12

¹ Manu mu ndaalo echo Yesu kabita mu ndalo ye ηηano khu lwa Sabbiiti. Abeeki baye bali njala, bachaaka okhukusuchula eηηano nibalya. ² Naye Abafalisaayo nibawona, bamuwoola baati, “Wona! Abeeki bawo bakhola ebikhalaka amalako khu lwa Sabbiiti.”

³ Naye kabawoola ati, “Simusomangakho Daudi sikakhola nikali enjala ni yamuluma nende abo bakali nabo? ⁴ Nikengira mu nyumba ya Weere, kalya emigaati echalabisiwa echali echa bakhawona. Bachirya nende bakali nabo__ esitali mu malako, nga cha bakhawona boηηene. ⁵ Nawo simusomanga mu malako, muuti bakhawona bakhalaka amalako khu lwa sabbiiti ni basikala ni bawuma omusango? ⁶ Naye mbawoola nti oli ano akhira enyumba ya Weere owukhulutu. ⁷ Singa mwali mumanyire amakhulutu kemboosi chino, Ndakha esisa, okhulekha esiwewayo, simwakholobisiisye abatali nomusaango. ⁸ Olwokhuba omwana wo mutu nje omwami wa Ssabbiiti.

⁹ Nikatula mu sifwo esyo, kacha mu sinagoogi yawe, ¹⁰ manu, wona mwalimo omusaacha owomukhono okwabbangalala. Bamuteeba nibakonyeresa si banafunane Yesu, bamuteeba baati, Sirayi okhuwoneserya omutu khu Ssabbiiti?

¹¹ Kabawoola ati, Nanu mwinywe naliba nende ekoondi lyaye, manu lyakwa mu liina khu Sabbiiti, otalidiira kalitusamo. ¹² Omutu syakhira lukali ekoondi! Manu sirayi okhukhola owulayi khu Ssabbiiti. ¹³ Namala awoola omutu oyo ati, Kolola omukhono kwawo. Kakukolola kwawona, Kwaba nga okuundi. ¹⁴ Naye aba Falisaayo batula awo bakhenga amakesi akokhwita Yesu.

Omukhosi mwangalemo Wa Weere

¹⁵ Okhumanya bino, Yesu katula mu sifwo esyo. Abatu bangi bacha naye, kawoniya boosi owulwaaye, ¹⁶ kabakhutira bakhaye okhumutumbula mu batu. ¹⁷ Syolerere esyawoolerwa mu Isaaya nnabbi siiti: ²² Becha bamuletera omutu olikho dayimooni ni muwofwu wemoni khandi nga syalomaloma, ne Yesu kamuwoniya, kalomaloma khandi kawona. ²³ Abatu boosi bawuka lukali nibawoola baati, Ono kakhaba ni nje omwana wa Daudi?

²⁴ Naye aba Falisaayo nibawulira bino, bawoola baati, Oyo kerusya dayimooni khu lwamaani ka Berusebuli, omukhulutu wa dayimooni.

²⁵ Yesu kamanya okhubaasa khwawe kabawoola ati, wuli owenengo ni wukawukhana owene nowene wusikha, khandi nawuli siko oba enyumba niyikawukhanamo eyene neyeene si yemawo. ²⁶ Nisiba mbo sitaani kerusya sitani, aba akawukhaniremo omweene. Nowenengo waye wakhemawo wutye? ²⁷ Ne nimba ni nirusya dayimooni khulwa Berusebbuli, abatu benywe bachirusya khu lwa nanu? Manu abo nje abalibakhengera omusango. ²⁸ Naye ese naaba ni nirusya dayimooni khulwo mwoyo wa Weere, manu owenengo wa Weere wubecheye.

²⁹ Oba, omutu anyala atye okhwingira mu nyumba yomutu owamaani, kanyaka ebiitu byaye okhutusakho nasookhire kawowa owamaani ola? Kho kanyaka enyumba yaye.

³⁰ Omutu otaasi naange musiku wange, Khandi omutu otawuusira alala nange asalaaniya.

