10

¹ Kalanga abeeki baye ekhumi na babiri kabaawa owunyala ohwirusya emisambwa mibi nokhuwoniya, endwaaye nolumbe. ² Abeeki abo ekhumu nababiri, ameeta kawe nje kano: Owamberi nje, Simooni “Olangiwa Petero,” nende Andereya mwanaaɳɳina; Yakobo omwana wa Sebbedaayo, nende Yokanamwanaaɳɳina; ³ Firipo nende Bbatulumaayo; Tomasi nende Matayo omuwoosa; Yakobo omwana wa Alufaayo, nende Saddayo; ⁴ Simooni Omukananayo nende Yuda Isukalyoti, owamulyaamo olukhwe.

⁵ Ekhumi nababiri bano Yesu kabatuma nebilagiro bino: nabawoola ati, Mutachanga mu bateende khandi mutengiranga mu biko bya ba Samaliya. ⁶ Naye muche eyiri amakoondi ka Yisirayiri akakota; ⁷ Nga lumucha, muwuulire owubakha wuno: Owenengo owomwikulu wuli ambi. ⁸ Muwoniye abalwaaye, musyukhise abafu, mwose abakeenge, mwirusye dayimoni. Mwafuna wusa mwesi muwenge wusa. ⁹ Mutakinga e saabbu, ata efwesa, ata ebidiiri mu nkhoba chenywe; ¹⁰ mutakinga eguniya, oba enguwo echokhwekalukhaniya, ata ebiraato, ata endawukhi; olwokhuba okhola emirimo akhoyera omusaara kwaye. ¹¹ Ne nawuli siko oba olukongo lumwingiramo, mukonyengemo omutu okhoyera, mukonanga omwo, okhwola lu mulitulamo. ¹² Nimwingiraanga mu nyumba, mukhesaanga. ¹³ Enyumba niyikhoyera, enkhabi chenywe chidoηηengemo; naye niyitakhoyera, enkhabi chenywe chibakowolerenge. ¹⁴ Naye omutu na’tabasudyaanga oba kawulira emboosi chenywe, mutulanga mu nyumba eyo oba mu siko esyo, mukhukhumulenge olufukhe lwo’mu makulu kenywe. ¹⁵ Masima mbawoola nti, Esyaalo sya Sodomu nende Gomora siriba nokhusaandisiwa okhwokhwesimiirisiwa khu ludaalo lwomusaango okhukhira esiko esyo.

¹⁶ Mbatuma nga amakoodi akati mu manani. Manu mubenge bakesikesi nga enjokha, khandi mubenge balonga nga amawusi. ¹⁷ Mwerindenge abatu; olwokhuba balibawayo mu khiikho nende mu makhuηηaniro kawe. ¹⁸ Khandi khulwange muliyiriwa eyiri abamasasa nende eyiri abene’ngo nga abajulisi yibali nende abateende. ¹⁹ Naye ni babadiranga, mutelalikhiranga simunawoole oba nga lu munasiwole. Musikha esyo muliyeresewa esyokhuwoola, ²⁰ khuba siniinywe abaliba nimulomaloma, okhutusakho Omwoyo kwa senywe nje okuliba kulomalomera mwinywe. ²¹ “Mwanaɳɳina wo’mutu alimulyamo olukhwe o’khwitiwa, nende simwana yesi eyiri omwana waye. Na’baana balikhayukhira abeewusi bawe no’khubetisa. ²² Munasyuliwanga abatu boosi khu lwange, naye olyomiira okhwoola khunjakamo nje oliwonesawa. ²³ Nibaberusyaanga mu siko sirala, mwirukhiranga mu sindi. Mbawoola masima nti, Simuliswaniya ebiko bya Yisirayiri okhwola omwana wo mutu lwaliicha.

²⁴ Omweeki syaba amukulu womwekesa waye, ata omukhosi syaba amukulu womukhongo waye. ²⁵ Siba sirayi omweeki okhuba nga omwekesa waye, omukhosi okhuba nga omukhongo waye. Nisiba nga omukhongo mwene nyumba alangiwa Beresebbuli, ne syakhaba sitye khubo mu nyumba yaye!

²⁶ Manu mutabatyaanga. Yiwuma esyawiikhiwakho esitaliba alafu, oba esyakisiwa esitalimanyikha. ²⁷ Bimbawoolera mu siirema, bilomalome mu sidete; ne simbawewetera mu matwi kenywe, musilomalomerenge amukulu khusirama. ²⁸ Manu mutatyanga abo abeeta omubiri ninga sibanyala okhwiita owulamu. Naye mutyenge oyo onyala okhusikhirisa owulamu nomubiri mu muliro okutasima. ²⁹ Chamuguuru tubiri sibatukusamo ekhera ndala? Khandi yiwuma khalala khutwo akhalikwa asi Senywe natamanyire. ³⁰ Ata nende efwiri lyokhumitwe chenywe lyoosi lyabaliwa. ³¹ Manu simutyaanga; enywe mukhira chamuguuru enyiingi. ³² Manu nawuli mutu yeesi olintumbulira mu moni chabatu, sesi ndimutuumbulira mu moni cha Bbaabba oli mukulu. ³³ Naye yeesi owakhanekaane mu moni chabatu, sesi nakhamwekane mu moni cha Bbaabba oli mukulu.

³⁴ Mutabasa muuti necha okhuleeta emirembe khusyaalo: sinecha okhuleta emirembe, wawula esyoki. ³⁵ Olwokhuba necha okhukawukhaniya omwana nende simwana, omukhana nende ɳɳina, omweya nende masalaɳɳene. ³⁶ Abasiku bo’mutu banabenge bomunyumba yaye yene. ³⁷ “Odakha simwana oba ɳɳina okhunkhirakho, sikankhoyera; omutu yeesi odakha omusyani oba omukhaana waye onkhunkhirakho sikankhoyera; ³⁸ nende oyo otawukula omusalaba kwaye kanondakho enyuma wange, sikankhoyera. ³⁹ Owoniya owulamu waye khulwaye kakhawufwirwe, okosya owulamu waye khulwange kakhawufune.

⁴⁰ Bala ababafukirira bafukirira ese, owunfukirira ese aba afukiriye owantuma. ⁴¹ Ofukirira nabbi muliita lya nabbi aliwewa omusaara kwa nabbi, naye ofukirira omwolerefu muliita lyowolerefu aliwewa omusaara kwomwolerefu. ⁴² Khandi wuli owa mulala khubatono bano esikombe syamaachi amanyifu syoɳɳene khulwokhuba mweeki wange, muliita lyaange, masima mbawoola nti, syalikhaywa omasaara nawutono.”