25

¹ Mu bikha ebyo owenengo womukulu wuliba nga abasisira ekhumi abawukula amatara kawe nibacha okhuwukanira omusaacha odekhisye. ² Bataanu bali abasirusiru naye bataanu baba abakesi. ³ Abasiru bakinga amatara kawumamo amafuta. ⁴ Abakesi, nabo bakinga amatara namafuta mu bibokolyo. ⁵ Omusaacha odekhisye kakhinda okhwola, bajjoɳɳa bakunukha n’endolo chabayira.

⁶ “Musiro akati okhulangirira khwasiingisa bangi” ‘Omusaacha odekhisye nguno! Mutule mu muwukanire! ⁷ Manu abasisira boosi basingira bawambya amatara kawe.

⁸ Abasiru bawoola abakesi baati, ‘Mutuwe khu mafuta kenywe; amatara kefwe kasima. ⁹ Bakowolamo baati, Khaba, kanyala owutatumala efwe ni nanywe okhumalakho, muche eyiri abakusa mwekulire akenywe. ¹⁰ Ne nibali khubacha okhukula amafuta, omusaacha odekhisye kola. Abasisira abali nibetekefu bengira nomusaacha odekhisye khu mukholo kwoweeya. Bamala bekalawo olwiiki.

¹¹ Olunyuma abadoɳɳire bosi becha. Bawoola baati, Ssebo! Ssebo! Twikulirewo olwiiki!’ ¹² Ne kabakowolamo ati, “mbawolera amasima nti, ‘si mbamanyire.”

¹³ “Nolwesyo mube moni, khulwokhuba simumanyire oludaalo oba ebikha.

Olukaado Lwa Talanta

¹⁴ “Khandi, siriba nga omusaacha wacha olukendo, owalanga abakhosi baye kabasigira abyowuyiinda byaye. ¹⁵ Mulala kamuwa emyandu chitanu, owundi kamuwa chibiri, owundi kamuwa ndala, okhwema khu maani kawuli mulala. Manu kamala kacha olukendo lwaye. ¹⁶ Owali naweywe entalanta chitaanu kakholerawo kachita khu mirimo chamwiwulira echindi chitaanu. ¹⁷ Nowayira chibiri yesi khandi, chamwiwulira echindi chibiri. ¹⁸ Naye oyo owayira ndala, kawawo kachiyabira erina, kakisamo owuyiinda womwami waye.

¹⁹ Ebikha ebireeyi nibibitirewo, omuyiinda wabakhosi bano kakowola kadakha embalirira wuli mulala kamubalira bikakholamo. ²⁰ Omusaacha owali nafunire talanta chitaanu, kaleta chitaanu chindi. Namuwola ati, Omukhongo, wamba talanta chitanu. Wona, chitanu chindi chinatusamo.

²¹ Omuyiinda kamwebasa nawoola ati, Odekire, silayi nokhuba nomukhosi omwesikwa! Obeye omwesikwa khu bitono binakhuwa; njokhukhuwa olabirirenge biingi. Yicha okabane nomwami wawo esangaalo!

²² Omusaacha yibawa chibiri yesi kecha, kamuwola ati, Omukhongo, wamba talanta chibiri; ni wona, newusamo chibiri chindi.

²³ Omukhongo waye kakowolamo ati, Odekire, silayi okhuba nomukhosi mulayi omwesikwa! Obeye mulayi khandi omukhosi mwesikwa khu bitono bi nakhuwa; nja okhukhuwa olabirire ebingi. Yicha okabane nomwami wawo esangaalo!

²⁴ Ne omusaacha owali nayirire talanta ndala kecha. Kawoola ati, Omukhongo, namanya nti oli omusaacha mwomeranu, okesa byotatakire khandi osolosa byotawanyire. ²⁵ Nolwesyo natya natula nakisa talanta yawo mwiroba. Wona, khukowoseye ebyawo,

²⁶ Omukhongo waye kakowolamo ati, Oli mukhosi mubi, khandi omunafu! Olwokhuba wamanya ni ngessa yitatakire nawuusa yitawanyire? ²⁷ Syawene, wakhawukuye e talanta yange wata mu bbanka, ninakhakowoye nakhawukanire nichiwuye amagoba. ²⁸ Mu muwukulekho e talanta eyo, muwerese oyo oli nende ekhumi. ²⁹ Oyo yesi yeesi oli nabyo, alyongerwakho, ne oyo otaasi nabyo, nende khalinakho alitusiwakho. ³⁰ Khandi musukune omukhosi owumamo echamu oyo erwanyi, musirema, eyiriba okhulira nokhusya ameno.

Amakondi Nende Embusi

³¹ Omwana womutu nalicha mu luyaali lwaye, nende ba malayika nibali naye, alikhala hu sisaala syoluyaali lwo mwikulu. ³² Ebyalo byosi byoosi biryewuusira mu moni chaye, manu alikawula mu batu amakhabi kabiri, nga omwayi lwakawula amakondi nende embusi. ³³ Alita amakondi khu mukhono kwaye omulungi, naye embusi khu mukhono omukooda.

³⁴ Naye Omwenengo aliwoolera abali khu mukhono kwaye mulungi ati, Mwiche, enywe Bbabba bakayeresa enkhabi; mukabane owaami wensikhirano, Omwenengo wukabatekekhera okhutula esyalo ni silongewa. ³⁵ Olwokhuba nali njala mwamberesa esyokhulya, nali nowuluwo, mwamba esyokhunywa, nali mukeni enywe mwambukanira. ³⁶ Nali mbuma enguwo khandi mwanyambasa, nali mulwaye mwecha mwanjanjaba, nali mu jjera mwecha mwambona.

³⁷ Ne abolerefu balimukowolamo baati, Omwami, lwali liina lukhwakhuwona noli njala, khwakhuliisa oba noli nowuluwo, khwakhuwa esyokhunywa? ³⁸ Lwali liina luhwakhuwona noli mukeni, khwakkhuwukanira, oba noli machula, khwakhwambasa? ³⁹ Lwali liina lukhwakhuwona nolwala, oba noli mu jjera khwakhuwona?

⁴⁰ Omwenengo, alikowoolamo ati, Mbawolera amasima, wuli simwakholeranga omutu, okhiramo owutono mu ba mwanaama, mwakholeranga ese.

⁴¹ Ne aliwoolera abali khu mukhono kwaye mukooda ati, Muntulekho, enywe abalaamiwa, muche mu muliro kutasima okwatekekherwa sitaani nende ba malayika baye. ⁴² Khulwokhuba nali njala, mwawuma si mwamba, nali nowuluwo, mwanyima esyohunywa. ⁴³ Nabakeniya, mwakaana okhumbukanira, naba machula, mwaloba okhunyambasa, nali mulwaye, naba mu jjera, mwakhaya okhunfwakho.

⁴⁴ Bosi balikowolamo baati, Omwami, lwali liina lukhwakhuwona noli njala, oba nowuluwo, oba noli mukeni, abo noli machula, oba nolwala, oba noli mu jjera, khwakaana okhukhuyeeda?

⁴⁵ Alibakowolamo ati, Mbawoolera amasima, syosi syoosi si mutakholeranga omutu okhiramo owutono khu bano, simwasikholeranga ese.

⁴⁶ Manu bacha okhutula awo, bengire musiwonereso sitaakama, ne abo abolerefu mu wulamu wutaliwawo.