24

¹ Yesu katula mu nyumba ya Weere nikali nakenda abeeki baye becha okhumulambusa enyumba ya Weere nga niyombakhiwa. ² Yesu kabateeba ati, Muwona ebitu bino byoosi? Masima mbawoola nti, Si yalisikala ano ekina eriri khu mukulu werindi; wuli kina lirisukuniwa assi.

³ Nga Yesu nikali nikekhaye khu lugulu lwa Seyituni, abeeki baye becha yali mu wekisi. Bawoola baati, Tuwolere, bino biribawo liina, khandi khawonero si akhalyekesa okhwicha khwawo nga lukhuliba nende enjakamo yesyalo?

⁴ Yesu kakowolamo ati: Mwerinde omutu yesi akhaye khu babachirisa. ⁵ Olwokhuba bangi abakheche mu liita lyange nibawoola baati, Nise Kurisito, khandi balikodya bangi. ⁶ Muliwulira entalo nende embukuma yentalo, naye mube moni, mutelalikhiriranga. Olwokhuba ebitu ngebyo sibirikhaya okhubawo. Naye muwone muuti si musindusiwa, ebitu nge ebyo bitekwa okhubawo naye enjakamo yiriba yisiriyo mu moni. ⁷ Olwokhuba esyalo syakhasete esindi, owenengo wuliseta owenengo wundi, alibawo enjala nesyalo okhutenga mu bitundu bitali nasirala. ⁸ Naye ebyo byoosi nje ebiritangirira owuchuni wokhulumwa.

⁹ Manu muli wewayo okhusandisiwa, balibeeta khandi bali bawonera mu byaalo byoosi khu lwange. ¹⁰ Mu ndaalo echo bangi balirekha enfukirira, bakhalichanemo olukhwe khandi bakhalekane abene nabeene, ¹¹ nende ba nnabbi bangi abowubacha bakheche balikodya bangi. ¹² Khandi olwokhuba esireka siribitiirira owungi, okhudakha khwabakhira owungi khuliba khunyifu, ¹³ naye owesimirisa okhwola khu njakamo, nje oliwonesewa. ¹⁴ Nende enjiri yino eyowenengo, yirisomesewa mu syalo syoosi nga owujulisi, kho enjakamo yemewo yiche.

¹⁵ Manu nimuliwona esisikhirisa nisyemire nnabbi Danyeri __ sikalomalomakho nisyemire mu sifwo esyolerefu, osomamo omanye__ ¹⁶ Manu abali mu Wuyudaaya berukhirenge khu ngulu. ¹⁷ Oli amukulu khu nyumba sikekhanga okhutusamo esitu syoosi esiri mu nyumba yaye. ¹⁸ Oli mu ndalo, syakowolanga khandi okhuwukula enguwo yaye. ¹⁹ Naye chiribawukana abakhasi benda nende nabanuniya mu ndaalo echo! ²⁰ Enywe mwekalikhire okhuburukha khwenywe khukhaye okhuba mu ndaalo echembewo oba khu Ssabbiiti. ²¹ Olwokhuba mu ndaalo echo alibawo ensando ngali, eyitabangawo okhutula esyalo sibewo okhwoola wunanu__khandi sisiribawo lundi. ²² Endaalo echo nichiba mbo sichakhengewakho, awuma owakhawonire, naye khu lwabadole endaalo echo chirikhengewakho.

²³ Mu ndaalo echo omutu nabawolanga ati, Muwone, Kurisito ali ano abo ati, ngula ali ala! mutafukiiriranga. ²⁴ Olwokhuba akhechewo ba Kurisito abowubacha nende ba nnabbi abalikhola owuwonero owukhulutu nende ebyamayiya nokhukodya bakodye nabadoole__ nisiba nisyakhanyalikhire. ²⁵ Mube moni, mbawoleye ebikha ni bitoola. ²⁶ Manu nibabawolaanga baati, Muwone, ali mu sibbarara, mutatulanga erwanyi; oba, nguno ali mu biseenge byomukati, si musifukiriranga. ²⁷ Olwokhuba nga okhumyesukha lukhutula ewukwe khwawonekhera ewukwa lyuba, khutyo nje khuliba okhwiicha khwomwana womutu. ²⁸ Aba omulambo woosi nje engosya achewusira.

