27

¹ Niwakhya mu maweriweri, bakhawona bakhulutu boosi nabemeresi babaatu bekhala bawulirisaniya nga lubaneteremo Yesu. ² Manu bamuwowa, bacha bamudisya Pirato, owali Gafana.

³ Naye Yuda, owalya mu Yesu olukhwe, nikawona ati bamalire okhumukhengera omusango kwokhufwa, kekhalaka kamala kakowosera bakhawona bakhulutu nabemeresi ba baatu, erubya chefwessa amakhumi kadatu, nawoola ati,

⁴ Nkholire esibi, Olwokhulya olukhwe khu mabanga katasikho omusango. Nabo bawoola baati, Ebyo nibyo siina khwifwe? Ebyo byawo omwene. ⁵ Manu Yuda nasukuna asi ebitundu byeffessa mu nyumba ya Weere, kawawo kacha kemika.

⁶ Ne bakhawona bakhulutu bangala ebitundu byefwessa bawoola baati, Sikhalaka amalako okhuta erubya chino mu mbikhiro, olwokhuba chamabaanga. ⁷ Bamala bawulirisaniya okhuchikulamo omuka khu mulongi wamasyongo, eryokhusikhangamo abateende. ⁸ Sakira eroba eryo balilanga endalo yamabaanga nolwalero.

⁹ Manu bi nnabbi Yeremiya bikawoola byolerera biiti: Manu bawukula ebitundu byefwessa, amakhumi kadatu, owukusi wabaana ba Yisirayiri, ¹⁰ Manu bachikhosesa okhukula eroba lyomulongi wentamu nga Weere lu kandagira.

Yesu Mu moni Cha Pirato

¹¹ Awene awo, Yesu kema mu moni cha Gafana, ne Gafana kamuteeba ati, Niwe omwenengo wa Bayudaaya? Yesu kakowolamo kawoola ati, Yee, siri nga omwene lwolomalomire otyo.

¹² Bakhawona bakhulutu nende abemeresi babatu nibali bamuwayirisa mu biitu bingi, sikakowolamo esitu syosi syoosi.

¹³ Manu Pirato kamuteeba ati, Ewe khaba syowulira owujulisi wu bakhutakho wuno? ¹⁴ Naye Yesu si kabakowolamo, ata mu musango mulala__ sino syatangalasa Gafana lukali.

¹⁵ Wunanu yali nsambo ya Gafana okhubalekhuliranga omuwowe yi batu baba basabire khu wuli mbaga. ¹⁶ Mu bikha ebyo, bali nomusibe wensambo mbi lukali olangiwa Bbalaba.

¹⁷ Manu esidiikha ni syali syewusise, Pirato kabateeba ati, Mudakha mbalekhulire nanu mwene: Bbalaba, nawo Yesu yibalanga baati Kurisito? ¹⁸ Olwokhuba kali namanyire ati embalikha niyo eyikira bamudisya Yesu.

¹⁹ Khandi Pirato nikali kekhaye hu sisaala syemisango, omukhasi waye kecha kamulakirisira emboosi ati, Otakholakho esitu syoosi khu mutu oyo otalikho owubi, olwokhuba mbeye nowunyakhani wungi nimuloota mu siro syaleero.

²⁰ Ne khawona bakhulutu nabemeresi babatu bawooyawooya esidiikha syabatu basabe Pirato abalekhulire Bbalaba, naye Yesu amikiwe. ²¹ Gafana kabawoolera ati, Nanu mwene khu bombi yimudakha mbalekhulire? Bakowolamo baati, Bbalaba.

²² Naye kabateeba ati, Naye Yesu olangiwa Kurisito mukhole ntye? Bosi boosi bawoola baati, Mukhomerere! ²³ Naye Pirato nabateeba ati, Akholire sibi siina? Ne bo bemeeda okhuyasira amukulu nibawoola baati, Mukhomerere!

