11

¹ Awo olwola Yesu nikamala okhulagira abeeki baye ekhumi nende babiri, katulayo kacha okhusomesa mu biko ebye’ Galilaaya.

² Naye Yokana nikawulirira mujera Kurisito bikali nakhola, katuma abeeki baye. ³ Okhuwoola Yesu baati, Niwe oyo owali owokhwicha, oba khulinde owundi?

⁴ Yesu kakowolamo kabawoola ati, Mukowoleyo muwoolere Yokana bi muwulira nende bi muwona: ⁵ Abawofu bafuna okhuwona, nende abalema bakenda, nabakenge batereesewa, nende abekafu ba matwi bawulira, nende abafu basyukhisiwa, nende abaati bawulirwa enjiri. ⁶ Naye ali nenkhabi oyo omusaacha otakwa khulwange.

⁷ Abeeki ba Yokana nibali bawawo, Yesu kachaka okhulomaloma emboosi khu Yokana ati: Siina simwachiririra okhuwona mu sibbarara? Ekada eridenganisiwa nembewo? ⁸ Ni sitali sityo, siina simwachirira okhuwona? Omutu owambaaye enguwo echimekhamekhana? Khaba, abo abambala echimekhamekhana baba mu madookho ka benengo. ⁹ Ne siina syene simwachiririra okhuwona? Ba nnabbi? Eee, mbawoola oyo akhirira erala nnabbi. ¹⁰ Ono nje owawandikiwakho ati: Ndituma wamuwaanda wange emutwe wawo, olitereesa engira yawo emutwe wawo.

¹¹ Masima mbawoola nti: mu batu abewulwa abakhasi si wabangawo omutu okhira Yokana omubatiisi; ate nga okhiramo owutono mu wenengo womukulu amukhira ye. ¹² Okhutula mu ndaalo cha Yokana omubatiisi nokhwoosa wuti, owenengo womukulu wubeeye wuyingwa namaani ni wucha mu moni, nabasaacha bamaani ba wedirakho sirifu. ¹³ Olwokhuba ba nnabbi boosi namalako balakula okhwosa khu Yokana. ¹⁴ Manu nimudakha okhusifukiirira, oyo nje Eriya owali nacha okhwiicha. ¹⁵ Oli nende amatwi akokhuwulira, awulire.

¹⁶ Oboluse luno ndalukeraniye khusi? Bali nga abaana bayere abekhaye mu wutale balanga abasyaawe: ¹⁷ Nibabawola baati, khwabakkhubbira amalere, ne enywe simwakhina khwababikhira, ne simwalira. ¹⁸ Olwokhuba Yokana kecha natalya khandi nga sanywa, bawoola baati, Alikho omusambwa. ¹⁹ Omwana womutu kecha nalya nanywa bawoola baati, wona owomudokho oyo khandi omumeesi, omwiicha wa bawoosa nende owa bali nende ebibi. Manu amakesi kawewa owolerefu olwebikholwa byako.

Engisa Khubiko Biteyolobya

²⁰ Yesu kachaka okhusasira ebiko mukakholera ebyamangalima byaye bingi, olwokhuba sibyeyolobya. ²¹ Chirikhuwukaana ewe, Kolaziini! Chirikhuwukaana ewe Besusayida! Olwokhuba ebyamangalima ebyakholerwa mwinywe biba nibyakholerwa mu Ttuulo nende Sidoni, baba beyolobya khale nibali mu nguwo chamaguniya nende ekokhe. ²² Naye mbawola nti, khu ludaalo olwomusango Ttuulo nende Sidoni baliba nende okhusandisiwa okhukhira enywe. ²³ Khandi wesi, Kaperunawumu, balikhukiniya okhwola mukulu? Khaba, oliikha e makombe. Olwokhuba ebya’mangalima ebyakholerwa mwiiwe biba ni byakholerwa mu Sodomu, siba syakhabeyewo no’khwola wunanu. ²⁴ Manu mbawoola nti, khu ludaalo lwo’musaango esyaalo sye Sodomu siriba no’khusandisiwa khutono okhukhirakho enywe.”

Okhuwumula Khwa Bajoηηu

²⁵ Mu ndaalo echo Yesu kakowolamo kawoola ati, Nkhukiniya ewe, Bbabba, Omwami wekulu nende esyaalo, olwokhuba wakisa emboosi chino abamakesi nende abalyepulyepu wa biwikhulira abaana abayere. ²⁶ Eee, Bbabba, olwokhuba siityo nje lusyasimiwa mu moni chawo.

²⁷ Ebitu byoosi byamberesewa nende Bbabba. Awuma mutu yeesi omanyire omwana okhutusakho simwana, lundi awuma mutu omanyire simwana okhutusakho omwana khandi abo omwana badoola kamubawikhulira. ²⁸ “Mwiiche yiindi, enywe mweesi abajoηηire khandi abasidoweywe, ese nja okhubawuluusa. ²⁹ Mwetwiikhe ejoogi lyange munjekerekho, olwokhuba ndi mudiira kaala khandi omulonga mu mwoyo, Manu mwesi muliwona okhuwumula khwe’myoyo chenywe. ³⁰ “Olwokhuba ejoogi lyange sidinyu, no’mukuku kwange mwangu.”