¹ Manu niyengira muliaro niyambukha niyeecha mudookho liaye liene. ² Ne lola, nibamurerera omuundu omulwaye wakwa owekhuyuka nakonere khusitanda; ne Yeso olwayalola obusuubiri bwabwe naboolera omulwaye wekhuyuka ari; omwana lema omwoyo ebiibi biao bilekheerwe.

³ Ne lola abandi khu bandiiki nibaboola mu mioyo kiabwe mbwe, omuundu uno yekeranisia khu Nasaye. ⁴ Ne Yeso olwaya manya amapaaro kabwe naboola ari, khusina muparanga amabi mumioyo kieng'we. ⁵ Okhuba nisiina esiangu, okhuboola mbwe, ebibi biao bilekheerwe; kose okhuboola mbwe buukha manu okeende. ⁶ Arali mbwe munyale okhumanya mbwe omwana womuundu ali nende obunyala khusialo okhulekhera echiimbi, manu naboolera omulwaye wokhwekhuyuka ari, buukha obukule esitanda siao, ochie munyumba mwao. ⁷ Manu nabuukha nachia munyumba mwaye. ⁸ Arali olwa omukanda kwalola elio bauka nibaberesia Nasaye oluyaali, owaberesania obunyala kori obwo khubaandu.

⁹ Ne olwa Yeso yabira narulire awo, nalola omuundu olangwa mbwe Matayo, niyekhaale musiribwa sia obusololi bwobusuru; namuboolera ari, "Noonde" Naye nasingira namulonda. ¹⁰ Ne olunyuma Yeso yekhala nalia ebiakhula munyumba, lola abanasialo nende abonooni beecha nibekhala asi alala ninaye nende abeka baye.

¹¹ Ne olwa Abafarisayo balola ako, baboolera abeka baye bari, "khulwasina Omwami weng'we alia nende abanasialo nende abonooni?"

¹² Arali Yeso olwayabulira ako, nababoolera ari, balia abali abalamu sibenya omulesi, arali abo abali abalwaye. ¹³ Arali muchie eng'we manu mumanyirisie olwa ako kekesia, nyenya esisa okhukhira emisango; okhuba sindecha olanga abakololofu arali abonooni mbwe bekanire.

¹⁴ Manu abeka ba Yokhana nibamwichira, nibaboola bari, "khusiina efwe nende abafarisayo khusiiba buli, nabo abeka bao sibasiiba?"

¹⁵ Naye Yeso nababoolera ari, Abaana ba omugole banyala okhulira, omugole nali nabo? arali chinyanga chakheeche, olwa omugole achia obarusibwakho, ne abweneao bakhasiibe.

¹⁶ Abulao omuundu orechanga esiraka sie ingubo injiakha khungubo ingofu, okhuba esio esirerweo okhwichusiao sirandukhayo okhurula khungubo, ne oburandukhe bwaaba obubi. ¹⁷ Kata abaandu sibakhachukha ifini injiakha muchichupa chingofu; okhuba echichupa echio chiadikha, manu ifini yiidikhe, ne echichupa chiasasikha; Arali bara ifini injiakha muchichupa chinjiakha, ne bioosi biba binamenya.

¹⁸ Olwayali naboolanga amakhuwa kano, lola niyeecha omuruki undi, namwinamira, naboola ari, omukhana wange kata bulano afwire, arali icha omurekho omukhono kwao, ne anaona. ¹⁹ Ne Yeso nabuukha namuloonda abeka baye boosi nibakhola bario. ²⁰ Ne lola omukhasi, owali omulwaye owadachirira emiaka ekhumi nende kibiri, namwichira inyuma, nadiira khulikemo lia ingubo yaye.

²¹ Okhuba yaboola mumwoyo kwaye ari, nikaba sa mbwe ndiira khungubo yaye ndaona.

²² Arali Yeso nakalukhana, ne olwa yamulola, namuboolera ari, "omukhana wange, weberesie omwoyo; obusuubiri bwao bukhuwonisie"ne omukhasi oyo naona khurula ebikha ebio.

²³ Ne olwa Yeso yola munyumba mwa omuruki oyo, yalola aboobi ba malere nende abaandu nibayokera. ²⁴ Nababoolera ari, "mubweo; okhuba omukhana safwiire, arali akona". Nabo nibamuchekha mukhumulekeresia. ²⁵ Arali olwa baandu barusibwayo, niyengira mukari, namudiira omukhono, omukhana nabuukha. ²⁶ Ne ifuma nisalana musialo siosi.

²⁷ Ne olwa yali nabwereo abaandu baofu babiri bamulondakho, nibalira nibaboola bari, "Ewe omwana wa Daudi rubere sisa!" ²⁸ Ne olwayali niyengire munyumba, abaandu baofu nibamwichira, Yeso nababoolera ari, "musuubira mbwe nyala okhukhola kano?' Nibamukalusia bari Eee Omwami.

²⁹ Manu nadiira khumoni chiabwe, naboola ari, khulondana nende busuubiri bweng'we kababeere kario. ³⁰ Ne chimoni chiabwe nichiikukha ne Yeso nabalabula, nababoolera ari, 'mulole mbwe omuundu aramanyakho ako." ³¹ Arali olwabali nibabwereo, balandaasia ifuma yaye musialo esio sioosi.

³² Olwabali nibarula erwanyi, lola bamurerera omuundu omusiru owaliimo esikhieno. ³³ Ne olwa esikhieno siakhungwa erwanyi, omusiru nalomaloma; ne omukanda nikuuka nikuboola kuri "kasiiri okhubakho kari mu Isiraili!"

³⁴ Arali Abafarisayo baboola bari, "Arusianga ebikhieno, okhubirira khumwami webikhieno."

³⁵ Ne Yeso nachia mumadookho koosi nende echingoongo niyekesia muchisinagogi chiabwe, nayalanga ifanjili eyobwami nende okhuonia obudekhere bwoosi nende buli amalwaye mubaandu. ³⁶ Arali olwa yalola omukanda, yadirwa nende esisa khubo, okhubeera bali nibajong'ere, nibasalanire, kori amakondi kabula omwayi. ³⁷ Manu naboolera abeka baye ari, elikesa bwadieri neliingi, arali abakholi bemirimo nabadiidi. ³⁸ Khu kario sabe Omwami welikesa, mbwe anyale okhuruma abakholi bemirimo mulikesa liaye