²⁴ Manu Pirato nikawona ati, si bimuyeeda okhuchanakana nebiteebo, olwokhuba abatu bali bacha wusa lukali nokhwesasakula, kawukula amaachi kesaaba amakhono abatu boosi nibawona. Nawoola ati, Mbumakho omusango kwosi kwoosi khu mabaanga komutu ono, siri yimuli!

²⁵ Ne abatu bosi boosi bakowolamo baati, Lekha amabaanga kaye kabe khwifwe nabaana befwe! ²⁶ Awo Pirato kabalekhulira Bbalaba. Naye nibamala okhunaala Yesu enkhoba, kabadisya Yesu bache bamukhomerere.

Abasirikale Bakhomoola Yesu

²⁷ Manu abasirikale ba Gafana bayira Yesu mu dookho lya Pirato, awo eye lyosi lyoosi lyecha lyamwewodokhaniya. ²⁸ Manu bamutusamo enguwo chaye, bamwambasa ekanju lyolukhoba lwamabaanga. ²⁹ Bamala bakata engata yamawa bamwambasa khu mutwe nga engule. Manu nibamudisya endawukhi mu mukhono kwaye mulungi. Ni bamala basigama emutwe waye, nibamukhomoola nibamudulira baati, Yindira ewe owowenengo wAbayudaya! ³⁰ Manu bamufuchakho, khandi bawukula endawukhi bamukhubba khu mutwe, amakhabi namakhabi. ³¹ Nibamala okhumukhomoola, becha bamumalamo ekanju bamwambasa enguwo chaye chene. Bamala bamutusa bamuyira okhumukhomerera. Okhukhomererwa

³² Nibali batula erwanyi, bawukanana nomusaacha otula e Sireni yi balanganga Simooni, becha bamuyinga okhwetwiikha omusalabba kwa Yesu. ³³ Boola awutu alangiwa Gologoosa (amakhulutu kasyo esifwo syesiwanga). ³⁴ Eyo bayeresa Yesu efwinyo okhunywa yibadubiremo ekakha; ne ni kayikhombakho, kakhaya okhuyinywa. ³⁵ Nibamala okhumukhomerera, bakabanakabana enguwo chaye, nibakhubbirakho owululu. ³⁶ Manu bamala bekhala asi awo okhumulinda. ³⁷ Ne amukulu wOmutwe kwaye ni bawandiika omusango kubamufambya nikusoma kuuti: ONO NJE YESU OMWENENGO WA BAYUDAAYA. ³⁸ Awene awo, bamukhomerera nabanyaka babiri, mulala hu mukhono mulungi, nowundi khu mukooda. ³⁹ Abatu abali nibabitirawo bamunyekanga nibayuya wusa emitwe chawe. ⁴⁰ Nibawoola baati, Ewe owali nonyala okhulikula enyumba ya Weere khandi wayombakhira mu ndalo chidatu, wewoniye omwene! Noli omwana wa Weere, wunanu yikha otule khu musalabba!

⁴¹ Mu ngeri nasirala nje yi bakhawona bakhulutu, abasomesa bamalako alala nende abemeresi babatu, yibamukhomoolera nibawoola baati, ⁴² Oyo kawoniya abandi, naye omwene syanyala khwewoniya! Oyo nje Omwenengo wAbayisirayiri! Lekha kekhe khu musalabba khu khumale khu mufukiiriremo. ⁴³ Kesika Weere. Lekha wunanu Weere amuwoniye naba namudakha, olwokhuba kawoola ati, Nise Omwana wa Weere. ⁴⁴ Khandi abanyaka ababa bakhomereywe alala naye bosi bamusindikhira amanyeko mu ngeri nasirala.

