26

¹ Yesu nikali kakhamala okhulomaloma bino byosi byoosi, kawoolera abeeki baye ati, ² Nga lu mumanyire, okhubitakho khuli endaalo chibiri emutwe__ ne Omwana wOmutu acha okhutewayo bamukhomerere.

³ Manu bakhawona bakhulutu nende abemeresi ba batu bewuusira mu ddokho ewa khawona mukhulutu, obakhulira olangiwa Kayafa, ⁴ bakhola olukhwe lwokhudiira Yesu mu ngira chowusiru bamwite. ⁵ Basilomaloma baati, Khutasikhola sino khu ludaalo lukhulutu, khuba Sinyala syaletawo akhediimo mu batu.

Yesu Abakhiwa Amafuta Ebettani

⁶ Yesu nikali nali e Bettani mu daala lyomusaacha amanyiiwe nga Simoni mukenge. ⁷ Omukhasi kecha yali nali nechupa yamafuta akawunya akhawowo, khandi nga kebbeyi, manu kakamuchukhakho khu mutwe nga lukali ni kekhaye khu meesa nalya. ⁸ Ne abeeki baye nibawona sino, sibewulira wulayi. Beteeba baati, okhunyasa khuno khwasi? ⁹ Amafuta kabakhakusise khu bbeyi erubya bachiwa abaati.

¹⁰ Ne nga Yesu lu kali namanyire bino, kabawoola ati, Omukhasi ono mu mufambya si? Kankholeeye esitu sirayi. ¹¹ Abaati mucha okhuba nabo wuli ludaalo, nange si ndabenge nanywe. ¹² Olwokhuba omukhasi ono ni kanjukhirekho amafuta kano, asikholire natekekha okusiikhiwa khwange. ¹³ Mbawoolera amasima, emboosi yino ni yinawuulirwenge mu syaalo syosi, syakholire, sinalomwalomwenge mu khumwichulisa. Yuda Afukirira Okhulya Mu Yesu Olukhwe

¹⁴ Olwo mulala khu ekhumi nababiri__ olangiwa Yuda Isikalyoti__ kacha eyiri bakhawona bakhulutu ¹⁵ kabateeba ati, Siina si mwakhamba ni mbamudisya? Bamubalira enusu amakhumi kadatu echa silifwa. ¹⁶ Okhutula olwo Yuda kachaka okhukonyeresa engira yanyala kaliira mu Yesu olukhwe.

Esyengolobe Esyomwami

¹⁷ Oludaalo lusokha khu mbaga yemigaati chowusye wutali wubbakhe, abeeki ba Yesu becha yali bamuteba baati, Yena yodakha efwe khu khutekekhere yonalire Pasaka?

¹⁸ Kabakowolamo ati, Muche mu siko eyiri omusaacha wundi mu muwolere muuti, Omusomesa awoola ati: Ebikha byange ebyatekekhewa biri ambi. Nja okhuliira embaga ya Pasaka alala nabeeki bange mu nyumba yawo. ¹⁹ Ne abeeki bakhola nga Yesu lukawoola, bacha batekekha embaga ya Pasaka.

²⁰ Nisyola engolobe, Yesu kali ali okhulya alala nende ekhumi nababiri. ²¹ Khubali balya esyengolobe khumeesa, kawoola ati, Mbawolera amasima, mulala khwinywe acha okhundyamo olukhwe.

²² Abeeki bawuka nibelalikhirifu lukali khandi bachaka okhuteebana mulala syamulala baati, Masima si nise, Omwami?

²³ Yesu kakowolamo ati, Oyo okhosa nange mu bakuli nje onandyemo olukhwe. ²⁴ Omwana wOmutu acha okhucha nga lu byawandiikiwa khuye. Naye chakanire oyo ocha okhulya mu Mwana wOmutu olukhwe! Syakhali esirayi omutu oyo natakhewuywe. ²⁵ Awene awo Yuda, oyo owali nacha okhumulyamo olukhwe, kawoola ati, Masima si nise, Omusomesa? Yesu kakowolamo ati, Eee, niiwe.

²⁶ Nibali nibasirya, Yesu kawukula omugaati, kakusabira enkhabi kakukhalakakhalakamo, kakuweresa abeeki baye, nawoola ati, Muwukule mulye; kuno nje omubiri kwange. ²⁷ Khandi kawukula esikoombe, nikamala okhwebasa, kasiwa abeeki, nawoola ati, Muwukule mu nyweremo khu sino mwesi mweesi. ²⁸ Kano nje amabanga kange akelakano, akacha okhwidikha khu lwabangi olwokhulekherwamo ebibi. ²⁹ Mbawoolera nti, sinja khunywa khandi khusyamo syefwinyo okhutula olwalero okhwola khu ludaalo lundinywerakho efwinyo njaakha alala nanywe mu wenengo wa Bbabba.

