28

¹ Sabbiti ni yakhawa, mu maweriweri khu ludaalo lwamberi mu juma, Malyamu Mangadalena nende Malyamu wundi bawuuna okhucha bewunje eɳɳani. ² Awene awo, aliwo okhutengerekha khwe’syalo lukali, olwokhuba Malayika w’Omwami kekha assi okhutula Mwikulu, kecha en’aɳɳani, kasindikisa okukina, kakutusa khu mulyango kwe’ηηani kamala kakwikhalakho. ³ Enfani yaye yali ngo lumesya lwekhubba, ne nguwo chaye chali endafu nga amakina kenfula. ⁴ Abalindi b’eɳɳani nibamuwona bamutya lukali batengerekha, manu baba nga bafwiye.

⁵ Ne Malayika kawoolera abakhasi ati, “Mutatya, olwokhuba manyire muli okhukonya Yesu, yi bakhomerera. ⁶ Khaba syali ano; amalire okhusyukha mu bafu, nga lukawoola. Mwiche muwone abali nibamuteye.

⁷ Manu mumale muche wangu muwolere abeeki baye muuti: ‘Asyukhiiye okhutula mu bafu abatangiiyemo okhucha e Galiraaya. Eyo nje yi munamuwone wunanu mbawooleye.”

⁸ Manu abakhasi bawawo okhutula khu ɳɳani ni batiye, naye nga bechuye esangaalo lingi, berukha bacha bawoolera abeeki baye. ⁹ Wangu wene Yesu kabawonekhera. Kabawoola ati, Mbakhesa, becha yali, bamwewowa mu makulu bamwinamira. ¹⁰ Ni Yesu kabawoola ati, Mutatya. Muche muwolere ba mwanaama bache e Galiraaya; eyo nje yibanambonere.

Amawulire Kabalindi

¹¹ Abakhasi nibali khu ngira khu bacha, mulala khu balindi kacha mu siko kawunusa amawulire eyiri bakhawona bakhulutu kabekesa ebyekholekhire byosi byoosi. ¹² Bakhawona bakhulutu bali bakananire nabatangirisi nibabaweye esyokhukhola, bawa abasirikale akabbesa mu wungi, ¹³ ni babawoola baati, Muli nokhuwoola muuti, Abeeki baye bechire akati mu wiire bamwiba ni khukona. ¹⁴ Amawulire kano ni kanolere Gafana, khu namwikuse khandi sino si sinaboose mu wudinyu. ¹⁵ Manu abasirikale bawukula erubya bamala bakhola ngalubabawoola. Nolukano luno lwekesewa, lwasasanisiwa mu Bayudaaya okhwola leero.

Owubkaha Owukhulutu

¹⁶ Manu abeeki ekhumi namulala bacha e Galiraaya, khu lugulu Yesu yikali abawooye bache. ¹⁷ Nibamuwona, bamwinamira; ne abandi bakanakana. ¹⁸ Ne Yesu kecha yibali kawoola ati, Owunyala wosi woosi mukulu nende khu syalo wumberesiwe. ¹⁹ Nolwesyo muche mukhole ebikha bye syalo syoosi abeeki, ni mu babatisa mu liita lya Sefwe, nende mu lyomwana, nende mu lyo Mwoyo Mwolerefu, ²⁰ nimubasomesa okhulonda amalako kosi koosi kanabalagira, khandi mu manye masima muuti, ndi ni nanywe endaalo chosi choosi okhwola khu njakamo ye syalo.