Okhufwa Khwa Yesu

⁴⁵ Okhutula mu saawa mukaaga okhwola mu saawa yomwenda esirema syadiira esyalo syosi syoosi. ⁴⁶ Ambi mu saawa mwenda echo Yesu kalira mukono lyamukulu ati, Eloi, Eloi, lama sabachi-thani? __ Amakhulutu mbo Weere wange, Weere wange, lwasina wundekhire? ⁴⁷ Manu abandi khu abo abali bemire awo nibawulira sino, bawoola baati, Ali khulanga Eriya. ⁴⁸ Awene awo mulala khubo kerukha wangu kawukula esyangu. Kasinikha mu fwiinyo ndulu kasita khukada, manu kamuweresa anywe.

⁴⁹ Ne abadonηηire bawoola baati, “Mulekhe yenηηene. Kha khuwone Eriya naneche kamuwoniya.” ⁵⁰ Khandi Yesu nikalira mukono ly’amukulu, kamala kakwisa omwoyo. ⁵¹ Awene awo, enguwo yo mu nyumba ya Weere, yatandukhamo akati okhutula amukulu okhwolera erala asi. Manu esyalo syecha syatengerekha entanda cho’lwanda chadikhana. ⁵² Ebirindwa byadikha byekukha khandi emibiri ch’abatu ba Weere bangi abali nibafwa balamukha. ⁵³ Batula mu ɳɳani, Yesu namalire okhusyukha mu bafu, bacha mu siko syolerefu manu bawonekhera abatu bangi.

⁵⁴ Naye omusirikale mukhulutu alala nende abo bakali nabo nibalindire Yesu, nibawona okhutengerekha khwesyalo nende ebyo byoosi ebyekholekha becha batya lukali bawoola baati, Amasima kene ono abeye Omwana wa Weere!

⁵⁵ Awo wosi aliwo abakhasi bangi, nibemire nibewunjiranga ale. Bali balondire khu Yesu okhutula e Galiraaya okhumulabirira khu byetaago byaye. ⁵⁶ Mwabo mwalimo Malyamu Mangadalena, Malyamu ɳɳina Yakobba nende Yese, nende ɳɳina baana ba Sebbedayo.

Okhusiikhiwa Khwa Yesu

⁵⁷ Engolobe ni yali niyolerera, omusaacha muyiinda otula Arimaseya, olangiwa Yosefu kecha kola, yesi kali omweeki wa Yesu. ⁵⁸ Kacha eyiri Pirato, kamusaba omubiri kwa Yesu, Pirato kalagira bakumuwe. ⁵⁹ Yosefu kawukula omubiri kakuwoya musuuka erafu. ⁶⁰ Kamala kakuta muɳɳani yaye mbyakha, yibali babachire mu lwanda, kamala kasindikisa okukina kukhongo kakwikalira khu ɳanni kamala kawawo. ⁶¹ Malyamu Mangadalena nende Malyamu wundi bali bekhaye ni bewunjire eηηani. Owulindi Khu ηηani

⁶² Oludaalo lulondakho olw’okhwetekekhera, khawona bakhulutu nende aba Falisaayo bacha eyiri Pirato. ⁶³ Bamala bawoola baati, “Ssebo, efwe khwichulisa nga omubacha oyo nasiri mulamu kawoola ati, ‘Olunyuma lwe’ndaalo chidatu, nja okhusyuukhira khandi.’ ⁶⁴ Sakira wa esilagiro eηηani yirindiwe wulayi okhwola khu ludaalo lw’okhudatu. Atali esyo, abeeki baye banyala okhucha bebamo omubiri, ni bawolera abatu baati asyukhiiye manu owubacha wusemberekhayo wucha okhuba owubi lukali okhukhirakho owatangira.”

⁶⁵ Pirato kabawoolera ati, “Enywe muli nende abasirikale balinda, muche muwone muuti eηηani bayirinda wulayi nga lu munyala.” ⁶⁶ Manu bacha batakho esikhamba khu kina lyali khu ηηani, batawo omulindi, bakhakhasa baati wuli siitu siri wulayi weene.