amin'ny voa hafa iaby. Fa lafa nitiry io, la bevata noho reo raha mitiry ao amin'ny saha. Lasa hazo io, mba hiavian'ireo voron'ny habakabaky voho hanao gny tragnon-drozy eo amin'ireo rantsany.”

³³ Bakeo Jesosy niresaky fagnohara raiky hafa.” Gny fanjakan'ny lanitsy la manahaky gny lalivay zay nalan'ny ampela raiky voho nafangarony taminy lafariny intelo famarana mandra-piakatsy gny foto-koba manontolo.”

³⁴ Fagnora ro nagnamabaran'i Jesosy reo raha iaby reo tamin'ny voahoaky; voho tsy nilaza ndra ino ino tamin-drozy afa-tsy tamin'ny fagnohara Ie. ³⁵ Io la mba hahatanteraky zay niresafy tamin'ny alalan'ny mpaminany, lafa niresaky Ie hoe: “Zaho hiloa-bava amin'ny alalan'ny fagnora. Hilaza raha zay najary hatrizay nagnoregna zao tontolo zao Aho.”

³⁶ Bakeo Jesosy nagnenga gny vahoaky voho nandeha tao an-tragno. Nandeha taminy teo reo mpianany voho niresaky hoe: “Azavao aminay gny fagnohara mikasiky gny tsimparifarin'ny saha.”

³⁷ Namaly Jesosy voho niresaky hoe: “Gny mamafy voa soa la gny Anakolo. ³⁸ Gny saha la zao tontolo zao, voho gny soa, reo ro anaky gny fanjaka. Gny tsimparifary la reo anakin'ny gny raty, ³⁹ voho gny fahavalo zay namafy la gny fiafaran'izao tontolo zao, voho gny mpijinja ka reo anjely. ⁴⁰ Nohon'io, manahaky gny amoria voho agnoroa reo tsimparifary amin'ny bolo, ro atao koa amin'ny fiafaran'izao tontolo zao. ⁴¹ Hagniraky reo anjeliny gny Anak'olo, voho havorin-drozy hiala amin'ny fanjakany reo raha ibay zay mahatonga fahota, voho reo zay manao raty. ⁴² Hatsipin-drozy amin'ny lafaoro bevata mirehitsy bolo rozy, zay hisy gny fitagnia voho gny fikotroan-kihy. ⁴³ Bakeo hamiratsy manahaky gny masoandro ao amin'ny fanjakan'ny Baban-drozy gny olo-to. Zay manan-tsofy, ao ie hijanjy.

⁴⁴ Gny fankanan'ny lanitsy la manahaky gny hanagna zay mietaky ao amin'ny saha raiky. Nisy johary nahajery gnan'io voho najariny. Nandeha tamin'ny fazotoany ie, namarotsy zay iaby nanagnany, voho nivily io saha io.

⁴⁵ Voho koa, gny fanjakan'ny lanitsy la manahaky gny johary zay mpamarotsy mila voahangy raiky lafo vily. ⁴⁶ Lafa nahita voahangy raiky zay tena lafo vily ie, la nandeha ka namarotsy zay iaby nanagnany ka nivily gnan'io.

⁴⁷ Voho koa, gny fanjakan'ny lanitsy la manahaky gny harato zay natoraky tagny an-dranomasina, voho namory reo karazan-java-managnay iaby. ⁴⁸ Lafa feno io, la nisonton'ireo mpagnarato ho eo amoron-dranomasina. bakeo rozy nipetraky ka namory reo raha soa ho ao amin'ny fipetrarany, fa reo raha tsy ila koa narian-drozy. ⁴⁹ Hanahaky gnan'io amin'ny fiafaran'izao tontolo zao. Ho avy reo anjely voho hagnasaraky reo raty fagnahy amin'ireo marina. ⁵⁰ Hatsipin-drozy ao amin'ny fagnoroa bevata mirehitsy bolo rozy, zay hisy fitagnia voho fikitsohan-kihy.

⁵¹ Azonareo va io raha iaby io? Hoy reo mpianany taminy hoe: “Eny.”

⁵² Bakeo Jesosy niresaky tamin-drozy hoe: “Nohon'io gny mpanora-dalagna iaby zay lasa mpianatsy eo amin'ny fanjakan'ny lanitsy la manahaky gny johary tompon-tragno raiky, zay mamoaky reo raha tranainy voho reo raha vaovao bakao amin'ny hanagnany.”

⁵³ Bakeo lafa nahavita reo fagnohara reo Jesosy, la niala tamin'io toera io Ie. ⁵⁴ bakeo nilitsy tao amin'ny taniny manoka voho nampianatsy reo vahokay amin'ny Sybagogan-drozy. Vokats'io la tandregna rozy voho niresaky hoe: “bakaia ro ahazoan'ny toy johary toy gny fahendreny voho reo fahagaga reo? ⁵⁵ tsy io johary io va ro anakin'ny gny mpandrafitsy? Tsy Maria va ro hikaia gny reniny? Tsy Jakoba, Josefa, voho Jodasy va ro rahalahiny? ⁵⁶ Tsy miaraky amintsika va reo anabaviny iaby? bakaia ro nahazoany reo raha iaby reo?”

⁵⁷ Tohina noho gny Aminy rozy. Fa hoy Jesosy tamin-drozy hoe: “Tsy misy mpaminany misy hajany laha tsy ao amin'ny fireneny vo ao amin'ny fianakaviany avao.” ⁵⁸ Tsy la nanao fahagaga be tao Ie noho gny tsy finoan-drozy.