23

¹ Olwola Yesu kalomalomera ebidiikha nabeeki baye: ² Nawoola ati, Abasomesa ba malako naba Falisaayo bekhala khu sisaala sya Musa. ³ Manu mutekwa okhuwulira chibabawoola. Ne mutakhola bibakhola khulwokhuba sibakhola bi basomesa. ⁴ Lundi bawowa emikuku emisito echitakiingikha bachitwiikha abatu khu mabeka, naye bo abeene sibadakha ata nokhuchediirakho nolwala lwawe. ⁵ Naye bibakhola byoosi babikhola mbo abatu babiwone: olwokhuba babambaliya ebiwandiiko byolerefu byawe nga bameedakho ensibiro khu maganduula kawe maleyi; ⁶ khandi badakha ebifwo ebyemutwe khu mbaga nende ebisaala ebyoluyaali yibewuusira; ⁷ khandi badakha okhubakhesa muwutale nabatu okhubalanga baati, Labbi ⁸ Naye enywe mutalangiwanga Labbi, olwokhuba omwekesa wenywe ali wulala nanywe mweesi muli bawandaaye. ⁹ Lundi mutalanganga omutu yeesi khu syaalo khuno muuti Bbabba, olwokhuba Senywe ali mulala khandi ali mukulu. ¹⁰ Oba okhulangiwa Omwekesa, olwokhuba muli nomwekesa mulala nje Kurisito ¹¹ Naye mwinywe obakhira owukkhulutu anabenge mukhosi wenywe. ¹² Nawuli oneniniyenge, aneseweenge assi, ne nawuli oneyiseenge assi, ananinisiweenge amukulu.

¹³ Naye chiribawukana enywe, abasomesa bamalako nende aba Falisaayo, enywe ababachirisi! Mwikalira owenengo womwikulu mu moni chabatu. Enywe abeene simwingira oba mwafukirira abadakha okhwingira si mubakanya okhwingira. ¹⁴ (Chiribawukaana enywe, abawandiisi nabafalisayo, abebachirisi! Olwokhuba mulya enyumba chabafiire, khandi mwekhola abasaba lukali: olwesyo mulibakho omusaango okukhira owukali.)

¹⁵ Chiribawukana enywe, abasomesa bamalako nAbafalisaayo, enywe ababachirisi! Mukeenda khu syalo nende khu kuyanja okhukalukhaniya mulala, ne naba mulala khwinywe, mu mukhola kaba omubi okhukhirakho enywe amakhabi kabiri nga omusyaani wa Geyeena.

¹⁶ Chibawukanire enywe, abemeresi bawofwu bemoni! Abawoola muuti nawuli olayira khu lwenyumba ya Weere, si syamaani; naye nawuli olayirira khu lwesabbu yomu nyumba ya Weere aba aniyeye omusango. ¹⁷ Enywe abawofwu basiru! Sina esikhiramo owukhulutu! Esabbu, oba enyumba ya Weere eyikira esabbu yaba enjolerefu? ¹⁸ Khandi mwesi muwoola muuti, Omutu nalayira khu wolutaari, siwuma amakhulutu; ne omutu yeesi nalayira olwesiwanwa esirikho omusango kumukhira olwokhulayira khwaye. ¹⁹ Enywe abasaacha abawofwu! Sina esikhira owukhulutu: esiwanwa, oba wolutaari eyikira esiwanwa syaba esyolerefu? ²⁰ Nolwesyo, oyo olayira khu wolutaari, alayira khu lwa wolutaari nende byoosi ebiyirikho. ²¹ Naye oyo olayira khu lwenyumba ya Weere, alayirira khu lwenyumba ya Weere nende oyo oyimenyamo. ²² Nende oyo olayira khu lwekulu, alayira khu lwesisaala sya Weere nende ebyo byoosi ebisirikho.

²³ Chiribawukaana enywe, abasomesa bamalako naba Falisaayo, enywe ababachirisi! Olwokhuba mutusa sirala syekhumi syebitu bitonotono, ne mulekhayo emboosi enkhulutu echamalako___ nga mwekesa owutuufu, esisa, nenfukiirira. Muba mwata munkhola esyenyuma nga si mulekhire esyasookha. ²⁴ Enywe abemeresi abawofwu! Muwowa ni mubitirisa enati naye mumira eɳɳamira.

²⁵ Chibawukanire enywe, abasomesa bamalako naba Falisaayo ababachirisi! Olwokhuba mwosa khu mukulu we’bikoombe na’masaani, ne mukati mwichuuye omutolyo nende okhwedakhisa enywe abeene. ²⁶ Ewe omu Falisaayo muwofwu! Tangira woose mukati we’sikoombe nesaani, kho mberi khu mukulu wasyo khube khulayi.

²⁷ Chiribawukana enywe, abasomesa bamalako naba Falisaayo enywe ababachirisi! Olwokhuba mufwana nga ebiriindwa, ebyabakhiwa erangi endafu, ebiwonekha khu mukulu wulayi naye mukati bichuye amakuumba kabafu nowuchaafu woosi. ²⁸ Mutyo mwesi, khu mukulu muwonekha mu batu nga muli abolerefu ne mukati mwichuuye owubachirisi nende owubi woosi.

²⁹ Chiribawukaana enywe, abasomesa bamalako naba Falisaayo, enywe ababachirisi! Olwokhuba mwombakha ebiriindwa bya ba nnabbi muteresa yibasiikha abolerefu. ³⁰ Muwoola muuti, Khuba nikhwaliwo mu ndaalo cha ba kuka yefwe, sikhwakhafukirisaniisye ni nabo mu khwidisa amabaanga ka ba nnabbi. ³¹ Manu mutyo mwejulirakho abeene muuti muli abaana ba beeta ba nnabbi. ³² Manu mwichuse, owukali wesibi sya ba kuka yenywe! ³³ Enywe emiyokha! Abaana bemiyokha! Muliirukha mutye omusango kwomuliro kutasima? ³⁴ Sakira ndi okhubatumira ba nnabbi, nabatu bamakesi, nabasomesa. Khwabo, muli beeta khandi mwabakhomerera; nabandi mulibakhubba endawukhi mu sinaggogi chenywe. Mulibalonderesa okhutula mu siko okhucha mu sindi. ³⁵ Kho wunanu amabaanga koosi akabolerefu akedikha khu syalo, okhuchaakira khu mabaanga ka Abbiri oyo omwolerefu okhwosa khu mabaanga ka Sakaliya omwana wa Balakiya, yi mwetera akati wenyumba ya Weere nende wolutaari. ³⁶ Masima mbawoola nti, emboosi chino choosi chiryolerera khu lwaboluse luno.

³⁷ Yerusaalemi, Yerusaalemi, ewe owita ba nnabbi, okhubba amakina abatu bantuma yimuli. Amakhabi kanga kanadakhiramo okhuwuusa abaana bawo alala, nga engokho lu yiwuusa owunywinywi wayo mumbaya chayo, naye si wafukirira. ³⁸ Wona, enyumba yenywe yirekhirwe yimuli nga ekunda. ³⁹ Olwokhuba mbawoola nti, si mulimbonakho nawutono okhutula wunanu okhwosa lu mulilomaloma muuti, Aweresewe enkhabi owicha mu liita lyomwami.