²⁹ Ensaando niyakhawe yiiti mu ndaalo echo Eryuba lyakhakalukhane okhuba esiirema, Nomweesi sikulyekesa wulafu wakwo; eɳɳiniɳɳini chirikwa okhutula mukulu, nende ebitu byo’mukulu biridenganisiwa. ³⁰ “Ebikha ebyo nje akhawonero khomwana wo’mutu lu khaliwoknekhera amukulu, nende ebikha byoosi ebyekhu’syalo biririra. Byakhawone Omwana wo’mutu nikeecha mu bireesi ebyekulu, namaani noluyaali olukhongo. ³¹ Manu alituma ba Malayika baye nekono ekhongo elyeturumbeete, ne baliwuusa abadoolemo baye mu mbewo chine, okhutula khunjakamo yekulu okhwoola khu yiindi.

³² Khandi mwekere khu musaala kwo mutiini olukaado lwakwo: otusaga twakwo ni tutununa, amasaafu kasewukha, mumanya wusa muti esiminyu siri ambi. ³³ Mwesi mutyo ni muwona emboosi echo choosi, mumanye muuti ali ambi khu lwiiki. ³⁴ Masima mbawoola nti, Oluse luno si luliwaawo okhwola ebyo byoosi lubiryekhola. ³⁵ Ekulu ne’syalo biriwawo, naye emboosi change sichiriwerawo erala.

Oludaalo Ne Saawa Sibimanyikhanire

³⁶ “Naye oludaalo lula nende ebikha siyali obimanyire, ata nende ba Malayika abomukulu, ata n’Omwana, okhumalakho Bbabba yeɳɳene. ³⁷ Nga lu byali mu ndaalo cha Nuwa, khutyo okhwiicha khwomwana womutu nje khuliba. ³⁸ Olwokhuba nga nibali mu ndaalo echenfula ya namadowa, abatu bali balya nga khandi banywa, nga badeekhya nga badeekha, okhwoosa khu ludaalo lwa Nuwa lukengira mu lyaato; ³⁹ Bakhaya okhumanya okhwoosa okufula kwa namadowa lu kwachaka kwabayira boosi, khutyo nje khuliba okhwiicha khwOmwana womutu. ⁴⁰ Mu ndaalo echo, abasaacha babiri baliba mu ndalo; mulala aliyiriwa nowundi alirekhewa. ⁴¹ Abakhasi babiri baliba basya khu lukina; mulala aliyiriwa ne owundi alikhewa. ⁴² Manu mube moni, olwokhuba simumanyire oludaalo nga niluliba Omwami weenywe lu kakhecherekho. ⁴³ Naye sino musimanye muuti: Ola omwene enyumba nikakhamanyire ebikha byesiro omwiibi byanecheremo, kakhali moni, sikakhalekhire enyumba yaye yakhalakiwa. ⁴⁴ Manu mweesi mube abetekefu, olwokhuba ebikha bi mutabasirisiramo, Omwana womutu nje bi kakhecheremo.

⁴⁵ Manu ali yeena omukhosi omwesikwa owamakesi, omukhongo waye yikalekhera abomudala lyaye okhubawanga ebyokhulya byawe mu bikha byabyo? ⁴⁶ Omukhosi oyo ali nende enkhabi omukhongo waye nikakhakowole kamuwukana nakhola atyo. ⁴⁷ Masima mbawoola nti, omukhongo waye alimuta mu sifwo syowulindi we bitu byaye byoosi. ⁴⁸ Nisiba mbo omukhosi oyo mubi nawoola mumwoyo kwaye ati, Omukhongo wange kamenya aleyi, ⁴⁹ manu katangira okhukhubba abakhosi basye nokhulya, nokhunywera alala nabameesi. ⁵⁰ Omukhongo womukhosi oyo kakheche khu ludaalo lwatamusubiriramo nende mu bikha byatamanyire. ⁵¹ Kakhamutememo otutundutundu khandi kamukawula esifwo alala nabebachirisi, nje eyiriba okhulira nokhusya ameno.