³⁰ Manu nibamala okhwemba olwembo, batula bacha khu lugulu lwa Seyituni. Yesu Alakula Khu Khwekaana Khwa Petero.

³¹ Yesu kabawoolera ati, Esiro syolwalero mweesi mucha okhuntulakho, mundekhe seɳɳene, nga lu syawandiikiwa siiti: “‘Nja okhukhubba omwayi, manu amakondi ko’musidwoli kacha okhusalanisiwa.’ ³² Naye ni ndimala okhusyukhisiwa, nja okhubatangiramo nje e Galiraaya.”

³³ Petero kakowolamo ati, “Ata nibakhulekha boosi, nange si ndikhulekha.

³⁴ Yesu kamuwoola ati, Khuwolera amasima nti, Esiro syalero sino, edaywa niyitakholyokha, onabe wunekanire khadatu.

³⁵ Petero naye kalangirira ati, Nende khunabe khufwa nawe, khaba sinja khu khwekaana. Manu nje abeeki bandi boosi lu bawoola batyo.

Gesusemane

³⁶ Manu Yesu nikamala kacha na beeki baye mu sifwo sibalanga Gesusemane kawoolera abeeki baye ati, Enywe mwikhale ano, Nje era nsabe. ³⁷ Kawukula Petero nende abasoliri babiri aba Sebbedayo kacha nabo, nokhutula awo, kachaka okhwewunamira, nengisa nyiigi chamudiira. ³⁸ Manu kabawoolera ati, “Engisa nyiingi chindi khu mwoyo, ata chinyala okhunjita. Enywe mudoɳɳe ano mumoke nange.” ³⁹ Nikasudakho wutono, kakwira omwoyo khwiroba no’weni kasaba ati, “Bbabba, singa sibeye sinyalikhana, wakhantusisekho esikoombe sino. Ne sitaba ngese lundakha, okhutusakho Ngewe lwodakha. ⁴⁰ Nikamala kakowola eyiri abeeki baye kabawukana nibakona. Kateeba Petero ati, Basaacha enywe simwakhanyala khumoka nange ata essawa ndala? ⁴¹ Mumoke khandi musabe mutakwa mu khukhemewa. Omwoyo kudakha, naye omubiri nakwo munafu.

⁴² Khandi ekhabi lyokhubiri kasingira kacha okhusaba nawoola ati, Bbabba wange, nisitanyalikha esikoombe sino okhuntusiwakho okhutusakho nsinywe, okhudakha khwawo khwolerere.

⁴³ Nikakowola khandi kabawukaana nibakona, olwokhuba emoni chawe chali chisidowire. ⁴⁴ Olwasino, kabalekha lundi kakowolayo okhusaba ekhabi erwokhudatu, nasaba nasirala. ⁴⁵ Manu kakowola eyiri abeeki kabawoola ati, Enywe musikona nokhuwulukha? Muwone, esikha siri ambi okhwola esyo khuliiramo Omwana wOmutu olukhwe bamudisye mu makhono kababi. ⁴⁶ Musingire khuwewo! Nguno kolire owundyamo olukhwe!

Yesu Adiriwa

⁴⁷ Ni kali asilomaloma, Yuda mulala khu ekhumi nababiri, koola. Kali nesidiiyikha syabali nebyoki, ebikhande nebiruga, nibatumiwe nende khawona mukhulutu nabemeresi babatu. ⁴⁸ Wunanu omulyamo olukhwe kali amalire okhuwulirisaniya nesiddiikha esyo nokhubawa akhawonero khanakhosese: Oyo yindakwe musirifu nje yimudakha mu mukwekho; mu mudiire. ⁴⁹ Yuda nikoola, kelungikha Yesu nawoola ati, Amakheso, Labbi! kamukwa mu sirifu.

⁵⁰ Yesu kamukowolamo ati, Omwicha, khola esikhuletire. Manu abasaacha becha basuda emutwe, bakwa khu Yesu bamudiira. ⁵¹ Ne mulala khubali nende Yesu kachowolayo okukhande, katema okhutwi khwomukhosi wa khawona mukhulutu, ⁵² naye Yesu kamuwoolera ati, Kowosa ekhande lyawo mu syondo, Olwokhuba abakhosesa amakhande, balifwa amakhande. ⁵³ Mubaasa sinyala okhulanga Bbabba, awene awo kantumira eye lya ba malayika okhutula mu legion ekhumi nachibiri? ⁵⁴ Ne nibyakhabeye biityo ebyawandiikiwa byakholereye bitye? Ebiwoola biiti, bikhoyera okhuba bityo?

