9

¹ Yesu kengira eryaato, kambukha kola mu siko sye wawe. ² Becha bamuletera omulwaaye owakokomba, ni bamukoniisye khu mukeka. Ne Yesu nikawona okhufukiirira khwawe, kawoola oyo owakokomba ati, Mwana wange, guma omwoyo; ebibi byawo bikhutusiiwekho.

³ Khu sino, balala khu basomesa ba malako bawoola abene nabene baati, Omusaacha ono afwotokheresa! ⁴ Naye Yesu nikamanya embaasa chawe, kawoola ati, Khusiina muli nebibaaso ebibi mu myooyo chenywe? ⁵ Esyangu nje esiri: okhuwoola nti, ebibi byawo bikhutusiiwekho, kho nomba okhuwoola oti, Siingira okende? ⁶ Naye mumanye muti omwana womutu ali nowunyala khu syaalo okhutusawo ebibi. Namala awoola oyo okongolbaaye ati, Yema, kiinga omukeka kwawo okowoleyo engo. ⁷ Omusaacha kasingira kacha engo. ⁸ Naye esidiikha nisyawona sino, bechula nowuti, bakiniya Weere, owaweeresa abatu owunyala owakiiye awo. Okhulangiwa Khwa Matayo

⁹ Nga Yesu lukali nachanakana natula eyo, kawona omusaacha olangiwa Matayo nikekhaaye yibasolosera omusolo kamuwoola ati, Nonde, Matayo kasiingira kamuloonda. ¹⁰ Awo olwoola nikali nikekhaaye mu nyumba ya Matayo nalya, echawo abawoosa bangi nende abatu bebibi bekhala balya naye nabeeki baye.

¹¹ Aba Falisaayo ni bawona sino, bateeba abeeki baye baati, Lwasina Omwekesa wenywe alya nabawoosa nabakholi bebibi?

¹² Ne nikawulira bino, Yesu kakowoolamo ati, Abalamu sibadakha Omusawo, okhutusakho abalwaaye. ¹³ Naye muche mweke amakhulutu kemboosi yino muuti; Ndakha esisa naye sindakha ebiwaanwa. Olwokhuba sineecha okhulaanga abolerefu, naye abakholi bebibi.

Yesu Atebewa Khu byokhusiiba

¹⁴ Olunyuma abeeki ba Yokanabecha bamuteeba baati, Khulwasiina efwe nende aba Falisaayo khusiiba, ne abeeki bawo sibasiiba?

¹⁵ Yesu kabakowoolamo ati, Sinyalikha sitye abakeni bomusaacha odekhisye balira nasiiri ni nabo? Naye endaalo chicha okhwoola odeekhiisye omweeya lwalibatusiwakho; kho baasiiba.

¹⁶ Yiwuma mutu onaba esiraka esyenguwo embyakha khu nguwo engofu, olwokhuba esyo siraka siba syekhwesa syabambaliya syatula khu nguwo, esidomo syaba sikhongo lukali. ¹⁷ Khandi sibachukha omwenge omuyaakha mu seero ekofu. Nibakhola batyo, eseero liba linatandukhe, nomwenge kwedikha neseero linyaasikha. Khaba, bachukha Omweenge muyakha mu maseero mayakha kho byombi byerinda wulayi.

Omukhaana Muffu Nomukhasi Mulwaye

¹⁸ Nikali nasiwoola bino omutuki mulala kecha ali kamusigamira, kamuwoola ati, Omukhaana wange kakhafwa. Manu yiicha wusa omutekho omukhono kwawo, analamukhe. ¹⁹ Yesu kasingira kacha naye, alala nende abeeki baye. ²⁰ Manu Omukhasi owali nowulwaye wokhudachirira okhumalira erala emyaaka ekhumi nachibiri kecha emukoongo wa Yesu kadiira khu kemo lye nguwo yaye.

²¹ Olwokhuba kawoola mu mwooyo kwaye ati, Nindadiire wudiira khu nguwo yaye, ndawone.

²² Naye Yesu nikekhewukha kamuwona. kamuwoola ati, Mukhana wange, Guma Omwooyo, Okhufukiirira khwawo khu khuwoniisye. Omukhasi kawonera awene naweene.

²³ Yesu nikengira mu nyumba yomutuki oyo kawona abakhubbi bamalere nende okudiikha kwokukhero, ²⁴ kabawoola ati, Muwewo. Omukhaana syafwiye, naye akona. Bamuchekha lukali. ²⁵ Esidiikha nisyatula, Yesu kengira kadiira khu mukhono kwomukhaana, kasingira. ²⁶ Emboosi eyo yaswaaniya syaalo esyo syoosi.

Yesu Awoniya Omuwofu mudiimbe

²⁷ Yesu nikatulayo, abawofu bemoni babiri bamuloonda, nibalomalomera amukulu nibawoola baati, Tukwiire esisa ewe Omwana wa Daudi! ²⁸ Nikali nikengiye mu nyumba, abawofu bemoni becha yali, Yesu kabateeba ati, Mwomiisa muti nyala okhukhola sino? Bamuwoola baati, Eee Omwami,

²⁹ Kadiira khu moni chawe nawoola ati, Okhwema khu nfukirira yenywe sikholewe yimuli sityo; ³⁰ Emoni chawe chaliimbula. Yesu kabakhutira lukali nawoola ati, Atabawo omutu yeesi omanya sino. ³¹ Naye nibatula awo bacha balangirira mu syaalo esyo syoosi.

³² Manu nibali kho batula, bamuleetera omutu awakwa esiru, nalikho dayimoni. ³³ Dayimoni nichali chakherusiwa, omudiimbe kalomaloma. Esidiikha syawuka, Nisiwoola siiti, Okhutula khale nakhandi sino si siwonekhangakho siiti mu Yisirayiri.”

³⁴ Naye aba Falisaayo bawoola baati, “Kerusya dayimoni nakhosesa amaani ke’misambwa.”

Abakhosi Batono.

³⁵ Yesu kakendakenda mu biko byoosi, nende mu ngoongo choosi nasomesa abatu mu makhuηηaniro kawe, nga awuulira enjiri yo’wene’ngo, nawoniya endwaaye choosi nolumbe. ³⁶ Naye nikawona esidiikha, kasikwira esisa, olwokhuba bali basalanisiwe khandi nibawuma wuyedi, nga amakoondi akawumakho omwaayi. ³⁷ Kho kawoola abeeki baye ati, Ekesa liingi, ne abakesa batono. ³⁸ Manu musabe Omwami wobyokhukesa, khu olwo alete abakhosi mu ndalo yaye.