³¹ Sakira mbawoola nti, Abatu balirekherwamo wuli sibi syoosi esyokhufwotokheresa naye esibi esyokhufwotokheresa omwoyo si sikhulirekherwamo. ³² Wuli mutu yeesi olomaloma emboosi khu mwana womutu alirekherwamo, naye omutu yeesi olomaloma khu mwoyo mwolerefu syalirekherwamo, ata mu ndaalo chebikha bino, ata nende mu ndaalo echiicha okhubawo.

³³ Khola Omusaala kube mulayi nebyaamo byakwo binabe ebirayi, oba khola omusaala kube omubi ne’byaamo byakwo binabe ebibi, olwokhuba omusaala kumanyikhira khu byaamo byakwo. ³⁴ Enywe abaana be radwaηηi, munyala mutye enywe ababi okhulomaloma emboosi yosi yoosi endayi? Olwokhuba khwiibyo ebichula mu mwooyo omunwa nj’e bikulomaloma. ³⁵ Omutu omulayi ebirayi abitusa mu sibiikhiro syaye esirayi, nomutu omubi ebibi abitusa mu sibiikhiro syaye esibi. ³⁶ Khandi mbawoola nti, Wuli mboosi eyitakhoya abatu yibalomaloma baliyiwosa khuludaalo olwomusango. ³⁷ Olwokhuba emboosi chawo nje echiriweesa owolerefu lundi emboosi chawo nje echirikhukhisa omusaango.

Akhawonero Kha Yona

³⁸ Manu aba Falisaayo bandi nende abasomesa bamalako bamukowolamo nibawoola baati, Omwekesa, khudakha otweekese akhawonero khu khawone.

³⁹ Naye kakowolamo kabawoola ati, “Abakholi be’mbi na’badaamba be’ndaalo chino nje abokoonya akhawonero! Ne sibaliwewa akhawonero okhutusakho akhawonero kha nnabbi Yona. ⁴⁰ Olwokhuba nga Yona lukamala endaalo chidatu, esideete nende esiro munda y’o kuηηeni, atyo omwana wo’mutu nje lwalimala endaalo chidatu esiro nende esideete mu mwoyo kweroba. ⁴¹ Abatu be Nnineve bakheme akati mu musaango alala nende abatu bendaalo chino; beyolobya khu lwokhuwuulira khwa Yona, ne wunanu okhira Yona ali ano. ⁴² Omwenengo Omukhasi wa Sheba kakheeme mu moni alala nabaatu bendaalo chino lundi alibakhisa omusaango; olwokhuba katula khu njakamo yesyaalo okhuwulira amakesi ka sulemaani, ne wunanu okhira Sulemaani ali ano.

⁴³ Naye dayimooni mubi natula mu mutu, akeenda muusa echomerera, nakoonya awokhujoηηolokhera manu kakhaywa. ⁴⁴ Manu awoola ati, ‘Kha ngowoleyo mu nyumba yange yinatula.’ nikoolamo kawona ni njereere, ni yeyirwe wulayi ni yiteresewe. ⁴⁵ Manu acha kaleterakho dayimooni bandi musanfu abakhira owubi, boosi nibengira baba omwo. Manu embeera yo’mutu oyo yiriba mbi okhukhirakho eyatangira. Nje siriba siityo eyiri ababi be’ndaalo chino.”

Nηηina Nende Ba mwanaηηina Yesu

⁴⁶ Ne Yesu nikali nasilomaloma eyiri esidiikha, wona, nηηina nende ba mwanaηηina bali bemire erwanyi, nibadakha okhulomaloma naye. ⁴⁷ Omutu kamuwoola ati, Wona mamawo nende ba mwanawamawo bemire erwanyi badakha okhulomaloma nawe.

⁴⁸ Ne kakowolamo nawoola ati, maama nje nanu, khandi ba mwanawama nje bananu? ⁴⁹ Kakolola omukhono eyiri abeeki baye, kabawoola ati, Wona maama nende bamwanawama. ⁵⁰ Olwokhuba nawuli okhola Bbabba oli mukulu byadakha nje mwanaama, nje mbocho yange, nje maama.