⁵⁵ Esikha esyo Yesu kawoolera esidiikha syabali awo ati, Ntangirira abajemu khu munjichire namakhande namalawukhi okhundiira? Mbeye wuli ludaalo ni nikhala ni somesa mu nyanyi che’nyumba ya Weere, simundiiranga. ⁵⁶ Ne bino bikholekhire khu bya ba nnabbi bi bawandiika byolerere.” Abeeki boosi berukha balekha Yesu ayeɳɳene. Mu moni Cho’lukhikho lukali

⁵⁷ Abali nibadiye Yesu bamuyira eyiri Kayaafa, khawona mukhulutu, nende abasomesa bamalako nabatangirisi yi bali bewuusise. ⁵⁸ Naye Petero kalondakho okhwola mu lwanyi lwa khawona mukhulutu nakendera khanayiro. Kengira kekhala akati wa basirikale okhuwona ebitulamo.

⁵⁹ Khawona bakhulutu na bolukhikho lukali boosi bakesakho okhukonyeresa owujulisi wowubaacha khu Yesu owukira bamwite. ⁶⁰ Ne baloba okhuwuwukana, nende syali siiti bangi baleeta owubacha. Babiri becha mu makhenerekha balangirira baati, ⁶¹ Omutu ono kawoola ati, Nyala okhulikulula enyumba ya Weere yino, nayombakhira mu ndaalo chidatu.

⁶² Manu khawona mukhulutu kasingira kateeba Yesu ati, syocha khukowolamo? Wujulisi sina abatu bano wubakhufambya? ⁶³ Ne Yesu kawulera wuwulera. Khawona mukhulutu kamuwoola ati, Nkhuwabira assi wokhulayira mu liita lya Weere mulamu: tuwoolere noli Kurisito, Omwana wa Weere.

⁶⁴ Yesu kakowolamo kawoola ati, Siri nga luwooye. Ne mbawolera mweesi nti: okhutula olwalero, mucha okhuwona Omwana wOmutu nikekhaye khu mukhono mulungi okwoyo oli nowunyala woosi khandi nikechera khubiresi byomwikulu.

⁶⁵ Awo khawona mukhulutu katandula enguwo chaye nawoola ati, Enomaloma yino, yifwotokheresa erita lya Weere! Siina esikira khwakonya owujulisi wundi? Muwone, mbawo abeene mwewuliriye emboosichaye embi echo echokhufwotokheresa! ⁶⁶ Ne enywe mubasa si? Bakowolamo baati, Akhoyera okhufwa. ⁶⁷ Awene awo bachaka okhumufuchakho amate mu weeni nokhumukhubba ebifuusi. Abandi bamupaama nibawoola baati, ⁶⁸ Ewe Kurisito, lakula yikhuli nanu mwene okhukhubbire?

Petero Kekaana Yesu

⁶⁹ Esikha esyo Petero kali kekhaye erwanyi alwanyi nomukhana mulala khubakhosi ba khawona mukhulutu kecha yali. Kamuwoola ati, Ewe wesi obeye nende Yesu omu Galiraaya.

⁷⁰ Naye kekaana lukali mu moni chabatu boosi ati, Ese simanyire byoli okhuwoola ebyo.

⁷¹ Nikamala kasingiriramo kacha khu siriwa, omukhana wundi kamuwona awo, kawolera abali bemire awo ati, Omusaacha ono yesi abeye nende Yesu omu Nasaresi.

⁷² Kekaana khandi nalayira ati, Omutu oyo ese si mumanyire!

⁷³ Ebikha bitono nibyabitawo, abali nibemire awo, becha eyiri Petero bamuwoola baati, Amasima kene, ewe oli mulala khu batu baye, olwokhuba engeri yo lomalomeramo, yikhuwuula.

⁷⁴ Khandi Petero kekaana, nalayira ati, Omusaacha oyo ese simumanyire! Awene awo, edaaywa niyikholyokha.

⁷⁵ Manu Petero kechulisa Yesu bikawoola ati, Edaaywa niyisiri okhukholyokha, onabe wunekanire amakhabi kadatu. Katula erwanyi kalira lukali.